Daradca mera Maryupala: Situacyja ŭ horadzie katastrafičnaja, kolkaść achviar rasijskich abstrełaŭ moža być da 20 tysiač
Piatro Andruščanka ŭ efiry «Nastojaŝieho vriemieni» raspavioŭ pra situacyju ŭ horadzie, jaki niaspynna bambiać rasijanie i kudy nie puskajuć humanitarnuju dapamohu.
«Što tyčycca zahinułych žycharoŭ, u nas jość źviestki, jakija nie adpaviadajuć rečaisnaści, bo jany atrymanyja ad palicyi, uzhodnienyja ź miedustanovami. Heta małaja častka ludziej, pra jakich my viedajem. Pa stanie na ŭčora heta było 1800 ź nievialikim čałaviek.
Jašče čatyry dni tamu my kazali pra «aptymistyčny» scenaryj — kala 10 tysiač achviar na siońnia. Ale z pavialičanaj intensiŭnaściu i toj žorstkaściu, jakaja vyrasła ŭ razy, my možam kazać pra toje, što, kali ciapier skončycca błakada i my zmožam pačać chacia b pošuk hetych ludziej, to ŭžo ciapier kolkaść achviar nabližajecca da 20 tysiač.
Ale kali hetaha nie adbudziecca najbližejšymi dniami, to hetaja kolkaść nablizicca da 35 tysiač — usie tyja, chto nie zmoh vyjechać. Chavajuć chto dzie, kahości — u dvarach, na vulicach. Praź intensiŭnaść abstrełu ludzi nie mohuć vyjści na vulicu navat pachavać blizkich. Municypalnyja słužby nie pracujuć, mohiłki — na terytoryi, jakaja kantralujecca rasijskaj armijaj. Śmierć — jana paŭsiul, jaje vidać».
Pa słovach Andruščanki, u horadzie niama ježy, vady, śviatła i ciapła. 80% žyłoha fondu nieprydatnyja dla žyćcia, i ź jaho jašče 80% niemahčyma budzie adnavić.
«U Maryupala asablivaja rola była apošnija vosiem hadoŭ — heta apošni vialiki horad u Danieckaj vobłaści, jaki nie pryniaŭ hetyja bananavyja respubliki i rasijskuju akupacyju. I vosiem hadoŭ demanstravaŭ, što taki horad na linii raźmiežavańnia — za 10 km ad linii frontu — jak jon moža adradzicca i stać jeŭrapiejskim horadam. I ciapier chočuć pakazać, što budzie, kali chtości nie prymie «ruski mir» i jaho ŭmovy».
Ci možna ŭ Biełarusi zabicca, zvaliŭšysia ŭ padziemny pierachod?1
Kamientary