ISW: Małavierahodna, što Biełaruś uvarviecca va Ukrainu ŭ ahladnaj budučyni

Rasijskija ŭłady pravodziać «infarmacyjnyja apieracyi», jakija źmiaščajuć namioki na mahčymaść udziełu biełaruskich vojskaŭ va ŭvarvańni, pryčym časam hetym kampanijam padyhryvaje i Alaksandr Łukašenka. Metaj takich «apieracyj» ISW nazyvaje imknieńnie prymusić Ukrainu trymać častku vojskaŭ na biełaruskim kirunku i nie dać im uzmacnić ukrainskija pazicyi ŭ inšych miescach teatra vajennych dziejańniaŭ.

U toj ža čas małavierahodna, što Biełaruś uvarviecca va Ukrainu ŭ ahladnaj budučyni, jakim by ni byŭ chod hetych «infarmacyjnych apieracyj», upeŭnienyja ekśpierty ISW. Kroki Kramla, nakiravanyja na toje, kab prymusić Minsk padtrymać nastupalnuju kampaniju Rasii, ISW nazyvaje častkaj doŭhaterminovych namahańniaŭ dla ŭmacavańnia kantrolu nad Biełaruśsiu.

Rasija, pa dumku ekśpiertaŭ, imkniecca stvaryć pastajannuju vajennuju bazu ŭ Biełarusi i ažyćciaŭlać pramy kantrol nad biełaruskimi Uzbrojenymi Siłami. U pačatku śniežnia ministr abarony Rasii Siarhiej Šajhu sustrakaŭsia z Łukašenkam — vierahodna, nie tolki dziela ŭmacavańnia dvuchbakovych suviaziaŭ u śfiery biaśpieki, ale i ŭzmacnieńnia cisku na Biełaruś z metaj dalejšaj padtrymki ŭvarvańnia va Ukrainu, ličać u ISW.

U lutym Łukašenka prapanavaŭ biełaruskija terytoryi dla padrychtoŭki ŭvarvańnia va Ukrainu, a taksama krytyčna važnyja naziemnyja šlachi znosin, jon daje pavietranuju prastoru. Adnak hetaja padtrymka adnačasova źnižaje zdolnaść biełaruskich Uzbrojenych Sił pravodzić ułasnyja vajennyja apieracyi.

Instytut spasyłajecca na prajekt «Biełaruski Hajun», jaki śćviardžaje, što Minsk pieradaŭ rasijskim vajskoŭcam blizu 100 tankaŭ T-72A — jak miarkujecca, pad vyhladam adpraŭki ich dla madernizacyi ŭ Rasiju. Taja ža krynica raspaviadała ab pieradačy 60 BMP-2. Niezrazumieła, ci byli adpraŭlenyja ŭ Rasiju tanki na ŭzbrajeńni abo jany znachodzilisia na zachoŭvańni, ahavorvajucca aŭtary spravazdačy, ale ŭ lubym vypadku heta moža ŭ doŭhaterminovaj pierśpiektyvie abmiežavać materyjalnyja mahčymaści imaviernaha ŭdziełu Minska va ŭvarvańni, vynikaje z ahladu.

Biełaruś taksama, imavierna, skaračaje svaje zapasy artyleryjskich bojeprypasaŭ za košt pieradačy bojeprypasaŭ rasijskim vajskoŭcam, dadajuć eksperty, spasyłajučysia na ŭkrainskuju vajskovuju raźviedku. Biełaruskija Uzbrojenyja Siły, vierahodna, buduć abmiežavanyja i ŭ mahčymaści navučańnia piersanału z-za svajoj dapamožnaj roli va ŭvarvańni, bo biełaruskija vajskoŭcy ŭdzielničajuć u padrychtoŭcy mabilizavanych rasijan.

Padtrymka vajny z boku Łukašenki i cisk Rasii na Biełaruś akramia inšaha, vierahodna, vyklikajuć roznahałośsi ŭ biełaruskich Uzbrojenych Siłach. Biełaruskija vajskoŭcy, biezumoŭna, viedajuć ab značnych stratach, paniesienych rasijskimi vojskami va Ukrainie, i nie chočuć nieści straty sami. Całkam vierahodna, što niekatoryja vajskovyja načalniki mahli b vykazać niežadańnie ci navat kateharyčnuju admovu, kali b Łukašenka vyrašyŭ uvarvacca va Ukrainu, dumajuć aŭtary ahladu.

U hetaj situacyi Łukašenka, na ich dumku, sprabuje supraćstajać cisku Rasii, zajaŭlajučy, što NATA rychtujecca napaści na Biełaruś. Biełaruś užo naŭrad ci ŭvarviecca va Ukrainu z-za ŭnutranaj dynamiki ŭnutry krainy, reziumuje ISW. Łukašenka ŭśviedamlaje, što ŭvarvańnie padarvie jaho aŭtarytet jak lidara suvierennaj krainy, pakolki budzie vidavočna, što namahańni Rasii pa zabieśpiačeńni poŭnaha kantrolu nad Biełaruśsiu ŭviančalisia pośpiecham.

• 18
• 0
• 4
• 0
• 2
• 3
• 2
• 0