«Usio idzie da likvidacyi». Hrodzienski chośpis atrymaŭ novy sudovy pazoŭ: za vykarystańnie kalidora dziciačaj palikliniki
Hrodzienskaja prakuratura padała ŭ sud na dziciačy chośpis: arhanizacyja byccam by samavolna zaniała choł dziciačaj palikliniki, u jakoj arandavała pamiaškańnie. «Pa chole jość asobnaje pahadnieńnie ab supracoŭnictvie. Ramont zrabili za košt chośpisa, u chole pravodzili sustrečy dla baćkoŭ, inkluziŭnyja kinaprahlady», — kaža dyrektarka Hrodzienskaha dziciačaha chośpisa Volha Vialička. Listoŭ abo zapytaŭ ad palikliniki, akramia jak rachunkaŭ na pieradapłatu arendy i kamunałki za sakavik, chośpis za apošni miesiac nie atrymlivaŭ, piša Hrodna.life.
«Usio idzie da likvidacyi, — ličyć dyrektarka chośpisa Volha Vialička. — Nam prosta nie dajuć pracavać».
Dahavor arendy z hrodzienskaj dziciačaj paliklinikaj № 2 chośpis zaklučaŭ na try kabiniety. Pa chole jość asobnaje pahadnieńnie ab supracoŭnictvie. U im zapisana, što chośpis moža vykarystoŭvać heta pamiaškańnie dla svajoj dziejnaści, raspaviała Volha Vialička žurnalistam Hrodna.life. Ramont u kabinietach i chole zrabili za košt srodkaŭ chośpisa. U adnym z pamiaškańniaŭ byŭ siensarny pakoj, u chole pravodzili sustrečy dla baćkoŭ, majstar-kłasy, sustrečy z vałanciorami, inkluziŭnyja kinaprahlady i inšyja mierapryjemstvy.
«Choł i kalidor — heta zony prachodu da kabinietaŭ. Jany, jak i sanvuzieł, znachodziacca ŭ ahulnym karystańni, a nie «chośpis zavałodaŭ imi samavolna», — udakładniła Volha.
Ciapier choł i siensarny pakoj nie vykarystoŭvajucca. U arandavanych kabinietach pracuje buchhałteryja i śpiecyjalist pa suviaziach z hramadskaściu. Usiaho ŭ dziciačym chośpisie pracujuć 9 čałaviek. Śpiecyjalisty pravodziać indyvidualnyja zaniatki ź dziećmi ŭ Centry palijatyŭnaj dapamohi na Damiejka, pry pravasłaŭnaj carkvie.
Na chośpis u prakuraturu Hrodna paskardziłasia dziciačaja paliklinika № 2, u jakoj jon arandavaŭ pamiaškańni, paviedamiła pres-słužba prakuratury Hrodzienskaj vobłaści. Razhledzieŭšy zvarot, u prakuratury pryjšli da vysnovy, što ŭ traŭni 2020 hoda chośpis samavolna, biez dadatkovaha pahadnieńnia, zaniaŭ pamiaškańni ahulnaha karystańnia — viestybiul i kalidor palikliniki, u jakich arhanizavaŭ šviejnuju vytvorčaść. Amal čatyry miesiacy supracoŭniki chośpisa nie pracujuć u budynku dziciačaj palikliniki, raniej vykarystanyja pamiaškańni začynienyja, ale nie zdadzieny arendadaŭcu, udakładnili ŭ prakuratury.
Tam adznačyli, što paliklinika ŭ 2020 nie mahła arhanizavać asobny ŭvachod i dadatkovyja izalavanyja pamiaškańni i šluzy dla miedykaŭ, nieabchodnyja ŭ suviazi z COVID-19, biez vykarystańnia arandavanych chośpisam pamiaškańniaŭ. «Kiraŭnictva palikliniki nieadnarazova prapanoŭvała dyrektaru chośpisa vyzvalić samavolna zaniatyja płoščy, a taksama daterminova skasavać damovu arendy. Atrymać zhodu druhoha boku nie ŭdałosia», — paviedamili ŭ prakuratury. Prakuratura prapanavała kiraŭnictvu dziciačaha chośpisa ŭrehulavać sprečku ŭ dasudovym paradku i vyzvalić ŭsie pamiaškańni palikliniki. Atrymaŭšy admovu, prakuratura padała pazoŭ u ekanamičny sud Hrodzienskaj vobłaści.
Viasnoj 2020 hoda ŭ chole palikliniki vałanciory chośpisa na bazie majsterni dla ludziej ź invalidnaściu pačali šyć i biaspłatna pieradavać miedykam achoŭnyja kaściumy. Tady pandemija tolki pryjšła ŭ Biełaruś, i srodkaŭ abarony vielmi brakavała. U traŭni kiraŭnictva palikliniki paličyła, što vałanciory pavinny pakinuć hetaje pamiaškańnie. Pierajazdžać nie było kudy. Daviedaŭšysia pra prablemu, staršynia hrodzienskaha harvykankama Miečysłaŭ Hoj prapanavaŭ vałancioram pamiaškańnie kambinata školnaha charčavańnia (KŠCH) u Pyškach, jakoje nie vykarystoŭvałasia, na try miesiacy. Pytańnie z arendaj paabiacali vyrašyć za košt horada, dapamahčy z pošukam sponsaraŭ. Tam zrabili ramont, vałanciory pierajechali.
U vieraśni KŠCH źmianiŭ zamki na majsterni i prymusiŭ chośpis pakinuć pamiaškańnie. Paźniej kambinat skasavaŭ damovu arendy z chośpisam praz sud.
22 kastryčnika 2020 hoda ab skasavańni dahavora arendy paviedamiła i dziciačaja paliklinika. U toj ža dzień u chośpis z pravierkaj pryjšoŭ Departamient finansavych rasśledavańniaŭ. Pytańni da dabračynnaj arhanizacyi byli pa vypłacie padatkaŭ. Paśla ahladu kanfiskavali natatnik, buchhałtarskija dakumienty, sistemnyja błoki. Paźniej u chośpisa zabrali aparat štučnaj vientylacyi lohkich (ŠVŁ).
U śniežni 2020 hoda adnosna Volhi Vialička zaviali kryminalnuju spravu pa padazreńni ŭ złoŭžyvańni sponsarskaj dapamohaj. Da hetaha Volha ź dziećmi pakinuła Biełaruś, bo źjaviłasia infarmacyja, što dziaciej mohuć adabrać.
Ciapier u dačynieńni da dyrektarki hrodzienskaha dziciačaha chośpisa viadziecca kryminalnaja sprava pa č. 3 art. 210 Kryminalnaha kodeksa pa fakcie kradziažu majomaści hramadskaj arhanizacyi, paviedamili ŭ prakuratury.
Hramadskaja dabračynnaja arhanizacyja «Hrodzienski dziciačy chośpis» była zasnavana 19 vieraśnia 2008 hoda dla dapamohi ciažka i bieznadziejna chvorym dzieciam, jakija majuć množnyja parušeńni raźvićcia, i ich siemjam. Ciapier chośpis dapamahaje bolš jak 50 siemjam.
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary