24 лістапада пачнецца працэс паміж былым і цяпешнім прэзідэнтам Польшчы.
Лех Валенса патрабуе ад Качыньскага адмовіцца ад яго словаў наконт таго, што лідэр «Салідарнасці» — агент Службы бяспекі (тайнай паліцыі Польскай Народнай Рэспублікі ў 1956‑1989 гг.), а таксама выплаты 100 тыс. злотых (каля 34 тыс. даляраў) маральнай кампенсацыі, паведамляе wyborcza.pl.
Падстава позвы — інтэрв’ю Качыньскага ў чэрвені 2008 г. польскаму тэлеканалу Polsat. Размова тычылася кнігі гісторыкаў Інстытута нацыянальнай памяці (ІНП) Славаміра Цэнцкевіча і Пятра Гантарчыка «СБ і Лех Валенса» («SB a Lech Wałęsa»),
дзе яны напісалі, што ў першай палове 70‑х Валенса мог быць агентам гданьскай СБ пад мянушкай «Болек».
На словы журналісткі канала, што Валенса — найвялікшы польскі аўтарытэт і не варта накідвацца на яго такім чынам, Качыньскі заявіў, што «дэмакратычнаму грамадству трэба ведаць праўду, нават каля яна горкая». Ён дадаў, што пра мінулае Валенсы ў СБ ён ведае незалежна ад кніжкі гісторыкаў, якую яшчэ не чытаў.
Валенса ж шматразова абвяргаў той факт, што быў «Болекам». Ён падкрэсліваў, што з дакументаў ІНП вынікае, што назву «Болек» мела праслухоўка, устаноўленая на месцы ягонай працы, а пасля — усе сабраныя СБ матэрыялы, звязаныя з ім.
Прэм’ер‑міністр Польшчы Дональд Туск заявіў тады, што прэзідэнт Качыньскі павінен саромецца слоў пра Валенсу, як пра агента «Болека»
Праз пару дзён пасля інтэрв’ю Качыньскага, Валенса даслаў ліст прэзідэнту, у якім заклікаў адмовіцца ад «ганебнай» заявы. Але ніякай рэакцыі не было, таму Валенса быў вымушаны звярнуцца ў суд.
Цяпер чытаюць
23‑гадовы ахоўнік з Астраўца загінуў за Расію на вайне. Паваяваў ён, відаць, каля месяца14
Каментары