Minskaja firma prapanuje mašyny ź Jeŭropy na zamovu pa nierealna nizkich cenach. U čym padvoch?
«Kančatkovaja cana z ulikam dastaŭki i razmytnioŭki ŭ Biełarusi, afarmleńnie kupli praz damovu lizinhu na 48 miesiacaŭ», — tak apisvajuć svaje pasłuhi pradaŭcy, jakija prapanujuć biełarusam nadziva tanna kuplać aŭtamabili na zamovu ź Jeŭropy. Cikava, što z ulikam usich vydatkaŭ na dastaŭku kančatkovaja cana mienšaja, čym taja, za jakuju aŭtamabil pradajuć u Hiermanii. Jak takoje moža być? Kab razabracca, «Naša Niva» źviazałasia z pradaŭcami aŭto ŭ jeŭrapiejskich krainach.
Tańniej, čym u Hiermanii
Usiaho na sajcie kufar.by bolš za sotniu abjaŭ ad kampanii, jakaja prapanuje aŭtamabili ź Jeŭropy na luby hust i kašalok. Jany hatovyja pryvieźci na zamovu jak davoli ŭzrostavyja aŭtamabili koštam ad 5—6 tysiač dalaraŭ, tak i bolš sučasnyja i darahija pa cenach kala $20 000.
Niezaležna ad cany i hoda vypusku, u apisańni da ŭsich mašyn paznačana, što aŭtamabil maje zavodskuju afarboŭku, znachodzicca ŭ biezdakornym stanie i maje poŭnuju historyju ad pieršaha haspadara.
Taksama ŭ apisańni padkreślivajuć, što paznačanaja ŭ abjavie cana kančatkovaja z ulikam dastaŭki i razmytnioŭki ŭ Biełarusi. Afarmleńnie kupli adbyvajecca praz damovu lizinhu na 48 miesiacaŭ.
Usie hetyja abjavy abjadnoŭvaje adno — aŭtamabili na zamovu abychodziacca minimum na 20—30% tańniej, čym anałahi, jakija pradajucca niepasredna ŭ Biełarusi.
Tak, naprykład, Audi A4 z prabieham 130 tysiač kiłamietraŭ, jakuju vydajuć za 2020 hod vypusku, prapanujuć nabyć pad zamovu ŭsiaho za $19 850. Pry hetym anałahičnyja aŭtamabili ŭ Biełarusi pradajuć pa cenach ad 26 tysiač dalaraŭ.
Działki tłumačać, što vyhada dasiahajecca mienavita praz toje, što mašyna kuplajecca ŭ lizinh. Kali kuplać mašynu nie praź lizinh, to vyjdzie značna daražej.
Za sam aŭtamabil treba budzie zapłacić praz bank zamiežnamu pradaŭcu. Paśla apłacić pieravozčyku dastaŭku, a taksama razmytnioŭku — užo paśla dastaŭki aŭto ŭ Biełaruś, tłumačyć pradaviec. Taksama treba pieraličyć 800 rubloŭ na raźlikovy rachunak biełaruskaj firmy. Heta nibyta ŭznaharoda kampanii za toje, što zajmajecca padboram, supravadžeńniem ździełki, robić zapyt dyleru, pravodzić raźliki i biare na siabie abaviazacielstvy pa ŭchvaleńni lizinhu.
Prapanavanaja firmaj schiema vyhladaje niełahična, bo nabyćcio aŭtamabila praź lizinh, naadvarot, musić zrabić kančatkovuju canu bolš vysokaj. Ale zakony łohiki i ekanomiki ŭ hetym vypadku nie pracujuć, bo da spravy padklučajecca «amartyzacyja lizinhu» — joj tłumačyć źjaŭleńnie ekanomii pradaviec.
Znajšli hetuju mašynu ŭ Hiermanii
Častku z aŭto, raźmieščanych na biełaruskim sajcie, možna adšukać na niamieckim partale mobile.de, što daje mahčymaść paraŭnać ceny.
Tuju ž Audi A4, apisanuju vyšej, tam pradajuć amal za 24 tysiačy jeŭra bruta. Cana nieta składaje 20 143 jeŭra (kala $22 000). To-bok navat biez padatku na dadatkovuju vartaść hetaja mašyna ŭ Niamieččynie kaštuje na dźvie tysiačy dalaraŭ daražej, čym jaje prapanujuć u Biełarusi.
Kali dadać da cany nieta navat ilhotnuju razmytnioŭku pamieram 2700 jeŭra, 1300 jeŭra za dastaŭku i jašče kala 350 jeŭra na ŭtylizacyjny zbor i inšyja abaviazkovyja vydatki, to vyjdzie, što hetaja Audi budzie vam kaštavać pryblizna 27 tysiač dalaraŭ.
Kab razabracca, jak u Biełaruś udajecca pryhaniać jaje tańniej, my patelefanavali pradaŭcam hetaj Audi niepasredna ŭ Hiermaniju.
Pacikavilisia, ci jość u ich niejki partnior u Biełarusi, jaki pradaje ich aŭto, na što tam adkazali, što nijakich partnioraŭ u našaj krainie niama. Kansultant adznačyŭ, što mašyna znachodzicca na placoŭcy ŭ Niamieččynie i što jon nie maje nijakaha dačynieńnia da tych, chto moža vykarystoŭvać jahonyja zdymki i vystaŭlać na prodaž aŭto pa niaisnaj canie.
Moža, jość partniory ŭ Niderłandach?
Audi, apisanaja vyšej, nie adziny aŭtamabil, jaki možna adšukać u prodažy jak na biełaruskim, tak i na niamieckim sajtach. Tak, Volvo XC60 2019 hoda ŭ Biełarusi pad zamovu pradajuć za $19 950.
Jak i va ŭsich inšych abjavach, paznačana, što napisanaja cana kančatkovaja z ulikam usich vydatkaŭ na dastaŭku i razmytnioŭku.
Ale my znajšli hety ž samy aŭtamabil u Niderłandach. Tam jaho pradajuć za 19 884 jeŭra bruta, ci 16 433 jeŭra nieta. Darečy, pa fota na «Kufry» vidać, što zdymki padrezanyja, ale dziaržnumar i inšyja momanty nie dajuć padstaŭ dla sumnievu, što heta toj samy aŭtamabil.
U vyniku z ulikam mytnych płaciažoŭ, dastaŭki i inšych vydatkaŭ da cany aŭto ŭ Hałandyi treba dadać jašče amal piać tysiač dalaraŭ. Tamu, jak i ŭ vypadku z Audi, hetaja Volvo musić abyścisia našmat daražej, čym u Biełarusi. I heta navat pry ŭmovie, što razmytnioŭka jaje budzie zroblena z vykarystańniem ilhoty.
My taksama patelefanavali ŭ Niderłandy. Taki aŭtamabil sapraŭdy isnuje, ale ni pra jakich partnioraŭ u Biełarusi pradaviec Volvo nie viedaje.
Schiema nie novaja?
Usie vyšej pieraličanyja dovady śviedčać pra toje, što prapanavanaja staličnaj firmaj schiema kupli aŭto ź Jeŭropy vyhladaje padazrona. Tym bolš što ŭ biełaruskich miedyja i raniej źjaŭlałasia infarmacyja pra padobnyja vypadki, kali niejkija firmy prapanoŭvali aŭto na zamovu pa nierealna nizkich cenach.
Pra ich partał «Aŭtabiznes» pisaŭ jašče ŭ kancy 2019 hoda. U pieršaj pałovie 2020 hoda taksama ŭ ŚMI traplała infarmacyja pra ludziej, jakija «nabyvali» aŭtamabili na zamovu pa nierealna nizkich cenach. Tady dziakujučy namahańniam žurnalistaŭ była zaviedziena kryminalnaja sprava na sumnieŭnych pradaŭcoŭ, paciarpiełymi pa jakoj ličylisia dziasiatki čałaviek, jakija zapłacili hrošy za aŭto, ale tak jaho i nie atrymali. Tym nie mienš pa hetaj schiemie praciahvali pracavać i ŭ 2021 hodzie. Va ŭsich vypadkach machlary abhruntoŭvali nizkija ceny kuplaj aŭto praź lizinh abo niejkija admysłovyja partniorskija prahramy.
Letaś pra padobnych działkoŭ pisała i «Naša Niva», kali praz rekłamu ŭ Instagram ludziam taksama prapanoŭvali aŭto ź Jeŭropy pa sałodkich cenach, jakija dasiahalisia dziakujučy toj samaj «amartyzacyi lizinhu».
«Naša Niva» — bastyjon biełaruščyny
PADTRYMAĆJak skłaŭsia los chłopca ź viadomaha žyćcieśćviardžalnaha fota studenckaha maršu-2020?2
Kamientary