Ukrainskaja raźviedka patłumačyła, jak zrazumieje, što Rasija rychtuje novy nastup. I što dumaje ab prychodzie armii ź Biełarusi
Pradstaŭnik Hałoŭnaha ŭpraŭleńnia raźviedki Minabarony Andrej Jusaŭ u efiry nacyjanalnaha telemarafonu raskazaŭ pra mahčymy novy nastup rasijskaha vojska. A taksama parazvažaŭ pra mahčymaść paŭnavartasnaha ŭstupleńnia ŭ vajnu Łukašenki.
Jusaŭ raskazaŭ, pa jakich prykmietach raźviedka budzie viedać, što nastup adbudziecca.
«Kali kazać pra samyja prostyja vidavočnyja rečy, to heta farmiravańnie ŭdarnych hrupovak i padviadzieńnie ich da miažy. Taksama jość šmat inšych krynic, ahienturnyja danyja, usie jany sumujucca, analizujucca, i robiacca adpaviednyja vysnovy.
Pa stanie na ciapier (takoha «ŭdarnaha kułaka») my nie bačym, nie kanstatujem, ale heta nie značyć, što takoj pahrozy niama. Kali hetaja pahroza budzie, to Ukraina i ŭłasnymi namahańniami, i za košt abmienu danymi z našymi partniorami, u pryvatnaści krainami NATA, my, biezumoŭna, budziem vałodać hetaj infarmacyjaj.
Ale ŭ pieršuju čarhu abapirajemsia na ŭłasnyja danyja. I pa stanie na ciapier rasijanie nie hatovyja da novaha poŭnamaštabnaha nastupu. Choć my z vami pavinny razumieć, što my žyviom va ŭmovach poŭnamaštabnaha nastupu z 24 lutaha. I havorka idzie nie pra novy nastup, a ŭmoŭna pra novyja apieracyi ŭ ramkach hetaha poŭnamaštabnaha nastupu».
Pradstaŭnik HUR dadaŭ, što Biełaruś ciapier vykarystoŭvajecca jak palihon dla navučańnia mabilizavanych i baza dla pastaŭki ŭzbrajeńnia, u tym liku ciažkaha.
Manieŭry, jakija ciapier nazirajucca, aryjentavany na toje, kab adciahvać ŭkrainskija siły abarony i prymušać trymać peŭnuju kolkaść vojskaŭ na hetym napramku, ličyć Jusaŭ.
«Siońnia Biełaruś navat razam z častkova mabilizavanymi nie hatovaja da paŭnavartasnaha ŭdziełu ŭ naziemnaj apieracyi. Kali b takoje rašeńnie było pryniata, heta było b samahubstvam i z vajennaha punktu hledžańnia, i z palityčnaha.
Kali ŭličyć, što najbolš padrychtavanyja elitnyja rasijskija čaści ŭžo źniščanyja na terytoryi Ukrainy, to siońnia biełaruskaja armija, mahčyma, navat u siarednim lepš padrychtavanaja, čym rasijskaja, ale ich namahańniaŭ i pa kolkaści, i pa inšych pakazčykach nie chapaje dla farmiravańnia ŭdarnych hrupovak», — miarkuje pradstaŭnik raźviedki.
«Niezaležna ad taho, jakija rašeńni buduć pryniatyja, možna jašče raz padkreślić: da roznych scenaroŭ, da roznaha raźvićcia, u pryvatnaści ź biełaruskaha kirunku ŭkrainskija siły abarony hatovyja. Niečakanaści nie budzie», — adznačyŭ jon.
Ciapier čytajuć
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku45
Kamientary