Sakavik źjeŭ 21% valutnaj častki reziervaŭ. U Nacbanka zastałosia ŭsiaho 2,8 młrd dalaraŭ «žyvych» hrošaj
I heta nie vyklikaje aptymizmu, piša aŭtar ekanamičnaha telehram-kanała «Našy hrošy».
Stresy i šoki ŭ sakaviku kaštavali zołatavalutnym reziervam Biełarusi $692,9 młn. Źnižeńnie skłała 8,4 pracenta. Za miesiac da taho ZVR, darečy, taksama źnižalisia. Tady reziervy palahčeli na $ 259,1 młn ci na 3 pracenty. U vyniku na 1 krasavika 2022 hoda ich ahulny abjom skłaŭ $ 7,57 młrd.
Źnižeńnie zołatavalutnych reziervaŭ istotna źmianiła ich strukturu. Asnoŭnyja straty ZVR panieśli ŭ častcy zamiežnaj valuty, jaje dola źniziłasia z 43 da 37 adsotkaŭ. Na hetym fonie dola zołata ŭzrasła z 40 da 44 adsotkaŭ.
U pieraliku na dalar ZŠA i z ulikam rostu cany kaštoŭnaha mietału, zołata ŭ składzie reziervaŭ skłała $3,34 młrd, a zamiežnaj valuty zastałosia ŭsiaho $2,8 młrd. Jašče $1,4 młrd — heta śpiecyjalnyja pravy zapazyčańnia (SDR), valuta MVF. Karystacca joj faktyčna nielha z pryčyny sankcyj Jeŭrasajuza i ZŠA, uviedzienych u adkaz na masavyja represii ŭ Biełarusi.
Dola inšych aktyvaŭ u składzie reziervaŭ vielmi nizkaja. Straty ZVR na praciahu sakavika ŭ častcy zamiežnaj valuty skłali $730 młn, abo 21 pracent. $100 młn syšło na viartańnie daŭhoŭ, astatniaje — prodaž valuty dla padtrymki kursu rubla i pieravod častki ZVR u inšyja vidy aktyvaŭ (naprykład, kanviersija ŭ rasijski rubiel ci inšuju valutu, jakaja nie ŭvachodzić u śpis reziervovych valut MVF).
Vidavočna, druhoje — heta sproba abaranić chacia b častku hrošaj ad sankcyj. Nacbank płanuje pa vynikach biahučaha hoda zachavańnie ZVR na ŭzroŭni nie mienš jak $7 młrd i pakul znachodzicca vyšej praviedzienaj čyrvonaj linii.
Nie vyklikaje aptymizmu i toj fakt, što «žyvych» hrošaj u składzie reziervaŭ zastajecca ŭsio mienš. Zołata i SDR MVF majuć chutčej fundamientalny sens, čym praktyčny, tamu što nie mohuć apieratyŭna vykarystoŭvacca dla padtrymki rubla abo vypłaty daŭhoŭ.
Urad užo abviaściŭ aficyjna, što niekatoryja kredytory ź liku «varožych» atrymajuć svaje hrošy nazad tolki ŭ biełaruskich rublach. Cikava, ci čakaje padobny los biełarusaŭ, jakija mnohija hady davali dziaržavie valutu ŭ doŭh, układajučysia ŭ ablihacyi minfina?
Cichanoŭskaja: Pierapryznačeńnie Łukašenki nie maje nijakaha ŭpłyvu na maju dalejšuju pracu19
Kamientary