Łatvija źbirajecca ŭvieści elektronnuju čarhu na miažy ź Biełaruśsiu
Łatvija pracuje nad rašeńniem ab uviadzieńni elektronnaj čarhi na miažy ź Biełaruśsiu i Rasijaj, jakaja dazvolić kiroŭcam ustavać u čarhu ŭ zahadzia vyznačanym paradku ŭ kampjutarnaj sistemie. Pra heta Łatvijskamu telebačańniu paviedamiŭ ministr finansaŭ Arviłs Ašeradens, jak piša Reform.by.
Pavodle jaho, heta dazvolić skaracić doŭhija čerhi na miažy.
Kiraŭnik viedamstva prainfarmavaŭ, što ŭžo vydzielili srodki na likvidacyju doŭhich čerhaŭ. Ciapier čerhi na miažy zajmajuć amal dva-try dni. U čaćvier, naprykład, pieršyja hruzaviki možna było ŭbačyć na abočynie šašy prykładna za dva kiłamietry ad mytnaha punkta «Paternijeki».
«Ciapier my pracujem nad uviadzieńniem elektronnych čerhaŭ na miažy. Inšymi słovami, kiroŭca budzie viedać, kali jamu treba jechać na miažu, rehistrujučy svaju čarhu ŭ zahadzia vyznačanym paradku ŭ kampjutarnaj sistemie», — adznačyŭ ministr.
Bačačy dakumienty kiroŭcy, mytniki zmohuć płanavać, jakija pravierki nieabchodnyja dla kankretnaha hruzu.
Adznačajecca, što pryjarytetam dla mytnikaŭ ciapier budzie nie sadziejničańnie handlu, a kantrol za vykanańniem sankcyj.
«Kali my pahladzim na statystyku, to 70% usich pravierak (a 70% — heta sapraŭdy vielizarnaja kolkaść) my ažyćciaŭlajem niepasredna kantrol sankcyjnych tavaraŭ, — paviedamiŭ dyrektar mytnaha ŭpraŭleńnia Słužby dziaržaŭnych dachodaŭ Rajmand Zukułs. — [Papraŭki] taksama abmiažoŭvajuć ruch niekatorych tavaraŭ tranzitam praz terytoryju Rasii, tavaraŭ, pryznačanych dla Centralnaj Azii, skažam, Kyrhyzstana, Kazachstana. I, viadoma, hety sankcyjny režym upłyvaje na ahulny patok».
SK nazvaŭ imiony tych, chto skinuŭ vybuchoŭku na bazu AMAPa ŭ Minsku ŭ 2021 hodzie9
Kamientary