«Prapłyvali pamiž damami, išli nad zatoplenym parnikom». Bajdaračniki skarystali pavodku, kab adkryć «Połackuju Vieniecyju»
Raźliŭ Dźviny ŭ Połacku adkryŭ novyja mahčymaści dla vodnaha turyzmu, i hetym adrazu skarystalisia ŭdzielniki kłuba amataraŭ aktyŭnaha adpačynku «Bajdaračniki Połaččyny». Novy maršrut «U pošukach Rahvałoda», abo «Połackaja Vieniecyja», dazvoliŭ im ubačyć rodny horad ź niezvyčajnaha rakursu.
![](http://nashaniva.com/img/w732d4webp1/photos/z_2023_04/2_9-go0wk.jpg.webp)
«Takoha ŭzroŭniu vady za 13 hadoŭ našaha chadžeńnia na bajdarkach jašče nikoli nie było, — raskazaŭ vydańniu Gorod214.by instruktar vodnaha pachodu Ihar Zahrekaŭ. — My zapłyvali ŭ aharody, išli pamiž damami i nad zatoplenym parnikom, pa alejach parku i pa biarozavym hai vakoł pahružanych u vadu dreŭ. Usiudy łodka prachodziła vydatna, praktyčna nidzie nie sadzilisia na mieliznu».
![](http://nashaniva.com/img/w732d4webp1/photos/z_2023_04/4_3-5efi7.jpg.webp)
Bajdaračniki spuścilisia na vadu ŭ rajonie Połackaj CEC. Dalej prajšli pa race Pałacie, pad Čyrvonym mostam i pad mastkom u rajonie Safijskaha sabora. Zatym pierapłyli Dźvinu, z boku novaha mosta zajšli ŭ park kala Kurhana Bieśśmiarotnaści, prapłyli pa jaho terytoryi da plaža i viarnulisia nazad u centr Połacka.
![](http://nashaniva.com/img/w732d4webp1/photos/z_2023_04/1_5-bnk1j.jpg.webp)
Hety maršrut, jak rastłumačyli ŭdzielniki pachodu, cikavy taksama z histaryčnaha punktu hledžańnia. Kaliści terytoryja parku była vostravam, u X stahodździ na hetym miescy lehiendarny skandynaŭski padarožnik i chryścijanski misijanier Torvald Kodransan, pavodle lehiendy, zasnavaŭ manastyr Śviatoha Iaana Pradciečy. Jak miarkujecca, u hary kala carkvy Iaana ŭ Połacku Torvald byŭ i pachavany.
![](http://nashaniva.com/img/w732d4webp1/photos/z_2023_04/7_2-9ooo8.jpg.webp)
Paŭtornyja spłavy novym maršrutam buduć arhanizavanyja pa viečarach 5, 7 i 9 krasavika. Bajdaračniki zaklikajuć dałučacca da ich družnaj kampanii, kab vyvučać i paznavać rodnuju Połaččynu razam.
![](http://nashaniva.com/img/w732d4webp1/photos/z_2023_04/21-2-uzfpo.jpg.webp)
Kamientary