Chutka ŭ biełarusaŭ źjavicca abaviazak infarmavać pra atrymańnie DNŽ, karty palaka i hramadzianstva inšych krain. Što čakaje tych, chto prychavaje hety fakt?
Źbirać źviestki pra dazvoły na žycharstva ŭ ES i karty palaka ŭžo pakrysie pačali na miažy i dziaržpradpryjemstvach.
Zakon mocy nie nabyŭ, a infarmacyju ŭžo źbirajuć
Zhodna z abnoŭlenaj redakcyjaj zakona «Ab hramadzianstvie», biełarusy, jakija atrymali hramadzianstva inšych krain, DNŽ ci inšy dakumient zamiežnaj dziaržavy (naprykład, kartu palaka), jaki daje prava na lhoty i inšyja pieravahi, na praciahu troch miesiacaŭ z dnia atrymańnia adpaviednych dakumientaŭ abaviazany prainfarmavać pra heta orhany ŭnutranych spraŭ abo orhany dypłamatyčnaj słužby.
Zakon nabyvaje moc 11 lipienia.
Pry hetym, jak pakazvaje praktyka, źbirać źviestki ab najaŭnaści padobnych dakumientaŭ pačali jašče letaś. Paralelna z hetym na dziaržaŭnych pradpryjemstvach akazvajuć cisk na ŭładalnikaŭ karty palaka. Ludziej prymušajuć admovicca ad jaje, pahražajuć zvalnieńniem.
Taksama pačynajučy ź viasny biahučaha hoda adznačajecca, što pahraničniki pačali ŭsio čaściej patrabavać dazvoł na žycharstva ci inšyja dakumienty ŭ tych biełarusaŭ, jakija padajuć pašpart bieź dziejnaj vizy pry vyjeździe ŭ ES. Choć pa zakonie dla vyjezdu za miažu dastatkova mieć tolki pašpart. Vyhladaje, što ŭłady rychtujucca da ŭstupleńnia ŭ siłu abnoŭlenaha zakona.
A što, kali źviestki nie padavać?
Što moža čakać tych, chto vyrašyć prychavać fakt najaŭnaści padobnych dakumientaŭ, my spytali ŭ jurystaŭ servisu biaspłatnaj ananimnaj jurydyčnaj dapamohi Legal Hub.
Jurysty adznačajuć, što na siońnia zakanadaŭstvam nie vyznačanyja ni formy adpaviednych paviedamleńniaŭ, ni adkaznaść za niepaviedamleńnie ŭ kampietentnyja orhany infarmacyi ab najaŭnaści hramadzianstva/dazvołu na žycharstva i inšych dakumientaŭ zamiežnaj dziaržavy.
Ale heta nie aznačaje, što takija normy nie źjaviacca ŭ chutkim časie.
«Saviet Ministraŭ da ŭstupleńnia ŭ siłu adpaviednych źmien upaŭnavažany pryniać miery, nieabchodnyja dla realizacyi novaj redakcyi zakona», — kaža śpiecyjalist.
Pry hetym jon adznačaje, što lubyja akty, jakija vyznačajuć adkaznaść, nie mohuć mieć zvarotnaj siły (č. 2 p. 2 art. 66 zakona «Ab narmatyŭnych pravavych aktach»), a heta značyć, što jany mohuć prymianiacca tolki da tych parušeńniaŭ, jakija majuć miesca paśla ŭstupleńnia ŭ siłu akta, jaki ŭstanaŭlivaje takuju adkaznaść. Prynamsi, tak musić być zhodna z ahulnymi normami prava. Jak heta budzie adbyvacca na praktycy, pakul dakładna nieviadoma.
Najbolš blizkim pa źmieście artykułam Kodeksa ab administracyjnych pravaparušeńniach juryst nazyvaje artykuł 24.11 (niepradstaŭleńnie dakumientaŭ, spravazdač i inšych materyjałaŭ).
«Ale hety artykuł ustanaŭlivaje adkaznaść słužbovych asob i indyvidualnych pradprymalnikaŭ, a nie prostych hramadzian. A zakon «Ab narmatyŭnych pravavych aktach» (punkt 2 art. 71) zabaraniaje pryciahnieńnie da adkaznaści pa anałohii», — adznačaje juryst.
Tamu śpiecyjalist miarkuje, što chutka razam z novymi patrabavańniami źjaviacca i novyja normy, jakija buduć praduhledžvać adkaznaść za ich nievykanańnie.
Tut biełaruskija ŭłady mohuć aryjentavacca na dośvied RF, jak jany ŭžo nieadnarazova rabili.
«Tady padobnyja parušeńni mohuć paciahnuć administracyjnuju adkaznaść u vypadku niesvoječasovaha adpaviednaha paviedamleńnia abo ŭkazańnia niapoŭnych źviestak u im (art. 19.8.3 Kodeksa RF ab administracyjnych pravaparušeńniach), a taksama kryminalnuju adkaznaść u vypadku naŭmysnaha niepradstaŭleńnia źviestak (artykuł 330.2 KK RF). Nie vyklučana, što padobnyja pałažeńni buduć uniesieny i ŭ biełaruskaje zakanadaŭstva», — miarkuje pravaznaŭca.
Havoračy pra abnoŭlenuju redakcyju zakona, jakaja nabyvaje moc užo ŭ nastupnym miesiacy, śpiecyjalist źviartaje ŭvahu i na art. 11, jaki dapuskaje, što hramadzianie, jakija majuć inšaje hramadzianstva albo dazvoł na žycharstva ci inšy dakumient zamiežnaj dziaržavy mohuć być abmiežavanyja ŭ pravach i svabodach u vypadkach, praduhledžanych Kanstytucyjaj Respubliki Biełaruś i zakanadaŭčymi aktami.
«Heta moža stać asnovaj dla abmiežavańnia hramadzian z dvajnym hramadzianstvam, DNŽ i inšymi dakumientami zamiežnaj dziaržavy ŭ dopusku da dziaržaŭnaj słužby, naznačeńni na peŭnyja pasady i h. d. Takija prapanovy ŭžo hučali ŭ biełaruskaj hramadskaj prastory», — kaža juryst.
«Naša Niva» — bastyjon biełaruščyny
PADTRYMAĆU tych, chto vyjazdžaje za miažu bieź vizy, pačali patrabavać pakazvać DNŽ. Što viadoma
Što zapisana aficyjnaj pryčynaj śmierci adzinaha syna Jarmošynaj?9
Kamientary