Łukašenka padpisaŭ zakon ab licenzavańni daškolnaj i školnaj adukacyi
Alaksandr Łukašenka padpisaŭ zakon «Ab licenzavańni», jaki ŭ tym liku praduhledžvaje licenzavańnie daškolnaj i školnaj adukacyi. Normy ab atrymańni licenzii dziaržaŭnymi dziciačymi sadkami i škołami ŭstupiać u siłu paśla aficyjnaha apublikavańnia zakona, astatnija pałažeńni — z 1 studzienia 2023 hoda.
«Adukacyjnaja dziejnaść patrabuje pavyšanaha kantrolu z boku dziaržavy, bo źviazanaja z farmiravańniem zdarovaj, ideałahična ŭstojlivaj i roznabakova raźvitaj asoby. Licenzavańnie hetaj dziejnaści stanie harantam zakonnaści i jakaści pasłuh, jakija akazvajucca, dazvolić acanić arhanizacyju adukacyjnaha pracesu i nie dapuścić źjaŭleńnia ŭ śfiery adukacyi subjektaŭ haspadarańnia, jakija pieraśledujuć vyklučna kamiercyjnyja mety na škodu dziaržavie i asoby», — paviedamlaje pres-słužba Łukašenki.
Terminy zvarotu za atrymańniem licenzij buduć vyznačacca Ministerstvam adukacyi. Licenzavańnie adukacyjnych ustanoŭ uskładziena na Minharvykankam, haradskija i rajonnyja vykankamy.
Jašče da pryniaćcia hetaha zakona ŭ Biełarusi była amal źniščanaja pryvatnaja adukacyja, za apošni miesiac mnohija niedziaržaŭnyja ŭstanovy roznymi pravierkami zmusili zakrycca. Farmalnaj padstavaj staŭ incydent u adnoj sa staličnych škoł, dzie ŭ vypadku niaščasnaha vypadku była paranienaja dziaŭčynka, ale Łukašenka ŭ svaich paźniejšych zajavach asabliva i nie chavaŭ, što pryčyny represij suprać pryvatnaj adukacyi — ideałahičnyja.
Kamientary