6 maja ŭ Minsku na Kamsamolskim voziery prajšła vuličnaja viečarynka viehanaŭ (viehany — strohija viehietaryjancy) u padtrymku aŭtanomnych prastor, u pryvatnaści skvota (skvot — samavolna zaniaty pakinuty budynak, pamiaškańnie) Rozbrat u Poznani, jaki apynuŭsia pad pahrozaj vysialeńnia. Pra heta raskazała BiełaPAN adna z udzielnic akcyi Nadzieja.
«Pryjemna, što ŭ śviecie, u jakim vielmi šmat stanovicca unifikavanym i ŭsio pradajecca i kuplajecca, isnujuć takija miescy, jakija padtrymlivajuć ludzi na asnovie niejkich inšych pryncypaŭ», — zaznačyła dziaŭčyna. Pavodle jaje słoŭ, udzielniki viečarynki — heta levyja pa palityčnych pohladach ludzi, jakija naležać da Ruchu za alternatyŭnuju sacyjalnuju rečaisnaść.
Padčas viečarynki dziejničaŭ svabodny kirmaš, dzie adzin moh prynieści niepatrebnuju jamu reč — knihi, adzieńnie, cacki, dyski, a inšy — uziać jaje sabie.
«Heta naša inicyjatyva — abmien rečami biez udziełu hrošaj», — zaznačyła Nadzieja.
U chodzie viečarynki impravizavali barabanščyki, pravodzilisia roznyja hulni. Taksama prajšła akcyja food not bombs («ježa zamiest bomb»), padčas jakoj usich žadajučych častavali haračaj viehietaryjanskaj ježaj. U zaviaršeńnie viečaryny na palanie adbyłosia fajer‑šou.
Kamientary