Viečaram 26 sakavika na sajcie Ministerstva abarony Azierbajdžanskaj Respubliki źjaviłasia zajava. U joj Ministerstva abarony Azierbajdžana vykazała «škadavańnie ŭ suviazi z adnabakovaj i dalokaj ad rečaisnaści zajavaj Ministerstva abarony Rasijskaj Fiederacyi ad 26 sakavika 2022 hoda».
Pavodle viersii Minabarony Azierbajdžana, «ranicaj 26 sakavika členy niezakonnych armianskich uzbrojenych farmiravańniaŭ raspačali sprobu ŭčynić dyviersiju suprać padraździaleńniaŭ azierbajdžanskaha vojska. U vyniku nieadkładnych mier členy niezakonnych armianskich uzbrojenych farmavańniaŭ byli zmušanyja adstupić».
Ministerstva abarony zajaŭlaje, što «Azierbajdžan addany trochbakovaj zajavie ad 10 listapada 2020 hoda i nie parušaŭ jaje pałažeńniaŭ».
Minabarony Azierbajdžana «sa škadavańniem» adznačyła, što «da hetaha času nie vykanany poŭny vyvad reštkaŭ armianskaj armii i niezakonnych armianskich uzbrojenych farmiravańniaŭ z terytoryi Azierbajdžana. Parušaje pałažeńni zajavy Armienija, a nie Azierbajdžan».
«Na terytoryi Azierbajdžana niama administracyjna-terytaryjalnaj adzinki pad nazvaj «Nahorny Karabach». Nazva siała, jakoje zhadvajecca ŭ zajavie, nie Furuch, a Faruch», ‒ havorycca ŭ zajavie.
Ministerstva abarony Azierbajdžanskaj Respubliki zaklikała Ministerstva abarony Rasijskaj Fiederacyi
«zabiaśpiečyć poŭny vyvad reštkaŭ armianskaj armii i niezakonnych armianskich uzbrojenych farmiravańniaŭ z pryznanych mižnarodnaj supolnaściu terytoryj Azierbajdžana, nie pradstaŭlać u skažonaj formie pieramiaščeńnie ŭzbrojenych sił Azierbajdžana, nie vykarystoŭvać vyraz «Nahorny Karabach» i pravilna ŭkazvać nazvu terytoryj Azierbajdžana».
Minabarony Rasii 26 sakavika zajaviła, što ŭzbrojenyja siły Azierbajdžana zajšli ŭ zonu adkaznaści rasijskich miratvorcaŭ na terytoryi Nahornaha Karabacha. Pierad hetym Rada biaśpieki niepryznanaha Nahornaha Karabacha paprasiła Uładzimira Pucina pavialičyć kolkaść miratvorcaŭ i vajennaj techniki z nahody abvastreńnia situacyi ŭ rehijonie.
25 sakavika Pucin abmierkavaŭ z premjer-ministram Armienii Nikołam Pašynianam situacyju ŭ Nahornym Karabachu. Pašynian nazvaŭ situacyju napružanaj.
Kamientary