Jeŭrapiejskaja raźviedka: ekanomika Pucina vytrymaje jašče hod vajny

Pavodle acenki pradstaŭnika raźviedki, dziakujučy dadatkovym naftahazavym dachodam rasijskija ŭłady zmohuć finansavać vajnu suprać Ukrainy jak minimum da nastupnaj viasny — a mahčyma, jašče ceły siezon.

Košt rasijskaj nafty Urals, jaki ŭ pačatku hoda apuskaŭsia da $40 za baral i nižej, u druhim kvartale vyras prykładna da $82. U krasaviku—červieni Rasija, pavodle źviestak Centrabanka, atrymała kala $30 miljardaŭ dadatkovych ekspartnych dachodaŭ. U lipieni naftahazavyja pastupleńni ŭ rasijski biudžet dasiahnuli 934 miljardaŭ rubloŭ (kala 11 miljardaŭ dalaraŭ) — na 18% bolš, čym hodam raniej, i ŭ 2,5 raza bolš za pakazčyk zimovych miesiacaŭ.

Vysokija ceny nafty dazvolili Kramlu častkova pakryć biudžetny deficyt i adkłaści momant, kali ekanamičnyja ciažkaści mohuć prymusić Pucina rabić bolš składany vybar adnosna praciahu vajny. Pry hetym fundamientalnyja prablemy rasijskaj ekanomiki nikudy nie źnikli.

Za studzień—lipień deficyt fiederalnaha biudžetu Rasii dasiahnuŭ 6,5 tryljonaŭ rubloŭ (76,5 miljarda dalaraŭ) — heta ŭžo na 70% bolš za pieršapačatkova zapłanavany deficyt na ŭvieś 2026 hod. Pavodle roznych acenak, da kanca hoda jon moža vyraści da 7—8 tryljonaŭ rubloŭ (ad 82,4 da 94,2 miljarda dalaraŭ) i navat bolš.

Adnačasova rasijskaja ekanomika amal pierastała raści. Kali ŭ 2023—2024 hadach VUP pavialičvaŭsia bolš čym na 4% štohod, to ŭ 2025‑m rost skłaŭ kala 1%, a ŭ pieršym paŭhodździ 2026 hoda — tolki 0,6%. Pramysłovaść za miežami vajskova-pramysłovaha kompleksu faktyčna znachodzicca ŭ recesii: abjomy vytvorčaści amal na 5% nižejšyja za ŭzrovień 2024 hoda.

Adnak sami pa sabie ekanamičnyja prablemy naŭrad ci prymusiać Pucina spynić vajnu. Pavodle acenki daśledčycy Peterson Institute for International Economics Eliny Rybakovaj, situacyja pavinna značna pahoršycca. Naprykład, nieabchodny byŭ by praciahły pieryjad cenaŭ na naftu na ŭzroŭni $35—40 za baral. U ciapierašnich umovach taki scenar vyhladaje małavierahodnym.

Amierykanskija čynoŭniki taksama miarkujuć, što realnaje akno dla pieramovaŭ pa Ukrainie moža adkrycca nie raniej za vosień 2027 hoda. Pavodle źviestak The New York Times, u Vašynhtonie čakajuć praciahu bajavych dziejańniaŭ, novaha rasijskaha nastupleńnia zimoj i ŭzmacnieńnia ŭdaraŭ pa ŭkrainskaj infrastruktury.

Nie vyklučajecca taksama novaja mabilizacyja ŭ Rasii abo dalejšaja eskałacyja supraćstajańnia z NATA.

• 0
• 0
• 1
• 3
• 0
• 1
• 5
• 0