Były vice-premjer i eks-ministr achovy zdaroŭja Vasil Žarko, jaki pajšoŭ u adstaŭku letam 2018 hoda na fonie hučnaha karupcyjnaha skandału, kala miesiaca tamu vyjšaŭ na novuju pracu. Žarko staŭ daradcam staršyni praŭleńnia Banka BiełVEB Vasila Maciušeŭskaha. Hetuju infarmacyju TUT.BY paćvierdzili ŭ banku.
U piatnicu taksama stała viadoma pra toje, što śpiecyjalnuju kvalifikacyjnuju kamisiju Nacbanka, što aceńvaje adpaviednaść kvalifikacyjnym patrabavańniam i patrabavańniam da dziełavoj reputacyi, prajšoŭ eks-pasoł Biełarusi ŭ Kitai Kirył Rudy. Jon prachodziŭ acenku na pasadu «niezaležny dyrektar banka i niabankaŭskaj kredytna-finansavaj arhanizacyi». Nazva banka i vierahodnaść, što były pamočnik prezidenta pa ekanomicy zojmie pasadu, na jakuju prajšoŭ kamisiju, pakul nie ŭdakładniajuć.
Vice-premjeram, jaki kuryruje sacsiektar, Žarko byŭ z 2016 hoda, da hetaha jon 10 hadoŭ zajmaŭ pasadu ministra achovy zdaroŭja.
Mienavita pry Žarko sistema biełaruskaj achovy zdaroŭja mocna źmianiłasia: źjavilisia RNPC, dzie ŭzrovień akazańnia mieddapamohi vyšejšy, čym u balnicach, pačali raźvivacca vysokatechnałahičnyja napramki ŭ miedycynie, uračam, što ŭmiejuć rabić składanyja apieracyi, adčuvalna pavysili zarobki. Pry hetym mnohija pytańni, da prykładu, dastupnaść mieddapamohi na vioscy, biednaść i pierahružanaść palikliničnaha źviana, zastavalisia biez vyraznaha rašeńnia.
Na pasadzie vice-premjera Vasil Žarko zapomniŭsia navatarstvam i ŭ adukacyi. Jon kuryravaŭ pytańnie admieny ekzamienaŭ u himnazii, abaraniaŭ 5-balnuju sistemu, patrabavaŭ stopracentnaha raźmierkavańnia vypusknikoŭ VNU.
U historyju Biełarusi Žarko ŭvojdzie i ŭ suviazi z samym hučnym karupcyjnym skandałam sučasnaj historyi. 25 červienia 2018 hoda kiraŭnik KDB Valeryj Vakulčyk paviedamiŭ ab vykryćci maštabnaj karupcyjnaj schiemy ŭ achovie zdaroŭja i zaklučeńni pad vartu 33 słužbovych asob, u tym liku i namieśnika ministra achovy zdaroŭja, niekalkich hałoŭnych doktaraŭ balnic.
Kamientary