Chruščoŭki aktyŭna ŭzvodzili z kanca 1950‑ch da pačatku 1970‑ch hadoŭ. Jany byli pavinny vyrašyć žyllovaje pytańnie paśla Druhoj suśvietnaj vajny. Maštabnuju prahramu inicyjavaŭ hiensiek kampartyi SSSR Mikita Chruščoŭ, tamu charakternyja piacipaviarchoviki nosiać jaho imia. Ideja zaklučałasia ŭ tym, kab dać kožnaj siamji chaj i nievialikuju, ale asobnuju kvateru. Vynikam stali nie samyja vybitnyja architektura, dyzajn i interjer. Tochka.by vyvučyła ŭsie mahčymyja viersii, źviazanyja z maleńkim akiencam pamiž kuchniaj i vannaj, vakoł jakoha siońnia taksama chodzić niamała mifaŭ.
Niekatoryja ličać, što akno źjaviłasia ŭ metach biaśpieki. Kali čałaviek pa niejkich pryčynach stracić prytomnaść, budučy začynienym, da jaho možna budzie patrapić z kuchni. Ale sproba praleźci praz maleńkaje akonca chutčej pavialičyć čas ratavańnia. Praściej vyłamać dźviery, navat niahledziačy na toje, što jany adčyniajucca vonki.
Chtości miarkuje, što ŭbudavanuju prazrystuju aharodžu prydumali dla ekanomii elektryčnaści. Ale ŭ SSSR jana nie była takoj užo darahoj.
Jak ideja, praz akno možna było daviedacca, zaniata ci nie. Kab nie tuzać ručku i nie pałochać taho, chto znachodzicca ŭnutry. Ale hetaje pytańnie možna vyrašyć hołasam abo pahladzieć na vyklučalnik.
Samaja absurdnaja viersija źviazana z abaronaj pry vybuchu ad uciečki hazu, jakim zabiaśpiečvali chruščoŭki. Tonkaje škło ŭ prajomie, jak i sama jaho najaŭnaść, nibyta było zdolnaje pahłynuć vybuchovuju chvalu, i ściana pamiž kuchniaj i vannaj mahła ŭcaleć. Heta prosta niemahčyma pavodle zakonaŭ fiziki i z-za padychodaŭ da tannych sposabaŭ budaŭnictva.
Taksama prychodzić u hałavu ŭ pošukach łohiki, — akno rabili dla naturalnaj vientylacyi. Ale jano pieršapačatkova zadumvałasia zabłakavanym, heta značyć biez mahčymaści adčyniać. Adpaviedna, svabodnaja cyrkulacyja pavietra nie praduhledžvałasia.
Jašče adzin arhumient — źnižeńnie koštu budaŭnictva. Prymianieńnie takoha kštałtu akonnych prajomaŭ ličać prostym inžyniernym rašeńniem, jakoje adnačasova vyrašała pytańni aśviatleńnia biez uskładnieńnia kanstrukcyi. Ale łahičniej vykazać zdahadku, što ŭźviadzieńnie ścien jakraz paskoryła b sucelnaja panel bieź jakoj-niebudź vyjemki dla akna.
Z čym zmahalisia aknom u vannaj?
Uładkavańnie akna ŭ sumiežnuju kuchniu rehłamientavali budaŭničyja normy i praviły taho času. U normach ukazvałasia, što ŭsie pakoi, u tym liku vannyja (jany ž prybiralni), pavinny mieć naturalnaje aśviatleńnie. Zhodna z narmatyvami, było nieabchodna, kab soniečnyja pramiani zachodzili ŭ pamiaškańni praz vokny minimum na dźvie hadziny ŭ sutki.
U 1950—1960‑ia hady išła baraćba z tubierkulozam. Kab nie dać bakteryi razmnožycca ŭ vilhotnym asiarodździ, praduhledzieli akno, jakoje, pavodle zadumy, pavinna było prapuskać ultrafijalet, što abiezzaražvaje pavietra.
Zrešty, pavodle acenak sučasnych ekśpiertaŭ, u pieramozie nad tubierkulozam klučavuju rolu ŭsio ž adyhrała nie maleńkaje akonca (jaho efiektyŭnaść vielmi sumnieŭnaja), a raźvićcio miedycyny.
Ciapier čytajuć
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary