Prafiesar BDU zapisała zvarot u abaronu zvolnienaha kalehi, zaklikaje admaŭlacca ad pracy na miescy zvolnienych

Prafiesarka kafiedry vyšejšaj matematyki BDU, doktarka fizika-matematyčnych navuk Natalla Abrašyna-Žadajeva zapisała zvarot u abaronu svajho zvolnienaha kalehi Maksima Šundałava.

«My žyli tut i budziem žyć. I chočam, kab była źmianialnaść ułady, a nie pierapisvańnie Kanstytucyi pa žadańni «adnaho». Kolki našych hramadzian uciakło z krainy, kolki siahońnia zvalniajuć, kab dahadzić «adnamu».

Siońnia vy pramaŭčali, a zaŭtra z vami hetak ža raźličacca. Tak užo było ŭ historyi. Kožny sam vybiraje: słužyć ci prysłuhoŭvać. Jak kažuć: słužyć Bohu ci prysłuhoŭvać Judu!» — kaža prafiesar Abrašyna-Žadajeva.

Jana zaklikaje ŭsich padtrymlivać zvolnienych i admaŭlacca zajmać ich pracoŭnyja miescy.

71-hadovaja Natalla Abrašyna-Žadajeva pracuje ŭ navucy z 1972 hoda. Jana vieteran pracy, sioleta spaŭniajecca 50 hadoŭ jaje pracoŭnaha stažu.

Svaju doktarskuju dysiertacyju «Šmatkampanientnyja viektarnyja schiemy rasščapleńnia ŭ mietadach matematyčnaj fiziki» jana abaraniła ŭ Rasii. 17 hadoŭ (2003—2020) zahadvała kafiedraj vyšejšaj matematyki i matematyčnaj fiziki Biełdziaržuniviersiteta.

Čytajcie taksama: «Nie chaču pierahortvać staronku, prosta kab prakarmicca». Maksimalna ščyraje intervju zvolnienaha reanimatołaha Martava

Pavodle infarmacyi «Našaj Nivy», usiaho ŭ krainie ŭ śpisach na zvalnieńnie pa palityčnych matyvach — kala 40 tysiač čałaviek.

Na hety momant u roznych halinach pramysłovaści, u śfiery transpartu, ustanovach kultury i adukacyi zvalniajuć ludziej, jakija stavili podpisy za alternatyŭnych kandydataŭ u prezidenty. Zakony krainy zabaraniajuć pieraśled pa palityčnych prykmietach, tamu z časam zvolnienyja, imavierna, zmohuć raźličvać na kampiensacyju ad dziaržavy.

Čytajcie taksama: «Zapomniła jaho jak anioła-achoŭnika». Historyi dzietak, jakich vyratavaŭ doktar Vituška. Ciapier jaho zvalniajuć z RNPC «Maci i dzicia»

Siarod zvolnienych pa palityčnych matyvach — zorki miedycyny Andrej Vituška, Uładzimir Martaŭ, hałoŭny doktar 3-j dziciačaj balnicy Maksim Ačaretni, jaki admoviŭsia zvalniać miedykaŭ za palityku, kiraŭniki Teatra junaha hledača Uładzimir Savicki i Teatra biełaruskaj dramaturhii Alaksandr Harcujeŭ, dyrektarka muzieja Janki Kupały Alena Laškovič, jakaja taksama admoviłasia zvalniać svaich supracoŭnikaŭ. Taksama viadoma pra zvalnieńnie prafiesara słavianskaj fiłałohii BDU Ały Kožynavaj.

U asobnych strukturach Biełaruskaj čyhunki ŭtvarylisia kadravyja pustki. Tak, «Naša Niva» zaŭvažyła na veb-staroncy Bresckaha adździaleńnia čyhunki prabieły zamiest ludziej na pasadach pieršaha namieśnika načalnika adździaleńnia i jašče troch namieśnikaŭ načalnika.

«Źniknieńnie» źviazvajuć z tym, što jany admovilisia zvalniać supracoŭnikaŭ pa palityčnych matyvach paśla taho, jak na pradpryjemstva pad hryfam «dla słužbovaha karystańnia» dasłali śpisy ludziej na zvalnieńnie.

Čytajcie taksama: «Nichto nie kazaŭ, što nazad nielha brać». Kiraŭniki raskazvajuć, jak vykručvajucca padčas zvalnieńniaŭ za palityku

• 0
• 0
• 0
• 0
• 0
• 0