Junyja, biednyja, miortvyja. Žurnalisty skłali partrety zabitych rasijskich vajskoŭcaŭ

Vajna Rasii suprać Ukrainy idzie ŭžo treci miesiac. Za hety čas rasijskaje Ministerstva abarony adčytałasia ab stratach svaich vajskoŭcaŭ tolki dvojčy. Apošni raz — 25 sakavika, bolš za miesiac tamu Hienštab paviedamiŭ pra 1351 zahinuŭšaha. Z taho času ad aficyjnaj Maskvy ni słova ab stratach. Pry hetym Vialikabrytanija paviedamlaje ŭžo pra 15 tysiač zahinuŭšych rasijskich sałdat. A pa danych ukrainskaha boku na 30 krasavika, Rasija straciła ŭžo bolš za 23 tysiačy vajskoŭcaŭ.

«Važnyja historyi» skłali svoj śpis, vyvučyŭšy paviedamleńni ŭ telehram-kanale «Horiuško», jaki źbiraje publikacyi pra zahinuŭšych vajennych. Žurnalisty ŭstanavili miescy žycharstva i daty naradžeńnia sałdat. Na momant publikacyi jany paćvierdzili hibiel 1855 čałaviek. Raskazvajem, što pra ich viadoma.

8 z 10 zahinuŭšych byli maładziejšyja za 35 hadoŭ

Za dva miesiacy vajny pra hibiel sałdat paviedamlali ŭsie rehijony Rasii, akramia Jamała-Nienieckaj aŭtanomnaj akruhi. Pry hetym zahinuŭšyja raźmierkavanyja pa rehijonach nieraŭnamierna. Naprykład, z Maskvy, dzie žyvie 9% nasielnictva Rasii, u śpisie «Važnych historyj» usiaho try čałavieki. A ŭ Buracii, dzie žyvie kala miljona čałaviek, ci mienš za 1% rasijan, paćvierdžany ŭžo minimum 91 zahinuŭšy.

Kali suadnieści hetyja straty z kolkaściu mužčynskaha nasielnictva ŭ rehijonach va ŭzroście ad 18 da 45 hadoŭ, to antylidarami stanuć Buratyja, Tuva, Paŭnočnaja Asiecija, Kastramskaja vobłaść i respublika Ałtaj.

Z-za vajny śmiarotnaść maładych ludziej u Rasii ŭžo vyrasła bolš jak na čverć. 

U mirny čas za dva miesiacy ŭ siarednim pamirała 3,4 tysiačy mužčyn va ŭzroście ad 18 da 30 hadoŭ, a za dva miesiacy bajavych dziejańniaŭ zahinuli jašče jak minimum 903 čałavieki taho ž uzrostu. I heta tolki tyja, čyju hibiel udałosia paćvierdzić i ŭstanavić hod naradžeńnia. U realnaści zahinuŭšych moža być značna bolš: pra śmierć sałdat nie zaŭsiody paviedamlajuć navat rehijanalnyja ŭłady, a pra niekatoryja vypadki stanovicca viadoma tolki pa paviedamleńniach rodnych u sacsietkach.

U tych rehijonach, adkul pachodzić najbolš zahinuŭšych, śmiarotnaść maładych mužčyn užo vyrasła ŭ razy. Naprykład, u Buracii paćvierdžanaja hibiel 91 vajennaha, uzrost udałosia ŭstanavić dla 87 ź ich. 54 sałdaty byli maładziejšyja za 30 hadoŭ. Heta pavialičyła kolkaść śmierciaŭ dla mužčyn da 30 hadoŭ u respublicy na 165 pracentaŭ.

Armija — adziny stabilny pracadaŭca ŭ rehijonach

Bolšaść vajskoŭcaŭ, jakija zahinuli na vajnie va Ukrainie, žyli ŭ nievialikich nasielenych punktach. Amal dźvie traciny pamierłych byli rodam z maleńkich rehijanalnych haradoŭ i viosak. Uzrovień žyćcia tam značna nižejšy, čym u siarednim pa Rasii. Naprykład, uzrovień biespracoŭja ŭ Buracii, Tyvie, Paŭnočnaj Asiecii i Dahiestanie składaje ad 10 da 15% — heta ŭ 2-3 razy vyšej za siaredni rasijski ŭzrovień.

U maleńkich nasielenych punktach, adkul čaściej za ŭsio byli zahinuŭšyja rasijskija sałdaty, časta niama navat bazavych vyhod. 

Naprykład, u siołach i vioskach Tyvy tolki 3% ad usich žyłych pamiaškańniaŭ abstalavanyja adnačasova vadapravodam, kanalizacyjaj, aciapleńniem, haračym vodazabieśpiačeńniem i hazam.

Pa apoviedach ukraincaŭ, jakich rasijskija vajskoŭcy trymali ŭ pałonie ŭ padvałach Čarnihaŭskaj vobłaści, rasijanie nie razumieli, adkul u siołach jość asfaltavanyja darohi, śviatło i čamu lažyć plitka ŭ dvarach. Z saboj rasijanie vynosili z ukrainskich damoŭ televizary, pralnyja mašyny, noŭtbuki i chaładzilniki. U tych rehijonach, adkul pachodzić bolš za ŭsio zabitych, nie kožny moža dazvolić sabie bytavuju techniku — tych ža televizaraŭ i pralnych mašyn u hetych abłaściach mienš, čym u siarednim pa Rasi.

«U nas prestyž vajskovaj słužby vielmi nizki i tudy časta iduć ad biezvychodnaści: vakoł biednaść, adsutnaść pierśpiektyŭ, adsutnaść mahčymaści rabić karjeru, zabiaśpiečvać siabie, karmić siamju, — raspaviała «Važnym historyjam» navukovaja pracaŭnica fondu «Svabodnaja Buracija» Maryja Ujuškova. — I pry hetym tam [u rehijonach ź vialikaj kolkaściu zahinuŭšych] situacyja takaja, što vojska — heta adzin z najbujniejšych pracadaŭcaŭ, jakomu ŭvieś čas patrebnyja ludzi. I heta mahčymaść atrymlivać niadrenny pa mierkach rehijona zarobak».

• 5
• 0
• 3
• 69
• 0
• 16
• 1
• 0