Za hod — 22 spravy. Što viadoma pra maładoha prakurora Ćviatkova, jaki robić karjeru na palityčnych sudach
Amaładžeńnie kadraŭ — napeŭna, tak čynoŭnickaj movaj možna apisać toje, što my bačym na palityčnych sudach. Dziaržaŭnymi abvinavaŭkami stanoviacca niadaŭnija vypuskniki. Adzin ź ich — 24-hadovy Arciom Ćviatkoŭ, pamočnik prakurora Centralnaha rajona Minska. «Naša Niva» raskazvaje pra jaho imklivuju karjeru.
Vučyŭsia ŭ Akademii kiravańnia, chadziŭ u navukovy kłub
Ćviatkoŭ vučyŭsia ŭ Akademii kiravańnia na śpiecyjalnaści «dziaržaŭnaje kiravańnie i prava». Studentam udzielničaŭ u roznych intelektualnych hulniach. Na druhim kursie, naprykład, staŭ lepšym znatakom univiersiteckaha brejn-rynhu. Arciom byŭ u składzie studenckaha navukovaha kłuba «Corpus Delicti». Što cikava, razam ź im u tym kłubie byŭ ciapierašni sudździa Dźmitryj Karsiuk.
Karsiuk na dva hady starejšy. Paśla vučoby ŭ akademii jon zastaŭsia ŭ mahistratury. Sudździoj jaho pryznačyli ŭ kastryčniku 2020 hoda. Hety hod jon adpracavaŭ udarna. Paśpieŭ vypisać 2350 sutak administracyjnaha aryštu, amal 53 tysiačy rubloŭ štrafaŭ i vynieści abvinavaŭčyja prysudy pa 23 palityčnych spravach (pa dadzienych placoŭki «Zubr»).
Ličyć prakuraturu dobraj škołaj dla asabistaha rostu
Arciom u orhany pryjšoŭ niadaŭna. U lutym razam ź inšymi maładymi prakurorami prynosiŭ prysiahu ŭ Muziei VAV.
«Tut samaja dobraja škoła dla asabistaha rostu ź jurydyčnaha boku, u roznych śfierach (u nas prakuratara ažyćciaŭlaje nahlad za ŭsimi śfierami), u suviazi z hetym vialikaje raźvićcio, vialiki vopyt», — kamientavaŭ jon dziaržTB vybar miesca pracy.
Abvinavaŭcam na palityčnych pracesach jon staŭ vystupać jašče ź listapada minułaha hoda. Pieršaja jaho viadomaja sprava była źviazana z patasoŭkaj z amapaŭcami 14 lipienia 2020-ha.
Zatrymanym chłopcam — Antonu Łakišyku i Uładzisłavu Uścinu — pa prośbie maładoha prakurora dali 3 hady kałonii i 3 hady chimii.
Pamiatajecie mužčynu, jaki ŭ dzień vybaraŭ zaskočyŭ na kabinu aŭtazaka, a paśla patrapiŭ pad koły? Jaho abvinavaŭcam staŭ jakraz Ćviatkoŭ. Mužčynu prysudzili dva hady kałonii.
Na sudach pracuje ŭ pary z univiersiteckim znajomym
Za hod Ćviatkoŭ pravioŭ 22 palityčnyja spravy. Amal pałovu ź ich u sudzie razhladaŭ Dźmitryj Karsiuk — ich abodvuch zaniesła ŭ Centralny rajon. Tak univiersiteckija adnakłubniki praciahnuli supracu pa-za miežami alma-mater.
Heta para, naprykład, asudziła da dvuch hadoŭ chatniaj chimii minčuka, jaki abraziŭ byłuju pres-sakratarku MUS Volhu Čamadanavu.
Ćviatkoŭ na pracesie začytaŭ, što mužčyna pakinuŭ kamientar pad publikacyjaj, «kirujučysia nizinnymi namierami, jakija vykazalisia ŭ žadańni pradstavić Čamadanavu ŭ źnievažalnym stanoviščy ŭ vačach šyrokaj hramadskaści, adpomścić za aśviatleńnie ŭ ŚMI i hłabalnaj sietcy internet pytańniaŭ, jakija adnosiacca da kampietencyi MUS».
Za kamientar da vystupu Łukašenki na Usiebiełaruskim narodnym schodzie prakuror zaprasiŭ dla słuččaka dva hady chimii.
«Pryčyniŭ prezidentu maralnyja pakuty i padarvaŭ jaho dziełavuju reputacyju», — arhumientavaŭ jon u sudzie.
Karsiuk kalehu padtrymaŭ i daŭ roŭna stolki, kolki prasiła abvinavačańnie.
Spravu za adnaŭleńnie hrafici «dydžejam pieramien» taksama razhladała heta para. Dvaich susiedziaŭ, jakija adnaŭlali malunak na transfarmatarnaj budcy, sudzili jak za złosnaje chulihanstva.
Ćviatkoŭ nastojvaŭ, što abvinavačanyja dziejničali «pa matyvach palityčnaj i ideałahičnaj varožaści z chulihanskich mierkavańniaŭ, spałučanych z hrubym parušeńniem paradku i vidavočnaj niepavahaj da hramadzian». Vynik — pa dva hady chimii, chatniaj i z nakiravańniem.
Apošniaj hučnaj spravaj maładoha prakurora staŭ sud nad eks-śledčym Jahoram Viaršyninym.
Za ŭdzieł u dvuch žnivieńskich maršach dla palitviaźnia zaprasili dva hady kałonii. Hałoŭnym dokazam stali fatahrafii z zakrytaj staronki ŭ fejsbuku.
A ŭ jakaści śviedki vyklikali inšaha byłoha śledčaha, Jaŭhiena Juškieviča — pryvieźli z Vaładarki ŭ kajdankach. Sudździa Karsiuk udaram małatka adpraviŭ Viaršynina na dva hady ŭ kałoniju, jak i chacieŭ jaho ŭniviersitecki znajomy.
Čytajcie taksama:
Daloka pojdzie. Raskazvajem pra maładuju ambicyjnuju prakurorku, jakaja stavić rekordy pa palityčnych spravach
U Biełaruskaj pravasłaŭnaj carkvie abnavili ceńnik? Voś jakija buduć rekamiendavanyja taryfy7
Kamientary