Były amapaviec Kułažanka pakinuŭ Połk Kalinoŭskaha paśla taho, jak jaho «pavučyli»
Jak stała viadoma «Našaj Nivie», Połk imia Kastusia Kalinoŭskaha pakinuŭ nieadnaznačny błohier Pavieł Kułažanka — były bajec AMAP, jaki pierajechaŭ u ZŠA, a paśla adpraviŭsia na vajnu va Ukrainu. Apošnija tydni jaho znachodžańnia ŭ Pałku adznačylisia kanfliktami.
Pavieł Kułažanka dałučyŭsia da biełaruskaha dobraachvotnickaha pałka Kalinoŭskaha — tady jašče bataljona — u sakaviku. Jak čałaviek z dośviedam pracy ŭ siłavoj struktury, jon byŭ pryznačany kamandziram roty, ale, jak skazali «Našaj Nivie» dva roznyja bajcy, prabyŭ na hetaj pasadzie vielmi karotki čas i mała čym adznačyŭsia. «Jon chacieŭ być hałoŭnym pa palityčnaj častcy, a voś vajavać nie chacieŭ — miakka kažučy, nie imknuŭsia «na pieradok» i ni razu tam nie byŭ», — raskazali «Našaj Nivie» kalinoŭcy.
Heta vyklikała razdražnieńnie kamandavańnia i tavaryšaŭ. Jak minimum dva razy ŭ Kułažanki byli istotnyja kanflikty z kiraŭnikami bataljonaŭ.
«Niezadoŭha da taho jak Kułažanka pakinuŭ połk, «Varah» — kamandzir bataljona «Teror» — vybiŭ dźviery ŭ pakoj Kułažanki i pavučyŭ jaho žyćciu», — skazaŭ «Našaj Nivie» adzin z bajcoŭ.
«Kułažanka kazaŭ, što biełarusam niama čaho rabić na poŭdni Ukrainy, i vystupaŭ za toje, kab źniacca z pazicyj i jechać prabivać kalidor u Biełaruś. U vajenny čas vy razumiejecie, jak takija prapanovy treba traktavać. Jak minimum, heta deziercirstva, jak maksimum — padbuchtorvańnie da kalektyŭnaha samahubstva ź niepradkazalnymi nastupstvami. Sukupnaść faktaraŭ pryviali da taho, što jon staŭ niepatrebnym», — skazaŭ jašče adzin bajec.
Sam Kułažanka vydaliŭ akaŭnt u Telehramie.
Znajomyja ź im kažuć, što jon, imavierna, užo pakinuŭ terytoryju Ukrainy i viarnuŭsia ŭ ZŠA.
Połk Kalinoŭskaha — samaje šmatlikaje ź biełaruskich dobraachvotnickich farmavańniaŭ u składzie ŭkrainskaj armii, jakija ŭtvarylisia paśla napadu Rasii na Ukrainu. Ën vyras vakoł idejnych biełarusaŭ-dobraachvotnikaŭ, jakija vajavali za niezaležnaść Ukrainy z 2014 hoda. Połk «Pahonia», u asnovie jakoha — byłyja bajcy biełaruskich Siłaŭ śpiecyjalnych apieracyj — pakul nie taki šmatliki.
Mnohija bajcy Kalinoŭskaha i «Pahoni» adkryta kažuć, što ich mara — paśla vyzvaleńnia akupavanych ukrainskich terytoryj vyzvalić i Biełaruś. Adnak taki hipatetyčny scenaryj niemahčymy biez dapamohi Ukrainy i / ci Polščy, što mnohim padajecca małavierahodnym.
Aŭtarytetnaha byłoha kamandzira desantnaj bryhady z Bresta Valeryja Sachaščyka źviazvajuć z «Pahoniaj». Śviatłana Cichanoŭskaja pryznačyła jaho svaim pradstaŭnikom pa pytańniach biaśpieki i abarony.
Nielha vyklučać, što ŭsie biełaruskija farmavańni z časam abjadnajucca pad adnym kamandavańniem.
«Heta narmalna, što vypadkovyja ludzi adsiejvajucca. I navat niepaźbiežna. U lutym-sakaviku ŭ biełaruskija farmavańni pryjšli ludzi roznaha rodu. Kaściak razumieje, što ŭ armii i tym bolš na vajnie nielha biez dyscypliny i subardynacyi», — skazaŭ «Našaj Nivie» adzin z kalinoŭcaŭ.
«Naša Niva» — bastyjon biełaruščyny
PADTRYMAĆChto taki były amapaviec Pavieł Kułažanka, jaki sprabuje stać radykalnym palityčnym lidaram?
Chto taki Valeryj Sachaščyk, jaki ŭznačaliŭ siłavy błok u kabiniecie Cichanoŭskaj
Kaho z palitviaźniaŭ mohuć vypuścić paśla anonsu Łukašenki?3
Kaho z palitviaźniaŭ mohuć vypuścić paśla anonsu Łukašenki?
«Kadebist u čornych skuranych palčatkach zadavaŭ pytańni, i kali ja nie adkazvała, pačynaŭ mianie dušyć»11
Kamientary