U dački Nazarbajeva znajšli nieruchomaść u Łondanie na $100 miljonaŭ
Nieruchomaściu ŭ Łondanie na sumu bolš za $100 młn, aryštavanaj u 2019 hodzie, vałodajuć dačka i ŭnuk byłoha prezidenta Kazachstana Nursułtana Nazarbajeva. Pra heta paviedamiła bbc.com.
Śpikier sienata Kazachstana Daryha Nazarbajeva i jaje syn Nurali Alijeŭ ciapier asprečvajuć aryšt nieruchomaści ŭ sudzie. Jon byŭ nakładzieny ŭ ramkach baraćby brytanskich uładaŭ z admyvańniem niezakonnych dachodaŭ praz kuplu nieruchomaści.
Ab aryšcie stała viadoma ŭ mai 2019 hoda. Tady imiony i hramadzianstva ŭłaśnikaŭ nie paviedamlalisia, adnak było viadoma, što abjekty kirujucca praz afšornuju kampaniju, źviazanuju ź niejkim zamiežnym čynoŭnikam.
Pa viersii brytanskaha Nacyjanalnaha ahienctva pa baraćbie z złačynnaściu, dva damy i kvatera byli nabytyja na złačynnyja dachody byłoha muža Daryhi i baćki Nurali, Rachata Alijeva. Nieruchomaść aformlenaja na try afšory — Antylskija vyspy, Panamu i brytanskuju zamorskuju terytoryju Anhilja.
Advakat ułaśnikaŭ žylla śćviardžała ŭ sudzie, što nieruchomaść była nabytaja paśla taho, jak Nazarbajeva i Alijeŭ raźvialisia, i, takim čynam, jon nie moža mieć da jaje adnosin. Abaronca taksama paviedamlała, što ahienctva pa baraćbie sa złačynnaściu admoviłasia vyvučać dakumienty, jakija tłumačać, jak Nazarbajeva kiruje svaimi finansami.
Nieruchomaść była nabytaja niekalki hadoŭ tamu na sumu bolš za $100 młn, adnak ciapier jaje rynkavaja cana moža być istotna vyšejšaj.
Kali Daryha Nazarbajeva i Nurali Alijeŭ nie dakažuć zakonnaść prybytkaŭ, na jakija byli nabytyja damy, jany mohuć być kanfiskavanyja i zatym pradadzienyja, a prybytak ad hetaj apieracyi pojdzie ŭ biudžet Brytanii.
Heta druhi vypadak prymianieńnia zakona dla baraćby z admyvańniem hrošaj praz kuplu nieruchomaści. Da hetaha ŭ 2018 hodzie pad jaho padpaŭ były staršynia praŭleńnia Mižnarodnaha banka Azierbajdžana (MBA) Džachanhir Hadžyjeŭ i jaho žonka. Ich abaviazali rastłumačyć pachodžańnie 22 młn funtaŭ sterlinhaŭ.
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty49
Kamientary