U Asipovičach uspyška pnieŭmanii — daktary

Fota: Uładź Hrydzin, «Radyjo Svaboda».

Chvarobu zafiksavali ŭ 45 pacyjentaŭ rajonnaj balnicy. Jany čakajuć vynikaŭ testaŭ na karanavirus. Pra heta paviedamili «Svabodzie» krynicy z medyčnaha asiarodździa.

Chvorych ź ciažkoj symptamatykaj vyvieźli ŭ Mahiloŭskuju infekcyjnuju balnicu dy balnicu № 1, jakaja pieraprafilavanaja na čas pandemii ŭ infekcyjny špital.

Krynicy: Žychary Asipovičaŭ zarazilisia ŭ Miensku, kudy jeździać na pracu

Medyki kažuć, što 20 krasavika na rasparadžeńnie staršyni Mahiloŭskaha abłvykankamu Leanida Zajca ŭ Asipovičy vyjaždžała bryhada mahiloŭskich lekaraŭ. Jany mielisia vyznačyć stupień niebiaśpieki raspaŭsiudžvańnia karanavirusu. Pavodle ich, u rajonnym špitali praca arhanizavanaja na naležnym uzroŭni.

Pavodle ministra achovy zdaroŭja Ŭładzimiera Karanika, na 16 krasavika ŭ Asipovičach vyjavili 32 vypadki zaražeńnia COVID-19. Dvanaccać ź ich — u medyčnych rabotnikaŭ (virus zavioz adzin z medykaŭ, jaki jeździŭ za miežy horadu).

Krynicy kazali Svabodzie, što karanavirus u rajcentry zavozny. Pacyjenty zarazilisia ŭ Miensku, kudy jeździać na pracu.

«Paśla taho jak medyki zarazilisia, im vydali reśpiratary»

Z medyčnaha ž asiarodździa «Svabodzie» viadoma, što «niekatoryja daktary» daviedalisia pra zaražeńnie, kali vyrašyli sami pravieryć svaje kantakty 1 uzroŭniu i testy dali stanoŭčyja vyniki. Symptomaŭ chvaroby ŭ ich nie było. Medyki kažuć, što pryčynaj zaražeńnia stała adsutnaść srodkaŭ achovy. Paśla hetaha ŭsim vydali reśpiratary. Ciapier asipovickija medyki majuć usio nieabchodnaje, kab zaścierahčysia ad karanavirusu.

Havaryć adkryta pra sytuacyju ŭ balnicy lekary nie navažvajucca, bo bajacca cisku z boku načalstva. U pryvatnych hutarkach kažuć, što miascovaja infekcyjonka «zabitaja kantaktnikami» i što dziciačaje adździaleńnie pieraprafilavanaje pad zaražanych.

Što kažuć čynoŭniki

Hałoŭny ŭrač Asipovickaj centralnaj rajonnaj balnicy Pavał Šaciła pytańni pra sytuacyju z zaražeńniem medykaŭ paprasiŭ adrasavać u Mahiloŭskaje abłasnoje ŭpraŭleńnie achovy zdaroŭja. Admovilisia paviedamlać statystyku chvorych na COVID-19 i ŭ Asipovickim rajonnym centry hihijeny i epidemijalohii. Tam taksama paraili źviartacca ŭ Mahiloŭ.

Na momant vychadu publikacyi nie ŭdałosia atrymać kamentar u Mahiloŭskim abłasnym upraŭleńni achovy zdaroŭja.

Apošni raz tam paviedamlali statystyku zaražeńnia karanavirusam pa rajonach 9 krasavika. Tady karanavirus paćvierdzili ŭ Babrujsku, Kiraŭsku, Kryčavie, Mahilovie, Asipovičach i Škłovie.

20 krasavika načalnik upraŭleńnia Alaksandar Staravojtaŭ kazaŭ, što sytuacyja z karanavirusnaj infekcyjaj na Mahiloŭščynie stabilnaja. Pavodle jaho, piaciora pacyjentaŭ papravilisia i vypisanyja z balnic, ale pamału dadajucca novyja zachvarełyja. Kolki ich, jon nie nazvaŭ.

• 0
• 0
• 0
• 0
• 0
• 0
• 0
• 0