Aściarožna: u viehanskich praduktach udvaja bolš charčovych dabavak, čym u miasnych anałahach

Navukoŭcy ź Instytuta aptymalnaha charčavańnia (Institute for Optimum Nutrition) Vialikabrytanii praviali detalovy analiz 71 pary tavaraŭ ź miascovych supiermarkietaŭ, paraŭnoŭvajučy anałahi žyviolnaha i raślinnaha pachodžańnia.

Jak piša Daily Mail, dla dakładnaści ekśpierty vybirali maksimalna padobnyja pradukty: mindalnaje małako supastaŭlali z karovinym, viehanskija desierty — z małočnymi, a raślinnyja katlety — ź miasnymi. U śpis dla testavańnia taksama trapili łazańnia, majanez, johurty i hatovaja vypiečka.

Vyniki pakazali značnuju roźnicu ŭ składzie: u raślinnaj pradukcyi ŭ ahulnaj sumie było vyjaŭlena 199 charčovych dabavak, tady jak u žyviolnaj — usiaho 100.

Akramia kolkaści dabavak, raślinnyja alternatyvy sastupajuć i pa inšych pakazčykach składanaści składu. Ahulnaja kolkaść inhredyjentaŭ u viehanskich viersijach dasiahnuła 1566 suprać 1110 u tradycyjnych praduktach. Taksama ŭ zamieńnikach naličyli 39 roznych charčovych indeksaŭ (Je-numaroŭ), u toj čas jak u miasnych i małočnych ekvivalentach ich było 31.

Siarod najbolš raspaŭsiudžanych dabavak u raślinnaj ježy sustrakajucca karatyn, jaki vykarystoŭvajecca dla nadańnia koleru viehanskim syram, i karbanat kalcyju (E170) — jaho dadajuć dla aśviatleńnia praduktu i štučnaha ŭzbahačeńnia mikraelemientami. Dla stvareńnia patrebnaj tekstury ŭ zamieńnikach miasa i ryby rehularna vykarystoŭvajecca mietyłcelułoza, a ŭ anałahach małočnych praduktaŭ časta prysutničaje małočnaja kisłata ŭ roli rehulatara kisłotnaści.

Daśledčyki tłumačać takuju roźnicu technałahičnaj nieabchodnaściu: pakolki raślinnaje «miasa» nie isnuje ŭ pryrodzie, vytvorcy vymušany vykarystoŭvać šmatlikija rafinavanyja inhredyjenty, kab uznavić znajomy smak i vyhlad. Mnohija takija pradukty źjaŭlajucca praduktami hłybokaj pierapracoŭki i mohuć utrymlivać nie mienš soli, cukru i nasyčanych tłuščaŭ, čym aryhinały.

Choć viehietaryjanskaja dyjeta sapraŭdy spryjaje źnižeńniu ryzyki sardečnych zachvorvańniaŭ i atłuścieńnia, navukoŭcy zaklikajuć da aściarožnaści. Vyklučeńnie ŭsich praduktaŭ žyviolnaha pachodžańnia moža pryvieści da deficytu vitaminaŭ B12 i D, kalcyju, žaleza i amieha-3 toŭstych kisłot. Tamu ekśpierty rajać prychilnikam raślinnaha charčavańnia rabić staŭku na celnuju ježu (harodninu, babovyja, zbožža), a nie na vysokaapracavanyja imitacyi miasa.

Pavialičyć

Važna adznačyć, što ŭsie vyjaŭlenyja dabaŭki dazvolenyja i pryznanyja biaśpiečnymi pavodle dziaržaŭnych standartaŭ Vialikabrytanii. Aŭtary daśledavańnia taksama ŭdakładniajuć, što nie aceńvali abjomu spažyvańnia hetych praduktaŭ i dakładnuju kancentracyju rečyvaŭ, tamu vysnovy nielha aŭtamatyčna raspaŭsiudžvać na ŭvieś suśvietny rynak.

Tym nie mienš, vyniki papiaredžvajuć: sproba zamianić pryvyčnuju ježu jaje technałahičnymi kopijami moža nieprykmietna pieratvaryć zdarovy racyjon u dyjetu z vysokim utrymańniem štučna apracavanych kampanientaŭ.

• 1
• 0
• 0
• 0
• 0
• 0
• 0
• 0