Ź Litvy zabaraniałasia vyvozić u Biełaruś najaŭnymi bolš za 60 jeŭra. Ale rašeńnie chutka pamianiali
Litva ŭ sakaviku zabaraniła vyvozić u Biełaruś bolš za 60 jeŭra najaŭnymi. Paśla hetaha mytniki susiedniaj krainy stali praviarać, ci nie pieravyšajuć padarožniki hety limit. Adnak ciapier stała viadoma, što pa abmiežavańniach uviali pasłableńni: limit moža być pieravyšany, kali čałaviek uvozić u Biełaruś jeŭra dla asabistych patreb. Hetuju infarmacyju žurnalistu Zerkalo.io jak fizičnaj asobie paćvierdzili ŭ mytnaj słužbie Litvy.
Zdymak ilustracyjny. Fota: delfi.lt
18 sakavika stała viadoma, što Litva ŭviała abmiežavańni ŭ 60 jeŭra na vyvaz najaŭnych jeŭra ŭ Biełaruś i Rasiju. Jak paviedamlałasia, hetyja limity tyčacca ŭ tym liku hatoŭki dla asabistych patreb.
«Kolkaść najaŭnych hrošaj u inšaj valucie nie abmiežavanaja», — tłumačyli ŭ mytni.
Udakładniałasia, što abmiežavańni nie tyčacca dyppradstaŭnictvaŭ i mižnarodnych arhanizacyj u Biełarusi ci Rasii, jakija karystajucca imunitetam u adpaviednaści ź mižnarodnym pravam.
Adnak 25 sakavika na sajcie mytnaj słužby Litvy źjaviłasia ŭdakładnieńnie, što pad abmiežavańnie ŭ 60 jeŭra taksama nie traplajuć najaŭnyja dla asabistaha karystańnia fizičnych asobaŭ, jakija jeduć u Biełaruś ci Rasiju. Hetyja abmiežavańni taksama nie raspaŭsiudžvajucca na najbližejšych svajakoŭ, jakija padarožničajuć ź imi.
«Litaralna praz tydzień paśla 18 sakavika ŭsio pierajhrali», — udakładniaje padarožnik u adnoj z hrup u Fejsbuku, u jakoj abmiarkoŭvajuć pajezdki ź Biełarusi ŭ Litvu i nazad.
«Limit 60 jeŭra jak taki admienieny, fizičnyja asoby mohuć pravozić najaŭnyja jeŭra dla ŭłasnych patreb, ale pry ŭźniknieńni pytańniaŭ treba mieć abhruntavańnie, dla čaho jany vam, — piša jašče adzin udzielnik hrupy. — Miežy razumnaj nieabchodnaści budzie vyznačać mytnik, ale heta dakładna značna bolš za 60 jeŭra».
Žurnalist Zerkalo.io jak fizasoba patelefanavaŭ u mytnuju słužbu Litvy, dzie paćvierdzili, što dla asabistaha karystańnia padarožniki mohuć vyvozić z krainy ŭ Biełaruś bolš, čym 60 jeŭra. Pry hetym skazać, jakuju maksimalnuju sumu možna pravozić, u viedamstvie nie zmahli.
Śpiecyjalist udakładniŭ, što na miažy pa patrabavańni mytnych słužbaŭ pry nieabchodnaści treba paćvierdzić, što najaŭnyja ŭvoziacca dla asabistych patreb.
Na ŭdakładniajučaje pytańnie, ci možna pravieźci ŭ Biełaruś, da prykładu, 1500 jeŭra, kab pieradać ich svajakam, u mytnaj słužbie nie zmahli adkazać, ale ŭdakładnili, što rašeńnie pa kožnaj kankretnaj situacyi mytniki buduć prymać indyvidualna pry pierasiačeńni miažy.
Kamientary