U Nacyjanalnym histaryčnym archivie — novy dyrektar. Jon doŭhi čas pracavaŭ u KDB
Nacyjanalny histaryčny archiŭ Biełarusi 14 žniŭnia ŭznačaliŭ Michaił Hłušakoŭ.
14 žniŭnia dyrektar Departamienta archivaŭ i spravavodstva Miniusta Aleh Voinaŭ na ahulnym schodzie pracoŭnaha kalektyvu Nacyjanalnaha histaryčnaha archiva pradstaviŭ novaha dyrektara ŭstanovy — Michaiła Hłušakova.
Voinaŭ vykazaŭ upeŭnienaść, «što dziejnaść M. Hłušakova ŭ minułym, jaho žyćciovy dośvied i viedy buduć spryjać efiektyŭnamu rašeńniu zadač, jakija stajać pierad Nacyjanalnym histaryčnym archivam Biełarusi».
Michaił Hłušakoŭ naradziŭsia ŭ 1972 hodzie ŭ Minsku. U 1994 hodzie skončyŭ Biełaruski dziaržaŭny technałahičny ŭniviersitet.
Pa źviestkach «Našaj Nivy», doŭhi čas słužyŭ u KDB.
Da pryznačeńnia dyrektaram NHAB niekalki miesiacaŭ pracavaŭ kansultantam u adździele arhanizacyjnaj raboty, infarmacyi i vykarystańnia dakumientaŭ Departamienta archivaŭ i spravavodstva.
Apošnija miesiacy archivy i muziei padviarhajucca pieryjadyčnaj čystcy ad niadobranadziejnych supracoŭnikaŭ. Tak, tolki z Nacyjanalnaha histaryčnaha archiva za apošni hod zvolnili kala 15-ci čałaviek.
Papiaredni dyrektar archiva taksama byŭ siłavikom. Hienierał-major Aleh Voinaŭ raniej byŭ pamočnikam ministra abarony pa pytańniach mižnarodnaha vajskovaha supracoŭnictva. Jaho pastavili na čale archiva ŭ mai 2022-ha. U studzieni 2023 hoda jaho pavysili i pieraviali ŭ Departamient kiravać.
Kamientary