Milicyja zatrymała lidara strajkama MAZa, na pracaŭnikoŭ uzmacniajuć cisk

20 žniŭnia milicyjanty zatrymali staršyniu strajkama Mienskaha aŭtamabilnaha zavoda Jaŭhiena Bachvałava​, paviedamiła Tut.by pradstaŭnica HUUS Mienharvykankamu Natalla Hanusievič. Razam z tym Svaboda daviedałasia ad krynic na zavodzie pra ŭzmacnieńnie cisku na pracaŭnikoŭ, jakija vystupajuć za adstaŭku ŭładaŭ i za novyja vybary.

Pavialičyć

«Litaralna za pieršuju pałovu hetaha dnia abstanoŭka značna pahoršyłasia. Terminova ŭstalavali videakamery va ŭsich cechach i prajezdach, sočać, kab nie źbiralisia bolš za try čałavieki, kab nie adsutničali na pracoŭnym miescy. Adrazu pahražajuć pazbaŭleńniem premii ci navat zvalnieńniem. Pa zavodzie jeździć AMAP na elektrakarach, šmat pravaachoŭnikaŭ na terytoryi. Sprabujuć vyličyć strajkam, jaki ŭ takich umovach, naturalna, pajšoŭ u padpolle», — paviedamiła krynica karespandentu Svabody.

Pavodle krynicy, na zavodzie pačalisia zvalnieńni tych, chto apošnimi dniami braŭ udzieł u strajku. «Kažuć prykładna pra 10 čałaviek, jakich zahadana zvolnić. Praviarajem hetyja źviestki», — paviedamiła krynica.

Ź inšych krynic Svabodzie stała viadoma pra zvalnieńnie ślesara Viačasłava Baŭkunoviča. Z 4-ha cechu zborki aŭtamabilaŭ (CSA-4). Pracaŭniku pastavili ŭ vinu toje, što adsutničaŭ na pracoŭnym miescy z 7-j ranicy da 15-j hadziny 19 žniŭnia, za što jaho pazbavili premii za žnivień. U druhim punkcie rasparadžeńnia zahadana «za systematyčnyja parušeńni pracoŭnych abaviazkaŭ biez pavažlivych pryčyn padrychtavać dakumenty na zvalnieńnie». Zahad padpisaŭ načalnik CSA-4 MAZ A. Paŭlučenka.

U biuro suviaziaŭ z hramadzkaściu MAZ atrymać kamentar nie ŭdałosia, bo nichto nie padymaje słuchaŭku. Nie adkazała i namieśnica hieneralnaha dyrektara pradpryjemstva pa idealohii Zoja Taran.

Na sajcie MAZ źjaviŭsia zvarot ad imia kalektyvu pradpryjemstva.

«My nie pavinny iści na povadzie ŭ tych, chto siońnia sieje razład i smutu, padzialaje hramadztva na svaich i čužych», — skazana ŭ zvarocie. Pavodle aŭtaraŭ zvarotu ad imia MAZ, «kalektyŭ, jak i ŭvieś biełaruski narod, zrabiŭ svoj vybar».

«Hałasavaŭ za Cichanoŭskuju, jak usie», — zvolnieny z MAZa rabočy patłumačyŭ, čamu advažyŭsia na strajk

Viačasłavu Baŭkunoviču 19 hod. Małady čałaviek tolki sioleta skončyŭ Aŭtamechaničny kaledž, što staić nasuprać MAZa i rychtuje dla jaho kadry. Viačasłaŭ musiŭ adpracavać na zavodzie 2 hady, byŭ raźmierkavany na 2 učastak hałoŭnaha kanvejeru i paśpieŭ adpracavać na im tolki 2 tydni.

«Hałasavaŭ pieršy raz u žyćci. Prahałasavaŭ za Cichanoŭskuju, jak usie, i kali daviedaŭsia, što Łukašenku dali 80%, aburyŭsia. Usie, kaho viedaju, hałasavali za jaje. U paniadziełak chłopcy skazali pra strajk, i ja dałučyŭsia.

My byli za adstaŭku Łukašenki i za novyja sumlennyja vybary. Nas było čałaviek 13, bolšaść navat pa imionach nia viedaju, bo pracuju tut zusim mała.

Jak my bastavali? Siadzieli, nie pracavali, a načalstva nakiravała na našy miescy rabočych ź inšych učastkaŭ. Chłopcy ź imi nie razmaŭlali, i ja taksama — pra što ź imi havaryć?

My try dni nie pracavali, a siońnia vyrašyli viarnucca na kanvejer, bo nas mała. Nam jašče ranicaj kazali, kab pačynali pracavać, a potym usio rezka źmianiłasia.

Mianie zrabili systematyčnym parušalnikam, choć raniej zaŭvah nie było. Voś idu pa zahad ab zvalnieńni», — paśpieŭ raskazać Viačasłaŭ Baŭkunovič.

Małady pracaŭnik skazaŭ, što nie škaduje pra svoj učynak, ale ciapier jaho prymusiać spłacić za vučobu ŭ kaledžy, i heta pałochaje.

«Vučyŭsia 4 hady. Padličyli, što vučoba kaštuje 8 tysiač 200 biełaruskich rubloŭ, i pryjdziecca addavać. Jak — nia viedaju. Kažuć, sam vinavaty, što nie adpracavaŭ na zavodzie, a pajšoŭ u strajk», — skazaŭ Viačasłaŭ.

Pavodle Viačasłava Baŭkunoviča, z MAZa zvalniajuć jašče niekalkich pracaŭnikoŭ ź inšych padraździaleńniaŭ, jakija brali ŭdzieł u strajku, ale imionaŭ jon nia viedaje.

«Čuŭ, što jość zvalnieńni nia tolki ŭ našym cechu, ale imion nia viedaju», — skazaŭ Viačasłaŭ.

Atrymać kamentar zavodzkaha biuro pa suviaziach z hramadzkaściu nie ŭdałosia. Telefon biuro maŭčyć.

• 0
• 0
• 0
• 0
• 0
• 0