Ukrainka pieražyła sardečny prystup padčas evakuacyi i padała ŭ sud na Rasiju — patrabuje kampiensacyju ŭ 137 młn jeŭra
Va Ukrainie Hanna pracavała ŭ bujnym sałonie pryhažości ŭ Dniapry. Z pačatkam poŭnamaštabnaj vajny jana vyrašyła evakujavacca. U darozie žančyna pieražyła sardečny prystup, piša «Nastojaŝieje vriemia».
Trapić na evakuacyjny ciahnik z Dniapra da Lvova Hanna razam z dačkoj zmahli nie ź pieršaha razu. Na vakzale žančynie stała drenna z sercam, minaki vyklikali chutkuju dapamohu. «Zabrali ŭ reanimacyju. Lažała tam čatyry dni. Pieršyja dni ja lažała ŭ adnym adździaleńni, potym u hety ž dzień nas pieraviali ŭ inšaje. Nie pamiataju, jak nazyvajecca, naohuł nie pa profili, skažam tak. U toje adździaleńnie, dzie my lažali, u kardyjałohii, zavozili paranienych. Miescaŭ nie chapała», — uspaminaje ŭkrainka.
Ciapier jana ŭ Litvie.
Paśla hetaha Hanna vyrašyła padać u sud na Rasiju. U isku ŭkrainka adznačaje, što praz sardečny prystup na vakzale ŭ jaje źjavilisia chraničnyja prablemy sa zdaroŭjem: ciapier joj nielha zajmacca sportam i treba rehularna prymać miedykamienty. U zajavie Hanna paznačaje, što prablemy sa zdaroŭjem u jaje ŭźnikli praź pieražyty stres na fonie rasijskaha ŭvarvańnia va Ukrainu.
Adna z hałoŭnych zadač isku, kaža juryst i muž Hanny Ihnat Kučeryn, — stvareńnie precedentu: «Kab tyja, chto znachodzicca ciapier va Ukrainie, taksama mahli padavać u sud i atrymlivać svaje rašeńni sa svajoj situacyjaj. I kali kožny hramadzianin svaju situacyju zamacuje rašeńniem suda, usio roŭna dzie, usio roŭna ŭ jakoj krainie, ja dumaju, heta paśla možna budzie pakłaści ŭ sudzie nad vajennymi złačyncami rasijskimi ŭ asnovu prysudu».
Adkazčykam u sudzie ad Rasijskaj Fiederacyi vystupaje pradstaŭnik ambasady krainy ŭ Litvie. Spahnać na karyść Hanny płanujuć 137 miljonaŭ jeŭra. Takaja pazicyja, kaža Ihnat Kučeryn, pabudavanaja na precedencie ŭ tym liku byłoha supracoŭnika kampanii Tesla Oŭena Dyjasa, jaki bolš za paŭhoda padviarhaŭsia rasisckim abrazam na pracy. Prysiažnyja zadavolili jaho isk na sumu 137 miljonaŭ dalaraŭ — sud zrezaŭ kampiensacyju da 15 miljonaŭ.
Ale, paŭtaraje juryst, hałoŭnaja meta isku jaho žonki — nie hrošy, a stvareńnie precedentu.
Sud Litoŭskaj Respubliki ŭžo pryniaŭ da razhladu zajavu Hanny Kučarynaj z Dniapra. Navat kali, kaža jaje juryst, iskavyja patrabavańni nie buduć zadavolenyja ŭ Litvie, siamja maje namier iści ŭ Jeŭrapiejski sud pa pravach čałavieka. U rasijskaj ambasadzie isk kamientavać nie stali.
Ciapier čytajuć
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić1
Kamientary