24 listapada pačniecca praces pamiž byłym i ciapiešnim prezidentam Polščy.
Lech Valensa patrabuje ad Kačyńskaha admovicca ad jaho słovaŭ nakont taho, što lider «Salidarnaści» — ahient Słužby biaśpieki (tajnaj palicyi Polskaj Narodnaj Respubliki ŭ 1956‑1989 hh.), a taksama vypłaty 100 tys. złotych (kala 34 tys. dalaraŭ) maralnaj kampiensacyi, paviedamlaje wyborcza.pl.
Padstava pozvy — intervju Kačyńskaha ŭ červieni 2008 h. polskamu telekanału Polsat. Razmova tyčyłasia knihi historykaŭ Instytuta nacyjanalnaj pamiaci (INP) Słavamira Cenckieviča i Piatra Hantarčyka «SB i Lech Valensa» («SB a Lech Wałęsa»),
dzie jany napisali, što ŭ pieršaj pałovie 70‑ch Valensa moh być ahientam hdańskaj SB pad mianuškaj «Bolek».
Na słovy žurnalistki kanała, što Valensa — najvialikšy polski aŭtarytet i nie varta nakidvacca na jaho takim čynam, Kačyński zajaviŭ, što «demakratyčnamu hramadstvu treba viedać praŭdu, navat kala jana horkaja». Jon dadaŭ, što pra minułaje Valensy ŭ SB jon viedaje niezaležna ad knižki historykaŭ, jakuju jašče nie čytaŭ.
Valensa ž šmatrazova abviarhaŭ toj fakt, što byŭ «Bolekam». Jon padkreślivaŭ, što z dakumientaŭ INP vynikaje, što nazvu «Bolek» mieła prasłuchoŭka, ustanoŭlenaja na miescy jahonaj pracy, a paśla — usie sabranyja SB materyjały, źviazanyja ź im.
Premjer‑ministr Polščy Donald Tusk zajaviŭ tady, što prezident Kačyński pavinien saromiecca słoŭ pra Valensu, jak pra ahienta «Boleka»
Praz paru dzion paśla intervju Kačyńskaha, Valensa dasłaŭ list prezidentu, u jakim zaklikaŭ admovicca ad «haniebnaj» zajavy. Ale nijakaj reakcyi nie było, tamu Valensa byŭ vymušany źviarnucca ŭ sud.
Kamientary