Z dopytu ŭ milicyi trapiŭ u reanimacyju

Prakuratura rasśleduje abstaviny zdareńnia, jakoje adbyłosia ŭ budynku UUS na transparcie ŭ Minsku.

Svajaki paciarpiełaha śćviardžajuć, što chłopca žorstka źbili supracoŭniki milicyi.

Krychu bolš za tydzień tamu UUS na transparcie paviedamiła, što 9 kastryčnika z akna prybiralni, raźmieščanaj na 4-m paviersie budynka UUST, skoknuŭ chłopiec, jaki ŭ ciažkim stanie dastaŭleny ŭ balnicu. Nibyta paciarpieły byŭ mocna pjany i nie adkazvaŭ za svaje dziejańni.

Na nastupny dzień paśla paviedamleńnia svajaki chłopca padali ŭ Hienieralnuju prakuraturu i MUS zajavy, u jakich pakazali, što paciarpieły zusim nie skakaŭ z čaćviortaha paviercha, a jaho prosta žorstka źbili supracoŭniki milicyi. «Ježiednievnik» pasprabavaŭ vyśvietlić, jak heta było.

Jak raspavioŭ sam paciarpieły Maksim Kuźminych, historyja pačałasia davoli dziŭna. U paniadziełak 2 kastryčnika Maksimu na mabilny patelefanavaŭ nieviadomy. Jon pradstaviŭsia ŭčastkovym z Bresckaha UUS i prapanavaŭ sustrecca, kab pahavaryć. Maksim adkazaŭ, što žyvie i pracuje ciapier u Minsku i jamu budzie prablematyčna pryjechać. Učastkovy skazaŭ, što nijakich prablem niama, paśla čaho adklučyŭsia.

Na ŭsialaki vypadak Maksim patelefanavaŭ dadomu maci, kab vyśvietlić, što zdaryłasia. Maci źviazałasia z učastkovym i z ździŭleńniem daviedałasia, što toj nie telefanavaŭ. U vyniku doŭhich razhladaŭ vyśvietliłasia, što telefanavaŭ zusim inšy supracoŭnik, jaki i sam nie viedaje, kamu i ź jakoj nahody Maksim spatrebiŭsia — prosta paprasili ź Minska jaho znajści.

Na nastupny dzień Maksimu pačali telefanavać milicyjanty ź Minska. Jany navat nie nazyvali svaje proźviščy i pasady, a prosta vielmi nastojliva prapanoŭvali sustrecca. Jak jany kazali, na niejtralnaj terytoryi ŭ intymnaj abstanoŭcy pahavaryć ab čymści. Nie razumiejučy, što adbyvajecca, Maksim paprasiŭ ich dasłać pozvu. Skazaŭ, što pracuje z 8.00 da 17.00 i nie moža ŭ pracoŭny čas jeździć pa ŭsiakim sustrečam, tym bolš niezrazumieła z kim. Adnak supracoŭniki milicyi byli nastojlivymi i ŭsio prapanoŭvali sustrecca ŭ lubym miescy ŭ luby čas. Tak jany telefanavali-telefanavali i raptam pierastali.

U piatnicu 9 kastryčnika supracoŭnik milicyi Siarhiej abjaviŭsia u siastry Maksima, ad jaje jon patelefanavaŭ chłopcu i znoŭ nastojliva paprasiŭ sustrecca. Jon pryjechaŭ na budoŭlu, dzie pracavaŭ Maksim.

«Jon skazaŭ, što treba terminova jechać ź im, pahavaryć. Byŭ uvieś niervovy, padbrykvaŭ pastajanna. Ja jamu pačaŭ tłumačyć, što na pracy znachodžusia, što nie mahu voś prosta tak ŭziać i syści. Jon zapatrabavaŭ vyklikać praraba. Ja vyklikaŭ i praraba, i majstra. Jany mianie adpuścili. Ja sieŭ da hetaha Siarhieja ŭ mašynu, i my pajechali», — raspavioŭ karespandentu «Ježiednievnika» Maksim. Pa śćviardžeńni paciarpiełaha, pa darozie supracoŭnik milicyi pastajanna łajaŭsia matam — z nahody zatoraŭ, taho, što jaho prymušajuć raskryvać vybuch, jaki adbyŭsia 3 Lipienia, a jon voś vymušany biehać za Maksimam.

«Jon byŭ zacykleny na hetym vybuchu, taki niervovy byŭ, tak kazaŭ, byccam voś jaho asabista prezident prymušaje hety vybuch raskryć», — raspavioŭ Maksim.

Va Upraŭleńni ŭnutranych spraŭ na transparcie, raźmieščanym na vuł.Bryleŭskaj, 14, Maksimu pačali zadavać ŭsialakija pytańni, nie tłumačačy, navošta pryvieźli i čamu tak nastojliva prasili ab sustrečy.

«Pamiataju, jak pryjechali, jak zajšli na 4-y pavierch, jak inšyja supracoŭniki tykali palcami. Pamiataju ich uśmieški: «Heta toj?» Pamiataju, jak hety Siarhiej na mianie kidaŭsia. A potym ja ŭpaŭ na padłohu i aprytomnieŭ, tolki kali mianie «chutkaja» zabirała. Ja adčuvaŭ bol, choład, ale jany byli prytuplenyja. Dyj sam stan byŭ niejki dziŭny. Tolki paźniej ja daviedaŭsia, što ŭ mianie ŭ kryvi vyjavili vialikuju kolkaść ałkaholu», — raspavioŭ Maksim.

Zaraz supracoŭniki milicyi sprabujuć dakazać, što Maksim byŭ pjany i, znachodziačysia ŭ šalonym stanie, vyskačyŭ u akno 4-ha paviercha, u vyniku čaho i atrymaŭ kalectva. Voś tolki nie ŭsie sychodzicca ŭ hetym tłumačeńni. Pa-pieršaje, traŭmy, jakija atrymaŭ paciarpieły, nie charakternyja dla padzieńnia z vyšyni. Heta adrazu adznačyli miedyki, choć, viadoma, ekśpiertnaje zaklučeńnie budzie paźniej. Ale hałoŭnaje, majstar i prarab bačyli, što z budoŭli Maksima zabirali absalutna ćviarozym.

«Na nastupny dzień supracoŭniki milicyi telefanavali majstru i prarabu, prasili, kab jany paćvierdzili, što mianie nibyta adtul pjanym zabirali. Vielmi nastojliva ŭhavorvali, tak skazać, ale jany, viadoma, admovilisia. Majstar im adkazaŭ: jak ja mahu skazać, kali jon byŭ ćviarozym? Kali b byŭ pjanym, ja b da pracy jaho nie dapuściŭ», — rastłumačyŭ «Ježiednievniku» Maksim Kuźminych. Pa jaho słovach, i ŭ špital zaraz da jaho prychodziać niejkija ludzi, jakija sprabujuć pierakanać, što heta byŭ niaščasny vypadak, što ničoha strašnaha nie adbyłosia. «Palažyš, adpačnieš i spakojna pojdzieš dalej pracavać», — kažuć jany.

Zaraz prakuratura i Upraŭleńnie ŭłasnaj biaśpieki (UUB) MUS pravodziać raźbiralnictva pa zajavie Taćciany Hajs — siastry Maksima, jakaja śćviardžaje, što jaje brata mocna bili ŭ UUDT. Jak napisana ŭ zajavie, Maksim patelefanavaŭ joj jašče z pracy, kali jaho zabirali ŭ milicyju. Praź dźvie hadziny paśla hetaha siastra patelefanavała bratu sama. Jon paviedamiŭ, što ŭsio jašče znachodzicca na Bryleŭskaj, što ad jaho patrabujuć padpisać niejkija dakumienty. Jašče praz hadzinu, kali siastra patelefanavała, Maksim skazaŭ, što ŭsie padpisvaje, što na jaho najechali, źbivali. Jak patłumačyła Taćciana «Ježiednievniku», u hety čas Maksim užo byŭ niejki šalony, i jana ledź mahła razabrać, što jon kaža.

U 21.00, kali Taćciana patelefanavała znoŭ, telefon brata ŭžo nie adkazvaŭ. Tady siastra patelefanavała supracoŭniku milicyi — tamu samamu Siarhieju. Jon rastłumačyŭ Taćcianie, što zaraz Maksim sioje-toje ŭspaminaje i nie moža joj adkazać. Milicyjant paprasiŭ patelefanavać paźniej, da 23.30. Adnak ni paźniej, ni ranicaj na zvanki siastry nie adkazvali ni Maksim, ni supracoŭnik milicyi. Žančynie daviałosia prykłaści niamała namahańniaŭ, kab daviedacca, što jaje brat u reanimacyi. Nibyta jon vyskačyŭ z vakna 4-ha paviercha.

Darečy, supracoŭniki UUB, jakija apytvali Maksima paśla NZ, skazali, što ŭsie dakumienty, jakija jon padpisaŭ, ničoha nie značać. Jany napisany całkam nierazborliva, što paćviardžaje, što ŭ hety momant Maksim nie pomniŭ siabie.

• 0
• 0
• 0
• 0
• 0
• 0
• 0
• 0