Antyrekord: 92% pracesaŭ u Homielskim abłasnym sudzie — palityčnyja
Fłahštok źviarnuŭ uvahu na čarhovy patok pracesaŭ pa palityčna matyvavanych kryminalnych spravach u Homielskim abłasnym sudzie. Praktyčna štodnia žycharoŭ vobłaści sudziać za vykazanyja mierkavańni, zapisy ŭ sacsietkach, paviedamleńni ŭ čatach, pryhavorvajučy da źniavoleńnia. U niekatoryja dni sudździ Homielskaha abłasnoha suda razhladajuć vyklučna «palityčnyja» spravy. Homielščyna stała lidaram pa kolkaści «ekstremistaŭ» siarod usich rehijonaŭ krainy.
Fłahštok vyvučyŭ raskład pasiadžeńniaŭ va ŭsich abłasnych sudach Biełarusi za apošnija siem dzion listapada. Vyśvietliłasia, što biezumoŭnym lidaram u «palityčnych» pracesach staŭ Homielski abłasny sud, dzie kolkaść takich spraŭ zaškalvaje. Z 23 pa 30 listapada pryznačana da słuchańnia ŭ sudzie pieršaj instancyi 13 kryminalnych spraŭ. Ź ich 12 — z palityčnaj afarboŭkaj (bolš za 92%), i tolki adna asabliva kryminalnaja — zabojstva.
U «palityčnych» pracesach pieravažajuć abvinavačvańni za dziejańni ŭ sacsietkach — «raspalvańnie sacyjalnaj varožaści», «abraza pradstaŭnikoŭ ułady» i asobna Łukašenki, «sadziejničańnie ekstremisckaj dziejnaści».
Dvaich mužčyn, Uładzisłava Jacenku i Kiryła Płakuščava, buduć sudzić za zamach na «ŭdzieł na terytoryi zamiežnaj dziaržavy va ŭzbrojenym farmiravańni abo ŭzbrojenym kanflikcie».
Taksama praciahvajucca pracesy pa abvinavačvańni ŭ «zdradzie dziaržavie» (sprava «Rabočaha ruchu»), «teraryźmie» (sprava «śvietłahorskich partyzan»).
A što ŭ inšych rehijonach? Za toj ža pieryjad u Bresckim abłasnym sudzie — usiaho dva słuchańni ŭ sudzie pieršaj instancyi, ź ich adno — za zabojstva, a druhoje — «palityčnaje», za «raspalvańnie varožaści». U Viciebskim abłasnym sudzie z čatyroch pryznačanych spraŭ «palityčnyja» — dźvie. Anałahična — u Hrodzienskim abłasnym sudzie.
U Mahiloŭskim abłasnym sudzie za tyja ž 7 dzion razhledziać tolki dźvie kryminalnyja spravy ŭ sudzie pieršaj instancyi, ź ich «palityčnyja» abiedźvie. U Minskim abłasnym sudzie na hety momant pryznačany try pracesy, ź jakich z palityčnaj afarboŭkaj — dva.
Ciapier čytajuć
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku45
Kamientary