Handlar dziaŭčatkami ŭ prakuratury: stali viadomyja padrabiaznaści adnoj z samych miarzotnych spraŭ
Aljans rasśledavalnikaŭ Biełarusi apublikavaŭ dakumienty, atrymanyja dziakujučy «Kibierpartyzanam», jakija datyčać kryminalnaj spravy prakurorskaha rabotnika.
Načalnik adździeła Viciebskaj abłasnoj prakuratury Alaksandr Iljin, 1970 hoda naradžeńnia, byŭ asudžany vajskovym sudom jašče ŭ 2013 hodzie. Śledstva pa spravie praciahvałasia z 2007 hoda. Adnak jaho detali stali viadomyja tolki dziakujučy kibierpartyzanam. Raniej jany nie publikavalisia.
Padrabiaznaści spravy raskazaŭ «Biełsat».
U prysudzie adznačajecca, što ŭ 2002 hodzie Iljin dla ažyćciaŭleńnia złačynnaj dziejnaści ŭ Viciebsku ŭciahnuŭ zaviedama niepaŭnaletniuju A. B. i Hulidava A. A. ŭ arhanizavanuju hrupu dla ŭčynieńnia złačynstvaŭ. Kankretna — dla zaniaćcia prastytucyjaj. U dalejšym da hetaha zaniatku byli pryciahnuty i inšyja niepaŭnaletnija dziaŭčatki.
Kiraŭnikom hrupy byŭ Iljin. Jon raźmiarkoŭvaŭ roli pamiž udzielnikami, padtrymlivaŭ dyscyplinu, vyrašaŭ arhanizacyjnyja i inšyja pytańni, raźmiarkoŭvaŭ prybytak.
Niepaŭnaletniaj A. B. była adviedziena rola zboru infarmacyi ab patencyjnych małaletnich achviarach. Paśla jana sumiesna ź Iljinym roznymi sposabami (šantažom, podkupam, pahrozami, ałkaholem, zapałochvańniami i hvałtam) schilała ich da ździajśnieńnia pałavych znosin i inšych dziejańniaŭ seksualnaha charaktaru.
A. B. vystupała ŭ roli suteniora, viała pieramovy z klijentami, supravadžała achviar da klijentaŭ, zabirała hrašovuju ŭznaharodu i pieradavała Iljinu.
Hulidaŭ zajmaŭsia dastaŭkaj niepaŭnaletnich dziaŭčatak pa roznych adrasach jak u Biełarusi, tak i ŭ Maskvie.
Złačynnaja dziejnaść praciahvałasia ź leta 2002-ha pa śniežań 2005-ha.
Materyjały prysudu raskryvajuć žachlivyja padrabiaznaści abychodžańnia Iljina sa svaimi achviarami.
Tak, uzimku 2003 hoda niepaŭnaletniaja dziaŭčynka była pakarana za toje, što raskazała inšamu čałavieku ab złačynnych zaniatkach Iljina. Achviaru advieźli ŭ les, dzie zahadali kapać sabie mahiłu. Kali jana admoviłasia, to jaje prymusili raździecca, pryviazali da dreva i źbili. Iljin u hety čas fatahrafavaŭ praces.
Paśla dziaŭčynku advieźli ŭ kvateru ŭ kajdankach i prykavali imi da truby ŭ sanvuźle. Paśla achviaru adviali ŭ pakoj i ździekavalisia ź jaje. Padobnyja ździeki z pryšpilvańniem kajdankami praktykavalisia i adnosna inšych dziaŭčatak.
Inšym razam Iljin u stanie ałkaholnaha apjanieńnia siłkom utrymlivaŭ u kvatery niekalki dziaŭčynak byccam by za ich drennyja pavodziny ŭ kłubie. Jon na praciahu niekalkich hadzin źbivaŭ svaich achviar, potym źviazaŭ im ruki i ździejśniŭ dziejańni seksualnaha charaktaru.
Achviary paźniej dali pakazańni, što elemienty sadyzmu byli zvyčajnaj zjavaj padčas seksualnych uciech Iljina.
Śledčyja znajšli na noŭtbuku Iljina fotazdymki dziaŭčynak, u tym liku ŭ aholenym vyhladzie. Jak pakazali materyjały śledstva, fotazdymki achviar seksualnaha charaktaru Iljin vykarystoŭvaŭ u jakaści šantažu dla schileńnia dziaŭčatak da ŭstupleńnia ŭ pałavyja znosiny z trecimi asobami, jakich jon sam pryvodziŭ.
Jak śćviardžajecca ŭ pryhavory, Iljin vyvoziŭ dziaŭčatak «u roznyja saŭny, łaźni i bazy adpačynku, arhanizoŭvaŭ sustrečy ŭ inšych miescach, dzie jany pa patrabavańni apošniaha akazvali seksualnyja pasłuhi jamu i jaho znajomym, siarod jakich byli supracoŭniki pravaachoŭnych orhanaŭ».
Usiaho za try hady jon zdoleŭ pryciahnuć da zaniatkaŭ prastytucyjaj bolš za dziesiać dziaŭčatak. Siarod ich była navat 12-cihadovaja.
Udzielnikam arhanizavanaj złačynnaj hrupy było vystaŭlena abvinavačańnie adrazu pa nastupnych vaśmi artykułach Kryminalnaha kodeksa:
art. 182 (vykradańnie čałavieka, ździejśnienaje ŭ dačynieńni da zaviedama niepaŭnaletniaha, arhanizavanaj hrupaj, jakoje supravadžałasia pakutami i katavańniem);
art. 166 (zhvałtavańnie zaviedama niepaŭnaletniaha);
art. 154 (katavańni zaviedama niepaŭnaletnich);
art. 167 (ździajśnieńnie dziejańniaŭ seksualnaha charaktaru nasupierak voli paciarpiełaj, paśla ździajśnieńnia zhvałtavańnia, hrupaj asob, z užyvańniem hvałtu, paŭtorna, u dačynieńni da zahadzia małaletniaj);
art. 168 (pałavyja znosiny i dziejańni seksualnaha charaktaru z asobami, jakija nie dasiahnuli šasnaccacihadovaha ŭzrostu);
art. 171 (vykarystańnie zaniatku prastytucyjaj zahadzia niepaŭnaletniaj, spałučanaha z vyvazam za miežy dziaržavy dla zaniatku prastytucyjaj, učynienym arhanizavanaj hrupaj);
art. 172 (uciahvańnie zaviedama niepaŭnaletniaj va ŭčynieńnie złačynstva šlacham abiacańniaŭ, padmanu, uhavoraŭ, z vykarystańniem nasilla i z pahrozaj jaho vykarystańnia, źviazanym z uciahvańniem niepaŭnaletniaha ŭ arhanizavanuju hrupu, va ŭčynieńnie ciažkaha i asabliva ciažkaha złačynstvaŭ);
st. 173 (uciahvańnie niepaŭnaletniaha ŭ antyhramadskija pavodziny).
Kali złačynnaja dziejnaść hrupy Iljina była raskryta, jon zdoleŭ źbiehčy. Zatrymany jon byŭ tolki ŭ śniežni 2009 hoda ŭ Rasii, u Krasnadary.
Pa sukupnaści ŭsich złačynstvaŭ Iljin byŭ asudžany na 17 hadoŭ pazbaŭleńnia voli ŭ papraŭčaj kałonii va ŭmovach uzmocnienaha režymu z kanfiskacyjaj usioj majomaści, biez pazbaŭleńnia prava zajmać peŭnyja pasady i zajmacca peŭnaj dziejnaściu.
Alaksandr Iljin adbyvaŭ termin u škłoŭskaj papraŭčaj kałonii № 17. Tam jon u kastryčniku 2022 hoda ŭčyniŭ samahubstva, nie dabyŭšy da vyzvaleńnia try hady. Miarkujecca, što ŭ kałonii jon byŭ zmušany vieści isnavańnie viaźnia nizkaha statusu.
Čytajcie jašče:
18 dziaŭčatak i 5 chłopčykaŭ stali achviarami piedafiła ŭ Mazyry
«Seksualnaja aryjentacyja časta biez adchileńniaŭ». U Biełarusi skłali partret typovaha piedafiła
Kamientary