Pahladzicie, jakija niezvyčajnyja karmuški dla ptušak jość u Minsku i inšych haradach Biełarusi VIDEA
Žychary Minska i inšych haradoŭ Biełarusi paŭdzielničali ŭ niezvyčajnaj akcyi «Ptuški la karmuški».
Akcyju pravodziła abjadnańnie «Achova ptušak Baćkaŭščyny», paviedamlajuć «Minsk-Naviny».
Udzielnikam treba było dasłać fatahrafii i videa zroblenych svaimi rukami ci zaŭvažanych u vakolicach karmušak, da jakich prylatajuć ptuški. Samyja niezvyčajnyja možna ŭbačyć u videamateryjale.
Sioleta byŭ pabity rekord pa kolkaści ŭstanoŭlenych karmušak, na jakich udzielniki akcyi naličyli 14 933 ptuški 39 vidaŭ. Hodam raniej było ŭličana 6 500 ptušak 26 vidaŭ.
Pieršaje miesca sioleta zaniała vialikaja sinica (naličyli 6 868 ptušak), druhoje — vierabiej palavy (1 991), treciaje — vierabiej damavy (1 837). Na čaćviortym miescy — zielanuška (785), na piatym — błakitnica, abo siniaja sinica (513 ptušak).
Taksama haradžanam sustrakalisia aŭsianki, drazdy, amiałuški, sojki, špaki, śniehiry, dubanosy, ščyhły i navat šeść vidaŭ dziatłaŭ. Siarod niezvyčajnych haściej karmušak byli zaŭvažanyja jurok i malinaŭka. Hetyja dva vidy niačasta zimujuć u Biełarusi i redka prylatajuć pałasavacca ŭ ptušynyja domiki.
Zima praciahvajecca, i APB zaklikaje ŭsich minčan nie spyniać karmić ptušak. Tyja, chto jašče nie paśpieŭ paviesić karmušku, ale choča heta zrabić, mohuć znajści padkazku na sajcie arhanizacyi.
U mocnyja marazy pry -15 °C i nižej vadapłaŭnych ptušak varta karmić zierniem, aŭsiankaj abo narezanaj harodninaj, nasypaŭšy korm uzdoŭž bieraha la vady.
Kamientary