Žychary Družnaha praciahvajuć pratesty

Žychary pasiołka Družny (Minskaja vobłaść) nakiravali ŭ Administracyju prezidenta zvarot suprać budaŭnictva zavoda pa vytvorčaści piestycydaŭ.

Amal paŭtara hoda žychary Družnaha viaduć kampaniju suprać budaŭnictva ŭ rehijonie pradpryjemstva pa vytvorčaści srodkaŭ abarony raślin pradpryjemstvam ZAT «Aŭhust‑Bieł» (ułaśnik — rasijskaja firma «Aŭhust»). Rašeńnie ab vydzialeńni ziamli dla praviadzieńnia prajektnych rabot było pryniata rajonnymi ŭładami. U pačatku lutaha 2008 hoda žychary Družnaha nakiravali ŭ Administracyju prezidenta bolš jak tysiaču podpisaŭ suprać budaŭnictva pradpryjemstva. 22 sakavika minułaha hoda ŭ pasiołku adbyŭsia niesankcyjanavany mitynh, 3 krasavika — schod z udziełam pradstaŭnikoŭ zacikaŭlenych ministerstvaŭ i viedamstvaŭ.

Žychary pasiołka źviartalisia ŭ Saviet ministraŭ i Hienprakuraturu. 28 maja 2008 hoda Hienprakuratura vyniesła aficyjnaje papiaredžańnie kiraŭnictvu ZAT «Aŭhust‑Bieł» i zapatrabavała zabiaśpiečyć dostup hramadskaści da nieabchodnych materyjałaŭ. Adnak žychary Družnaha dahetul nie mohuć atrymać infarmacyju, što ich cikavić, a budaŭnictva zavoda ŭžo pačałosia.

Jak paviedamiŭ BiełaPAN aktyvist hramadskaj kampanii suprać budaŭnictva zavoda Siarhiej Abrazoŭski,

žychary Družnaha razhladajuć ciapierašni list u Administracyju prezidenta jak apošni krok pierad zvarotam pa dapamohu ŭ mižnarodnyja struktury.

«Nas dahetul mučyć adno pytańnie: navošta było tak staranna vyvučać hramadskuju dumku, kab potym jaje nie prosta nie ŭličyć, a na jaje naplavać?!» — havorycca ŭ zvarocie.

Pavodle słoŭ pradstaŭnikoŭ hramadskaści Družnaha, «zbyvajucca horšyja apasieńni ŭ dačynieńni da budaŭnictva hetaha zavoda». Tak, firma «Aŭhust» abaviazałasia inviestavać ułasnyja hrošy nie tolki ŭ budaŭnictva chimzavoda, ale i ŭ azdaraŭlenčy centr z basiejnam, žyły dom, darohi i inš. u jakaści kampiensacyi za naniesieny pradpryjemstvam uron, ale nie vykanała abiacanaha. Pavodle infarmacyi aŭtaraŭ zvarotu, kiraŭnictva firmy źviarnułasia ŭ bank z prośbaj ab vydzialeńni kredytu ŭ pamiery 8 młrd. rubloŭ. «U supierbahataj firmy «Aŭhust» akazalisia dziravyja kišeni», — havorycca ŭ zvarocie.

Infarmacyju pra budaŭnictva žychary Družnaha vymušany daviedvacca ad budaŭnikoŭ zavoda. Pavodle ich źviestak, uźviadzieńnie zavoda viadziecca sa šmatlikimi parušeńniami: vykarystoŭvajecca niajakasny bieton, nie vykonvajucca technałahičnyja pracesy, ułaśnik pradpryjemstva «nie źbirajecca budavać ačyščalnyja zbudavańni».

U ZAT «Aŭhust‑Bieł» BiełaPAN zajavili, što źviestki žycharoŭ Družnaha niepraŭdzivyja: ačyščalnyja zbudavańni na zavodzie praduhledžany, i parušeńniaŭ pry jaho budaŭnictvie nie dapuskajecca.

• 0
• 0
• 0
• 0
• 0
• 0
• 0
• 0