Amierykanskaje ŭpraŭleńnie pa nahladzie za jakaściu charčovych praduktaŭ i miedykamientaŭ (FDA) uchvaliła preparat adukanumab dla baraćby z chvarobaj Alchiejmiera. Heta adbyłosia ŭpieršyniu za 20 hadoŭ.
Preparat, raspracavany kampanijaj Biogen, pastupić u prodaž pad kamiercyjnaj nazvaj Aduhelm, piša Bi-bi-si.
Preparat uździejničaje na hłybinnyja pryčyny, a nie na simptomy chvaroby Alchiejmiera, samaha raspaŭsiudžanaha vidu starečaj demiencyi.
Adukanumab razburaje amiłoid — białok, jaki farmiruje ŭ mozhu čałavieka zhustki, jakija paškodžvajuć kletki i vyklikajuć prablemy z pamiaćciu, myśleńniem i kamunikacyjaj.
Bolš za 30 miljonaŭ ludziej u śviecie, pieravažnaj bolšaści ź jakich bolš za 65 hadoŭ, jak miarkujecca, pakutujuć na chvarobu Alchiejmiera.
Adukanumab padychodzić pacyjentam maładziejšym za 80 hadoŭ i z pačatkovaj stadyjaj chvaroby. Spatrebicca taksama ŭstanavić dakładny dyjahnaz pry dapamozie detalovaha MRT-skanavańnia.
U apošnija 10 hadoŭ razhladalisia bolš za 100 srodkaŭ lačeńnia chvaroby Alchiejmiera, ale nivodny siabie nie apraŭdaŭ.
Adukanumab — nie panaceja, i niamała daktaroŭ vykazvajuć sumnieŭ u jaho vartaściach. Ale jaho rehistracyja ŭ ZŠA daść mocny šturšok daśledavańniam u halinie baraćby z demiencyjaj, jakija tradycyjna mienš finansujucca ŭ paraŭnańni z ankałohijaj abo kardyjałohijaj.
U sakaviku 2019 hoda mižnarodnyja vyprabavańni adukanumabu z udziełam troch tysiač čałaviek byli pierapynienyja na zaviaršalnaj stadyi, kali vyśvietliłasia, što preparat, jaki atrymlivajuć u vyhladzie štomiesiačnaj injekcyi, nie daje stanoŭčaha vyniku ŭ paraŭnańni z płaceba.
Adnak u kancy taho ž hoda amierykanski vytvorca Biogen praanalizavaŭ bolšy abjom danych i vyjaviŭ, što adukanumab istotna zapavolvaje pasłableńnie kahnityŭnych zdolnaściaŭ, kali ŭžyvajecca ŭ bolš vysokich dozach.
Kamientary