Rasijski aficer raskazaŭ, jak raźvivałasia ŭkrainskaja apieracyja pad Iziumam. Ën nie razumieje, čamu ŭkraincy nie zachacieli zamknuć akružeńnie
Były ministr abarony «DNR» Ihar Hirkin (Strałkoŭ) raskazaŭ, z čaho pačałosia i jak razhortvałasia vieraśnioŭskaje ŭkrainskaje nastupleńnie ŭ Charkaŭskaj vobłaści. Ukraincy ŭ vyniku viarnuli sabie bolš za 300 nasielenych punktaŭ, uklučajučy harady Bałakleja, Kupiansk i Izium. «Za dvoje sutak da pačatku apieracyi praciŭnik «chajmarsami» nakryŭ štab 11-ha korpusa, jaki trymaŭ pazicyi pad Bałaklejaj. Nakryŭ dvojčy. Kamandujučy korpusam byŭ paranieny. Suviaź była całkam stračanaja», — raskazvaje Hirkin, jaki maje šyrokija suviazi na froncie.
Hirkin kaža, što jašče ŭ lipieni — pačatku žniŭnia jon źviartaŭ uvahu na toje, što rasijskija vojski biespaśpiachova i biessensoŭna «bjucca łobam» ab doŭhačasovyja ŭmacavańni praciŭnika «ź minnymi palami, z dotami, ź bietanavanymi pazicyjami dla artyleryi, jakija rychtavalisia siem hadoŭ» na zachad ad Daniecka.
U vyniku hetaha, kaža Hirkin na videa, jakoje apublikavanaje ŭ jaho telehram-kanale, było rastračana šmat ludskich žyćciaŭ, šmat techniki, vielmi šmat snaradaŭ i hałoŭnaje, stračany miesiac času. Usio, čaho damahłasia tam rasijskaja armija, — uziaćcie nasielenaha punkta Piaski.
«I ŭsio», — padkreślivaje Hirkin. Pry hetym, zhodna ź im, straty danieckaj piachoty — «samaj bajazdolnaj kadravaj danieckaj piachoty» — jašče daduć pra siabie znać.
Pakul rasijanie sprabavali prabić druhuju liniju abarony ŭ kirunku Sieviersk—Saledar—Bachmut, praciŭnik, kaža Hirkin, «spakojna nazapašvaŭ reziervy na paŭnočnym fłanhu i atakavaŭ rasijskija pazicyi pad Chiersonam».
Hirkin ličyć, što pad Chiersonam ataka nie prosta adciahvała ŭvahu, ukraincy sapraŭdy sprabavali damahčysia tam pośpiechu, ale heta nie było ich asnoŭnaj zadačaj. Ataku pad Chiersonam rasijanie adbili. I «samaje bajazdolnaje», kaža Hirkin, pajechała padmacoŭvać Chierson.
U toj čas na zachodnim bierazie Sievierskaha Donca nasuprać Iziuma byli skancentravanyja hałoŭnyja siły ŭsioj rasijskaj Charkaŭskaj hrupoŭki, kaža Hirkin. «Nacelenyja na ataku, padkreślivaju, a nie na abaronu. Ich tam było šmat. Z takimi siłami možna było nie tolki Słaviansk uziać», — raspaviadaje jon. Tam była i pieršaja tankavaja armija.
A voś front pad Bałaklejaj, pavodle Hirkina, trymała tolki adna motastrałkovaja bryhada, jakaja mieła ŭ svaim składzie, u najlepšym vypadku, «tracinu štatnaha asabistaha składu (pa mirnym časie), jakuju ŭzmacnili faktyčna ničym nie ŭzbrojenymi (akramia aŭtamataŭ i lohkich kulamiotaŭ časoŭ Druhoj suśvietnaj vajny) danieckimi i łuhanskimi tak zvanymi «mobikami» [mabilizavanymi].
«Ledź-ledź razbavili, kab prosta linija choć była», — raspaviadaje Hirkin.
U reziervie ŭ nasielenych punktach taksama byli nievialikija pa kolkaści padraździaleńni Rashvardyi, AMAPa, SOBRa i h.d., «jak praviła, ad uzvoda da roty».
Za dvoje sutak da pačatku apieracyi praciŭnik, raspaviadaje Hirkin, «chajmarsami» nakryŭ štab 11-ha korpusa, jaki trymaŭ pazicyi pad Bałaklejaj i ŭzdoŭž Sievierskaha Danca na poŭdzień ad Bałaklei.
«Nakryŭ dvojčy. Kamandujučy korpusam byŭ paranieny. Suviaź (a značyć kiravańnie) była całkam stračanaja».
Na nastupny dzień, kaža Hirkin, praciŭnik adnačasova nanios dva ŭdary na poŭnač i poŭdzień ad Bałaklei.
«Na poŭnač ad Bałaklei praciŭnik prarvaŭ (miescami faktyčna nie zaŭvažyŭšy) hetuju tonkuju liniju frontu, jakaja składałasia z asobnych apornych punktaŭ».
Pamiž niekatorymi apornymi punktami adlehłaść była ŭ kiłamietr. «Tamu, navat nie praryvajučy,
praciŭnik adrazu adpraviŭ u tył svaje ŭzmocnienyja raźviedvalna-dyviersijnyja mabilnyja hrupy, jakija pajšli hramić tyłavyja błok-pasty, pierachoplivać trasy, źniščać tyłavyja abjekty, kałony i navodzić paniku», — apisvaje bieznadziejnaść situacyi rasijan Hirkin.
Jon kaža, što ŭkraincy «hramatna nie stali šturmavać Bałakleju», u adroźnieńnie ad rasijskich hienierałaŭ, «jakija z upartaściu, u łob, šturmavali Sievieradanieck i Lisičansk, pakłaŭšy vielizarnuju kolkaść sałdat i aficeraŭ — samych bajazdolnych». Ukrainskija ž vojski pajšli dalej, «raźvivajučy svoj pośpiech, prosta abmiežavaŭšysia błakavańniem».
Z-za hetaha rasijanam, pavodle Hirkina, udałosia vyvieści vialikuju častku harnizona.
Na astatnich frantach, kaža jon, atrymałasia padobnaje. Rasijskija vojski adychodzili ad Bałaklei ŭ bok Iziuma, «prarvaŭšysia z faktyčna poŭnaha akružeńnia», a na Kupianskim kirunku «nie było naohuł ničoha, akramia maleńkich harnizonaŭ u pasiołkach haradskoha typu, niejkich błokpastoŭ, jakija ŭžo byli častkova razhromlenyja ŭzmocnienymi padraździaleńniami śpiecnaza praciŭnika».
«U vyniku ŭ Kupiansk praciŭnik da kanca druhich sutak apieracyi prosta zajechaŭ». «I, dziakuj bohu, chapiła rozumu nie čaplacca za Kupiansk, adstupić, prosta, znoŭ ža, papali b tam u akružeńnie», — miarkuje Hirkin.
Jon kaža, što ŭkraincy, prasoŭvajučysia ŭ bok Iziuma, da kanca druhich sutak apieracyi pa šerahu kirunkaŭ stvaryli «realnuju pahrozu poŭnaha akružeńnia» paŭdniova-iziumskaj rasijskaj hrupoŭki, to-bok pieršaj hvardziejskaj tankavaj armii.
«Ščyra kažučy, ja byŭ amal upeŭnieny, što praciŭnik akružyć jaje, tady hetaje apieratyŭna-taktyčnaje paražeńnie pierarasło b u stratehičnaje», — kaža Hirkin.
Čamu praciŭnik nie raźviŭ nastup dalej, čamu z chodu nie zachapiŭ Izium, Hirkin nie razumieje. «Całkam vierahodna, što heta pamyłka ŭkrainskaha kamandavańnia, pa mienšaj miery, ja nie dumaju, što mieŭ miesca «dahavarniak». Chutčej za ŭsio, mieła miesca mienavita pamyłka ŭkrainskaha kamandavańnia, jakoje nie tudy nakiravała svaje asnoŭnyja siły, zanadta raspyliłasia».
«Naša pieršaja tankavaja armija zdoleła vyjści z akružeńnia biez boju, nie praryvajučysia, dziakujučy pamyłkam praciŭnika.
Tamu zajava na sałaŭjoŭskim šou spadara Šachnazarava, što, akazvajecca, Załužny — hienijalny pałkavodziec, i voś hetym tłumačycca naša paražeńnie na iziumska-bałaklejskim učastku — heta prosta łuchta. Luby talenavity pałkavodziec u takich idealnych umovach, z takoj pieravahaj, ja dumaju, vyrašyŭ by hałoŭnuju stratehičnuju zadaču, jakoj zaŭsiody źjaŭlajecca nie zachop terytoryi, a razhrom bajazdolnych častak i padraździaleńniaŭ praciŭnika. A ŭ hetym vypadku jon moh by razhramić cełaje elitnaje padraździaleńnie praciŭnika. Ale nie zmoh hetaha zrabić», — kaža Hirkin.
Jon upeŭnieny, što ŭ paražeńni rasijan vinavaty nie talent Załužnaha, a Ministerstva abarony i Hienieralny štab RF. «Ja asabista ŭpeŭnieny, što na 99% (kali nie na ŭsie 100), vina za hetaje paražeńnie lažyć na našym Hienieralnym štabie i na tych vojenačalnikach, jakich Hienieralny štab pryznačyŭ i jakimi jon kiruje», — kaža Hirkin.
Tolki dziakujučy pamyłkam ukraincaŭ, ličyć jon, rasijanam udałasia tak zvanaja «paśpiachovaja pierahrupoŭka sił», jak jany nazvali svajo adstupleńnie.
«Paśpiachovaj jana stała tolki tamu, što praciŭnik ździejśniŭ pamyłki. Tolki tamu ŭdałosia asnoŭnyja siły pieršaj hvardziejskaj tankavaj armii vyvieści z užo sfarmiravanaha akružeńnia», — pierakanany jon.
«Razvalili krainu, hieastratehi chieravy». Błohier Maksim Kac źviarnuŭsia da kiraŭnictva Rasii
U 35 hadoŭ staŭ hienierałam, stvaryŭ adnu z najlepšych raźviedak śvietu. Što viadoma pra kiraŭnika HUR Ukrainy Budanava?
Jašče 10—15 kiłamietraŭ, i ŭkrainskaja armija razreža chiersonskuju hrupoŭku napałam
Jak skłaŭsia los chłopca ź viadomaha žyćcieśćviardžalnaha fota studenckaha maršu-2020?2
Kamientary