Biaźmiežža z uzroŭniem cen u Biełarusi nie dapuściać. Tak zajaviŭ Alaksandr Łukašenka na pasiadžeńni Savieta Ministraŭ, pryśviečanaha vynikam raboty ekanomiki za 2022 hod.
«Viadoma, asablivaja ŭvaha — baraćbie ź inflacyjaj. Ceny — pytańnie numar adzin dla ludziej. Takoha ŭsplosku, jaki adbyŭsia minułaj vosieńniu, bolš dapuskać kateharyčna nielha.
Jakimi chočacie sposabami (manitarnymi, rehulatarnymi, administracyjnymi), ale damahajciesia, kab, jak damovilisia, trymać kalidor u rajonie 7%. Hetaja ličba pavinna być čyrvonaj linijaj, jaje pavinien razumieć biznes, vytvorca i handal. Inakš miery buduć pryniaty samyja žorstkija.
Biaźmiežža dapuścić my nie možam. Ceny pavinny być spraviadlivymi», — skazaŭ Alaksandr Łukašenka.
Pavodle jaho, nie mienš važnaja ŭmova — paŭnavartasny asartymient na pryłaŭkach mahazinaŭ.
«Kožnuju chvilinu pamiatajcie: usie sacyjalnyja abaviazańni pa pavyšeńni ŭzroŭniu žyćcia nasielnictva Biełarusi pavinny być vykanany biezumoŭna. Heta sacyjalny kantrakt ułady z narodam», — skazaŭ jon.
Taksama jon patrabavaŭ ad urada adnavić abjomy inviestycyj z pryjarytetam stvareńnia impartazamiaščalnych vytvorčaściej.
«Ja baču, što situacyja ŭ paraŭnańni ź letniaj palepšyłasia, niachaj i nie našmat. Ale pry hetym paŭnacennaj antysankcyjnaj pierabudovy, na žal, jašče nie adbyłosia. Pakul što», — zaŭvažyŭ Łukašenka.
Kamientary