U Baranavičach sudziać vykładčyka pa płavańni za kaktejl Mołatava ŭ bahažniku aŭto
U sudzie Baranavičaŭ i Baranavickaha rajona 2 lutaha pačaŭsia razhlad kryminalnaj spravy suprać Alaksieja Paviadajły — treniera-vykładčyka pa płavańni ŭ miascovaj spartyŭnaj škole.
Alaksieja abvinavačvajuć pa č. 1 art. 295-3 Kryminalnaha kodeksa — «Niezakonnyja dziejańni ŭ dačynieńni da pradmietaŭ, dziejańnie jakich zasnavana na vykarystańni haručych rečyvaŭ». Praces viadzie sudździa Volha Ramaniuk, paviedamlaje spring96.org.
U pačatku sudovaha pasiadžeńnia abvinavačany zajaviŭ chadajnictva, kab sud byŭ zakrytym. Jaho patrabavańni padtrymali jaho advakat Taćciana Asipienka i dziaržaŭny abvinavaŭca — staršy pamočnik Baranavickaha mižrajonnaha prakurora Alaksandr Jaraševič. Adnak sudździa admoviła ŭ zadavalnieńni chadajnictva i pakinuła sud adkrytym.
Pavodle abvinavačvańnia, Alaksiej Paviadajła vyrabiŭ, zachoŭvaŭ i pieravoziŭ u aŭtamabili «Aŭdzi A6» haručaje rečyva, ź jakim jaho zatrymali 11 žniŭnia ŭ Baranavičach.
Mašynu tady spyniŭ patrul DAI, ich uvahu pryciahnuła bałakłava ŭ bahažniku. Alaksieja zatrymali i na nastupny dzień znajšli haručuju sumieś. Sumieś była adpraŭlena na ekśpiertyzu, i, zhodna ź jaje vynikami, skład sumiesi byŭ blizkim da składu «kaktejlu Mołatava».
Paviadajła zhodny z tym, što pieravoziŭ i zachoŭvaŭ hetuju sumieś, ale admaŭlaje jaje vyrab.
Varta adznačyć, što pieršapačatkova Alaksieja padazravali pa art. 339 KK (Chulihanstva) — nibyta jon ździejśniŭ paškodžańni «Tabakierak» u horadzie, adnak u vyniku sprava nie była zaviedzienaja, bo nie było znojdziena dokazaŭ jaho dačynieńnia da hetaha.
Pamočnik prakurora Jaraševič zapytaŭ dla abvinavačanaha dva hady pazbaŭleńnia voli z adbyvańniem u kałonii ahulnaha režymu. Mieru strymańnia dziaržabvinavaŭca prasiŭ źmianić z padpiski ab niavyjeździe na ŭtrymańnie pad vartaj, a taksama prasiŭ spahnać pracesualnyja vydatki (košt ekśpiertyzy) na 531 rubiel.
Advakat Asipienki, u svaju čarhu, paprasiła sud uličyć mnostva stanoŭčych charaktarystyk Alaksieja, najaŭnaść u jaho dvuch maleńkich dziaciej (2018 i 2020 hoda naradžeńnia). Jana ličyć, što ŭ sudzie nie dakazana najaŭnaść u abvinavačanaha pramoha namieru (što nieabchodna dla kvalifikacyi spravy pa č. 1 art. 295-3 KK), jaje padabaronny nie ŭśviedamlaŭ, što pieravozić «kaktejl Mołatava». Advakat paprasiła sud vynieści apraŭdalny prysud. Ale kali sud usio ž taki paličyć Paviadajła vinavatym, to ŭ takim vypadku ŭličyć usie źmiakčalnyja abstaviny i pryznačyć minimalna mahčymaje pakarańnie ŭ vyhladzie štrafu.
U svaim apošnim słovie Alaksiej Paviadajła skazaŭ:
«Ja hodny hramadzianin Biełarusi, u mianie dźvie vyšejšyja adukacyi, u mianie kala 100 vučniaŭ, jakija za mianie pieražyvajuć, dobraja charaktarystyka z vojska (snajpier-raźviedčyk) — ja atrymaŭ zvańnie lejtenanta zapasu, i kamandziry prasili zastacca pa kantrakcie. Ja lublu siamju, lublu svaich dziaciej, i kali sud uhledzić maju vinu, to prašu nie pazbaŭlać voli».
Prysud budzie abvieščany čaćviortaha lutaha ŭ 10.00.
Kamientary