Dačka dziciačaha rasijskaha piśmieńnika Uśpienskaha paprasiła nie nazyvać premiju imiem baćki z-za chatniaha hvałtu
Dačka piśmieńnika Eduarda Uśpienskaha Taćciana napisała adkryty list, u jakim paprasiła nie nazyvać premiju Rasijskaj dziaržaŭnaj dziciačaj biblijateki ŭ halinie dziciačaj litaratury imiem baćki. Jana abvinavaciła baćku ŭ chatnim hvałcie i paviedamiła, što jon padtrymlivaŭ hvałt nad dziećmi ŭ siekcie Viktara Staŭbuna. Jaje list pryvodzić «Dožd́» z spasyłkaj «Sobiesiednik».
«Heta byŭ fizičny, psichałahičny, emacyjanalny hvałt, što paŭtaraŭsia pastajanna ŭ adnosinach da mianie — jaho dački, majoj maci — jaho žonki, unukaŭ, dziaciej druhoj žonki (viadomaj televiadučaj Eleanory Filinaj) i h. d. Na niaščaście, hrubaść i chamstva, kantrol i prymus pastupova stali normaj jaho žyćcia… Taksama normaj stali pakaznaja idylija, kali pry pryjeździe televizijnych hrup zaprašalisia ŭnuki i pavinny byli adlustroŭvać ščaślivuju siamju vialikaha piśmieńnika», — havorycca ŭ liście Taćciany Uśpienskaj.
U razmovie z «Sobiesiednikam» jaje padtrymaŭ dziciačy piśmieńnik Valancin Pośnikaŭ. Pavodle jaho słoŭ, Uśpienski «nikoli nie dapamahaŭ dziciačym piśmieńnikam» i biŭ dačku Taćcianu:
«Nielha nazyvać premiju imiem čałavieka, jaki nie lubiŭ dziaciej. Jon biŭ svaju dačku Taniu, abražaŭ, vyhaniaŭ na maroz u adnoj sukiency i zakryvaŭ za joj dźviery».
Dziaržaŭnaja dziciačaja biblijateka admoviłasia prybirać imia Eduarda Uśpienskaha ź litaraturnaj premii, paviedamlaje «MBCH miedyja» sa spasyłkaj na dyrektara ŭstanovy Maryju Viedzianiapinu. Jana skazała, što biblijateka nie razhladaje asabistyja jakaści piśmieńnikaŭ, a tolki ich układ u litaraturu. «Kali my pačniom z hetych pazicyj razhladać usich, čyim imiem nazyvajuć premii ci jašče niešta, my zakapajemsia va ŭsich čałaviečych pierypietyjach», — skazała jana.
Eduard Uśpienski pamior u 2018 hodzie, jamu było 80 hadoŭ. Jon prydumaŭ takich piersanažaŭ, jak krakadził Hiena, Čaburaška, sabaka Šaryk, kot Matroskin, braty Kałabki.
Siekta Viktara Staŭbuna isnavała ŭ SSSR z 1970-ch hadoŭ. Psieŭdamiedycynski kult praduhledžvaŭ, što z dapamohaj udaraŭ tokam i prypiakańnia jahadzic chłoretyłam možna vylečyć mnostva chvarob — Eduard Uśpienski lačyŭsia ŭ Staŭbuna ad ałkahalizmu i publična chvaliŭ jaho. U siekcie praktykavalisia katavańni dziaciej za praviny až da «niapravilnaha» vyrazu tvaru.
Kamientary