Biełarusy raskazali, što adbyvajecca na miažy ź Litvoj napiaredadni mahčymaha zakryćcia KPP
U Jeŭrasajuzie ŭsio čaściej prapanujuć zakryć abo ŭziać na asablivy kantrol miažu ź Biełaruśsiu, a Litva ŭžo blizkaja da kankretnych krokaŭ: u Vilni anansavali mahčymaje prypynieńnie pracy KPP «Šumsk» («Łoša» ŭ Biełarusi) i «Ćvierač» («Vidzy»). Pieršapačatkova ŭ płanach fihuravała data 15 žniŭnia, ale ŭ vyniku miery adkłali minimum da 18-ha. Vydańnie Blizko.by daviedałasia, da čaho rychtavacca na biełaruska-litoŭskich pamiežnych pierachodach, u biełarusaŭ, jakija zusim niadaŭna mieli ź imi spravu.
«Vielmi šmat ilhotnikaŭ»
Jahor u pazaminułyja vychadnyja jeździŭ u Litvu praz «Łošu» — mienavita tut litoŭski bok moža zakryć punkt propusku. Čaściej za ŭsio mužčyna maje spravu z polskaj miažoj, tamu navinoj dla jaho była pravierka techahladu, jaki tam nie patrabujecca.
«Ź niezvyčajnaha mahu adznačyć, što litoŭcy prosiać techahlad. Ale pra heta ŭsiudy pišuć, i my byli hatovyja. Na ŭsie pracedury syšło chvilin 7—10. Usio standartna. Nadhlad zvyčajny. Dva z troch čamadanaŭ navat nie adčynili. Pytańniaŭ niestandartnych nie zadavali», — dzielicca surazmoŭca.
Tym nie mienš u čarzie na miažy biełarus pravioŭ vosiem hadzin.
«Stajali doŭha. Pryjechali ŭ 09:30, prajšli ŭ 17:30. Ale heta «Łoša». Jechać tudy bieź ilhot było pamyłkaj. Tam jeździć vielmi šmat ilhotnikaŭ. Tamu doŭha stajali. Ja raniej zaŭsiody jeździŭ praz Polšču. Tam takoj prablemy nie zaŭvažaŭ. U «Łošy» takaja situacyja ŭ suviazi z tym, što pierachod maleńki i nie paśpiavaje pieratravić takuju kolkaść ludziej. Dumaju, na vialikich KPP heta budzie prajaŭlacca nie tak vidavočna», — razvažaje kiroŭca.
Pa adčuvańniach mužčyny, zamiežnyja pamiežniki nie stali ŭdzialać biełarusam bolš uvahi. A suajčyńnikam jon daŭ niekalki rekamiendacyj.
«Lepš za ŭsio zahadzia vyvučać situacyju na punktach propusku i abjazdžać Łošu bokam, kali niama lhot. Jašče raz ja b pajechaŭ praz «Kamienny Łoh», «Katłoŭku» abo «Bieniakoni», — kaža Jahor.
«Raźviarnuŭsia i pajechaŭ dadomu»
Maksim čaćviorty hod pracuje kiroŭcam u Litvie. Dva miesiacy jon pracuje, a miesiac — doma, ale hrafik źmienny: rabotniki mohuć damovicca ź firmami.
Čaściej za ŭsio mužčyna jeździć u susiedniuju krainu praz «Łošu», radziej — praz «Katłoŭku». Ale mienavita hetym punktam propusku jon vyrašyŭ skarystacca 14 žniŭnia.
Z 22:30 biełarus stajaŭ amal da 10-j ranicy — takoha ź im jašče nie było.
«U vyniku pierad samaj biełaruskaj miažoj ja raźviarnuŭsia i pajechaŭ nazad. Mnie treba było pryjechać u Litvu da 8 ranicy, a prykładna a pałovie dziasiataj ja jašče stajaŭ pierad šłahbaumam. Pryčym maja mašyna była daloka nie pieršaj — pierad saboj bačyŭ jašče kala 10-ci aŭtamabilaŭ. Na majoj pamiaci heta samaje doŭhaje čakańnie. Navat nie viedaju, z čym byli źviazanyja hetyja prablemy. Ja padyšoŭ da biełaruskich pamiežnikaŭ i spytaŭ: «Čamu tak doŭha?» Jany kažuć: «Jak litoŭcy zapuskajuć, tak prapuskajem i my. U nas usio prachodzić chutka». Mnie ž, tak jak ja siońnia spaźniŭsia, ciapier na pracu tolki ŭ piatnicu, tamu pajechaŭ dadomu».
Ale Maksim zapeŭnivaje: da hetaha vypadku prablem z traplańniem u Litvu ŭ jaho nie było. Pamiežniki z abodvuch bakoŭ zaŭsiody pracavali karektna i paźbiahali zališniaj pratakolnaści, bačačy niaznačnyja parušeńni.
«U pryncypie, za niekalki hadoŭ pracy nie mahu ŭspomnić niehatyŭnaha dośviedu. Moža być, da tych, chto časta jeździć na zakupy, staŭleńnie na miažy inšaje. My ž raz na paru miesiacaŭ prajazdžajem miažu, nie nabirajučy vielmi šmat rečaŭ, — nie skažu, što nas uzmocniena nadhladajuć. Naadvarot, byvaje, što na niejkija drobiazi pamiežniki — jak litoŭskija, tak i biełaruskija — zapluščvajuć vočy. Naprykład, na paru kiłahramaŭ lišku.
Viedaju, što ciapier na miažy padaražeła aŭtastrachoŭka. U bankach, jakija jaje robiać prosta kala pierachodaŭ, jana kaštuje 60 jeŭra. Ale ŭsie hetyja pytańni vyrašajucca. Možna zrabić «aŭtahramadzianku» dystancyjna, ja za heta płaciŭ 28 jeŭra.
Jašče varyjant — vyrašyć pytańnie praz znajomych z taho boku: dasyłaješ im rachunak — jany apłačvajuć, a ty pieravodziš hrošy na ich kartu. Ale heta, badaj, adzinaja prablema — bolš ničoha hłabalnaha ja nie ŭspomniu. Litoŭcy padychodzili da mianie i pytalisia, jak apłacić zbor za pierasiačeńnie miažy. Banka niama, a zrabić heta ź litoŭskaj karty jany nie mohuć».
Jašče niekalki miesiacaŭ tamu kiroŭca stajaŭ u čerhach pa dźvie-try hadziny i miažu prachodziŭ chutka. Z čym byli źviazanyja siońniašnija prablemy, zastajecca tolki zdahadvacca.
«Mahčyma, z-za rostu kursa jeŭra mnohija litoŭcy pačali čaściej jeździć u Biełaruś pa tavary, bo im bolš vyhadna zakuplacca ŭ nas. Tamu što litoŭskich mašyn šmat, praktyčna praz adnu. Ciapier zavis u čarzie amal da 10-ci ranicy. Da hetaha «rekord» pastavili miesiacy z try tamu: kala «Łošy» stajali šeść-siem hadzin. Za vyklučeńniem dvuch hetych vypadkaŭ, pieraadolvali hadziny za dźvie-try maksimum luby pamiežny pierachod: «Kamienny Łoh», «Łošu», «Katłoŭku».
Maksim dadaje: za apošni čas pravierki ź litoŭskaha boku nie ŭzmacnilisia. Naadvarot, raniej jany byli navat krychu bolš pilnymi.
«Zaŭsiody jeździŭ u Litvu na svajoj mašynie — nikoli nie karystaŭsia hramadskim transpartam. Viadoma, aŭtobusy i maršrutki miažu prachodziać chutčej. Ale i na asabistym aŭto ŭ čałavieka nie budzie prablem, kali ŭsio ŭ paradku z dakumientami. Hod-dva tamu pytańniaŭ zadavali navat bolš: vyvučali pracoŭnyja damovy, cikavilisia, što za firmy. Ciapier pra heta nichto nie pytajecca.
U mianie nijakich pytańniaŭ: niama kryŭdy abo nierazumieńnia ni da litoŭskaha, ni da biełaruskaha boku. Usie pamiežniki adekvatnyja i ŭsio razumiejuć. Paŭtarusia, mahčyma, da tych, chto jeździć časta, vozić z saboj techniku, pytańniaŭ bolš. Čuŭ, što jość baza danych ludziej, jakija trapilisia na kantrabandzie. Ich nadhladajuć bolš uvažliva, mohuć źniać abšyŭku. Ja nikoli takim nie zajmaŭsia, tamu prablem nie ŭźnikała».
Surazmoŭca pryznajecca: nastupnym razam jon vyjedzie raniej.
«Vyjedu ŭ čaćvier, kab takaja situacyja nie paŭtaryłasia. Na pracy mnie heta ničym nie pahražaje. Ja prosta najeździŭ lišnija 700 kiłamietraŭ i, hruba kažučy, straciŭ paru dzion zarobku. A sankcyj nijakich nie budzie. Pracadaŭcu papiaredziŭ i situacyju patłumačyŭ — jon pastaviŭsia z razumieńniem. Usie ž viedajuć, što ŭ darozie ŭsiakaje moža być: pałomka, ramontnyja raboty na trasie. Chutčej za ŭsio, znoŭ pajedu praz «Katłoŭku».
Na inšych KPP ciapier situacyja ž nie lepšaja: staić usia miaža. Mahčyma, u litoŭcaŭ adbyŭsia kampjutarny zboj. Takoje byvaje na našym i na tym baku. Čuŭ i pra mahčymaje zakryćcio pamiežnych pierachodaŭ. Pa sutnaści, trafik na inšych kirunkach paśla hetaha pavialičycca, ale tut nie adhadaješ».
U KDB pačali vyklikać ludziej, jakija niadaŭna prachodzili polska-biełaruskuju miažu — krynicy
Apache, Abrams, HIMARS i h. d. Minabarony Polščy płanuje surjoznaje ŭmacavańnie miažy ź Biełaruśsiu i zakryćcio «Bresckaj bramy»
«Nie pavinna być tak, što ŭ adzin dzień my zaprašajem, a ŭ druhi — departujem» — były premjer ab prablemie biełarusaŭ u Litvie
Litva pastaviła na miažy ščyty z papiaredžańniami pra ryzyki pry pajezdkach u Biełaruś
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin8
Kamientary