Palitźniavolenaha rok-muzyku Ihara Bancara z «chimii» pieravodziać u kałoniju
Rašeńnie ab pieravodzie pryniaŭ sud Čyhunačnaha rajona Viciebska 29 vieraśnia. Bancaru prysudzili 1 miesiac i 25 dzion kałonii ahulnaha režymu, piša Radyjo Svaboda.
Sud byŭ vyjazny, prachodziŭ u budynku papraŭčaj ustanovy adkrytaha typu numar 9 Viciebska, dzie Bancar adbyvaje pakarańnie z 17 červienia. Pasiedžańnie prachodziła faktyčna ŭ zakrytym režymie.
Spravu razhladaŭ sudździa Aleksijenka, prakuror — Kraŭcoŭ.
Sud vyrašyŭ źmianić jamu režym utrymańnia na bolš žorstki paśla niekalkich parušeńniaŭ, jakija byli ŭ Bancara na «chimii», prykładam, što jon byŭ niepaholeny abo spaźniŭsia na niekalki chvilin na adboj.
Bancara ŭziali pad vartu adrazu paśla abviaščeńnia rašeńnia. Pieršy čas jon praviadzie ŭ SIZA Viciebska, potym jaho nakirujuć u kałoniju.
Bancar mieŭsia b vyjści na volu ŭ lutym 2022 hoda, kali b zastavaŭsia na «chimii». Bancar admoviŭsia pisać prašeńnie ab pamiłavańni, kab «nie zdradzić samomu sabie». Jon padkreślivaŭ, što nieadnarazova mieŭ mahčymaść vyjechać z krainy, kali jaho papiaredžvali, što jaho pasadziać, adnak abraŭ zastacca na radzimie.
Za apošni hod jon dvojčy doŭha haładaŭ. Pieršy raz u sakaviku, kali siadzieŭ u hrodzienskaj turmie padčas sudu, 16 dzion bieź ježy i vady. Druhi raz 19 dzion «na chałodnaj turemnaj vadzie z-pad krana», kali siadzieŭ u štrafnym izalatary na «chimii». Jon mocna padarvaŭ zdaroŭje, u jaho kiepska pracuje straŭnik, jon značna sasłabieŭ fizična, chacia hod tamu byŭ u dobraj spartyŭnaj formie.
Muzykant adznačyŭ, što treciuju haładoŭku ŭ turmie jon užo nie pieražyvie, adnak nie moža harantavać, što jaje nie budzie.
«Ja nie płanuju haładavać u treci raz, jak ja nie płanavaŭ i papiarednija haładoŭki. Adnak kali treba adstojvać svaje pravy, abaraniać svaju hodnaść, heta faktyčna adziny sposab. Jašče možna «ŭskryvacca» (rezać vieny. — RS), ale ja suprać suicydaŭ», — zaznačyŭ rok-muzykant.
«Ja pryjechała ŭ 4:50 i była ŭ čarzie 77-ja». Jak ryełtarka nabyvała dla siabroŭki kvateru ŭ elitnym ŽK Minska9
Kamientary