«Vybačajemsia, što začapili pačućci ruskich». Jak u Rasii ckujuć tych, chto nie ŭpisvajecca ŭ «tradycyjnyja kaštoŭnaści»
Dla biełaruskaha komika Idraka Mirzalizade žart pra ruskich nie skončyŭsia tolki 10 sutkami. MUS Rasii pryznała niepažadanym jaho znachodžańnie — jamu pažyćciova zabaranili ŭjezd u krainu. Heta nie pieršy vypadak, kali adepty tradycyjnych kaštoŭnaściaŭ abviaščajuć vajnu tym, chto na ich pasiahaje. Zhadali niadaŭnija hučnyja vypadki.
Sušy i ciemnaskury mužčyna
Dniami ŭ centry skandału apynułasia krasnajarskaja sietka dastaŭki sušy «JobiDojobi». Na ich novym rekłamnym fota — ciemnaskury mužčyna z rołami ŭ atačeńni troch dziaŭčat.
Sietku stali abvinavačvać u «prapahandzie multykulturalizmu» i dasyłać pahrozy. Asabliva aburyŭsia ruch «Mužčynskaja dziaržava», jaki prasoŭvaje idei patryjarchatu i nacyjanalizmu.
U vyniku kampanija vydaliła rekłamny post i vybačyłasia pierad nacyjaj, što «začapiła ruskich svaimi fatahrafijami».
Matryjarchalnaja siamja
U kancy červienia sietka kramaŭ «Vkuśviłł» apublikavała rekłamny artykuł «Recepty siamiejnaha ščaścia». Siarod hierojaŭ była ŁHBT-para žančyn — viehanki i aktyvistki, jakija adstojvajuć pravy čałavieka.
Paśla hetaha na kramu abrynułasia chvala chejtu — tysiačy niehatyŭnych kamientaroŭ. Krama spačatku tłumačyła, što tak jany chacieli pakazać raznastajnaść svaich klijentaŭ. Ale pad ciskam hramadskaha asudžeńnia prybrała artykuł i vybačyłasia.
«My škadujem, što tak atrymałasia, i ličym hetu publikacyju svajoj pamyłkaj, jakaja stała prajaŭleńniem nieprafiesijanalizmu asobnych supracoŭnikaŭ», — napisała kampanija.
Aŭtary rekłamy zvolnilisia.
Pahrozy pastupali i siamji, što źniałasia dla artykuła. U žniŭni jany vymušany byli emihravać z Rasii ŭ Ispaniju.
Žart pra Isusa
Letaś na niekalki miesiac z Rasii źjazdžaŭ komik Alaksandr Daŭhapołaŭ. Jon staŭ chvalavacca za svaju svabodu paśla taho, jak jaho vystupam zacikaviłasia palicyja. Žart pra toje, što Isusa łahična było b nazvać Bahdanam (to-bok «boham dadzieny»), nie spadabaŭsia žycharu Arecha-Zujeva — jon paličyŭ, što komik abraziŭ pačućci vierujučych, i napisaŭ na jaho skarhu. Palicyja prychodziła z pravierkaj u picierski kłub HopHead, dzie zapisvałasia šou, na jakim prahučaŭ hety žart, i źbirała źviestki pra Daŭhapołava.
Pa fiederalnym telebačańni paśla «prajšlisia» pa komiku, zajaviŭšy, što jon adpracoŭvaje rolu achviary pa pravieranych schiemach. «Papiaredniaje ampłua žartaŭnika zabytaje. Novy pinžačok ramantyčnaha zmahara za svabodu padhaniajecca pa plačach», — kpili prapahandysty.
Šlub z «niesłavianskim mužčynam»
U lipieni ŭ Zielenahradsku patanuŭ student ź Nihieryi Ryčard Ełujemunor, kali ratavaŭ nieznajomku. Jaho žonka Natalla apublikavała post pra śmierć muža — i pačałosia.
Udavu stali ckavać za adnosiny ź niesłavianskim mužčynam, pisać rasisckija i źnievažalnyja kamientary, nazyvać «čarnilnicaj». Znoŭ, darečy, z padačy ruchu «Mužčynskaja dziaržava».
Transhiendarnaja spartsmienka na Alimpijadzie
Na alimpijadzie ŭ Tokia vystupała navaziełandskaja ciažkaatletka Łareł Chabard. Jana transhiendarnaja žančyna. Rasijskaje dziaržTB nie ŭpuściła mahčymaści pakpić z hetaha. Tak, viadučy na «Pieršym kanale» apranuŭ paryk z koskami, paradzirujučy spartsmienku, i zajaŭlaŭ, što takija ludzi «psichapaty» i ich treba lačyć.
U efiry «Rasija 1» deputat Dziarždumy Alaksiej Žuraŭloŭ vykazaŭsia, što jany suprać «hetych vyčvarenstvaŭ i pošłaści».
Mižnarodny alimpijski kamitet patrabavaŭ tłumačeńniaŭ u telekanałaŭ z-za źniavahi ŁHBT-spartsmienaŭ.
Ciapier čytajuć
«Ja jechała ad vajny i bambiožak»: Jaŭhienija Čarniaŭskaja pra pierajezd na Kipr10
Kamientary