Na Paŭstanckim feście ŭšanavali pamiać Kalinoŭskaha i hierojaŭ 1863 hoda. A milicyja zapuskała dron
Paŭstancki fest — štohadovaje śviata pamiaci paŭstancaŭ 1863-64 hadoŭ — adbyŭsia ŭ Śvisłačy 27 kastryčnika. Udzielniki naviedali mahiłu Viktara Kalinoŭskaha, pomniki Kastusiu Kalinoŭskamu i Ramualdu Traŭhutu. A taksama źjeździli ŭ Jakušoŭku — rodavuju siadzibu Kalinoŭskich, dzie staić kryž u honar paŭstanca, piša Hrodna.life.
— Apošnija 20 hadoŭ my kožny hod pryjazdžajem u Śvisłač, kab ušanavać Kastusia i Viktara Kalinoŭskich i inšych paŭstancaŭ, — raskazvaje Vadzim Sarančukoŭ, jaki ŭ 2000 hodzie prymaŭ u Jakušoŭcy prysiahu na viernaść Biełarusi ŭ «Maładym Froncie». — Tut znachodziłasia rodavaja siadziba Kalinoŭskich, tut prajšło dziacinstva Kastusia Kalinoŭskaha. I heta toje samaje miesca siły dzie ŭsio dychaje biełaruščynaj, jakoje pavinien naviedać kožny biełarus.
Takim čynam ušanoŭvajuć pamiać paŭstancaŭ ź siaredziny 90-ch, kali była znojdziena mierkavanaja mahiła Viktara Kalinoŭskaha. Sioleta było kala 40 čałaviek — ludzi z Hrodna, Minska, Lidy, Vaŭkavyska, Śvisłačy. Kažuć, za hety čas było pa-roznamu: časam pryjazdžała 2-3 čałavieki, časam — tolki z Hrodna vyjazdžała 3-4 aŭtobusy. Akcyju ŭ hetym hodzie sumiaścili z vybarčym pikietam Maksima Hubareviča, jakoha zarehistravali kandydatam pa Hrodzienskaj sielskaj akruzie №53.
Štohod na akcyi prysutničajuć milicyjanty, jakija zdymajuć udzielnikaŭ akcyi. Potym aktyvisty atrymlivajuć štrafy. Sioleta milicyjanty navat vykarystali dron.
Sioleta ŭšanavać pamiać asabliva važna — u hod, kali ŭ Vilni adbudziecca pierapachavańnie paŭstancaŭ.
— Na žal, biełaruskaja dziaržava nie nadaje dastatkova ŭvahi mierapryjemstvam, źviazanym z paŭstańniem i z asobaj Kalinoŭskaha: pačynajučy ad adukacyi i zakančvajučy viartańniem u narodnuju pamiać. Tamu hetym zajmajucca hramadskija i palityčnyja aktyvisty, katoryja ŭ svaich kampanijach sprabujuć ušanavać miaściny, źviazanyja z paŭstańniem i maksimalna pašyryć infarmacyju pra heta, — kaža Vadzim.
Sioleta aktyvisty pryśviacili paŭstańniu šmat roznych mierapryjemstvaŭ. Adbyŭsia letnik, na miescach bajoŭ i paŭstanckich łahieraŭ ustalavali kryžy. Byŭ zapuščany litaraturny vieršavany čelendž. Vyjšła adnoŭlenaja nastolnaja hulnia «Paŭstancy». Pravodziacca roznyja histaryčnyja mierapryjemstvy i kanfierencyi. Rychtujecca interaktyŭnaja mapa miaścinaŭ, źviazanych ŭ paŭstańniem.
«Usio heta ŭ kompleksie pavinna być šeraham mierapryjemtvaŭ pa miemaryjalizacyi i viartańni ŭ nacyjanalnuju pamiać hierojaŭ vyzvolnych paŭstańniaŭ. U tym liku — 1863 hoda», — kažuć aktyvisty.
Pareštki siadziby Kalinoŭskich znajšli ŭ kancy 80-ch. Zaraz kala siadziby ŭ Jakušoŭcy znachodzicca kryž, jaki stvaryŭ Juryj Macko. Pobač kamień z šyldaj u honar paŭstanca. Aktyvisty kažuć, što ŭ pierśpiektyvie tut paŭstanie siadzibny kompleks, muziej i ceły miemaryjał u honar paŭstancaŭ.
— Ludzi, katoryja pakłali svaje žyćci, vielmi maładyja žyćci, achviaravali imi dla budučych pakaleńniaŭ, dla svajoj krainy, dla svajho narodu, — heta apryjory hieroi. Heta ludzi, jakija pavinny stać prykładami dla kožnaha biełarusa, — kaža Vadzim Sarančukoŭ.
Stali viadomyja pieršyja piać proźviščaŭ palitviaźniaŭ, vyzvalenych pa novym pamiłavańni5
Kamientary