Apaznali pa videa ź dziciom na rukach. Jak eks-śledčaha i jahonuju žonku asudzili za ŭdzieł u akcyjach pratestu
Sudździa Julija Ščotkina za ŭdzieł u dźviuch akcyjach pratestu pryznačyła Alaksandru i Alesi Suško pa try hady «chatniaj chimii». Paśla abviaščeńnia prysudu Alaksandra vyzvalili ŭ zale suda paśla amal čatyroch z pałovaj miesiacaŭ źniavoleńnia.
Sud Leninskaha rajona Minska 2 žniŭnia asudziŭ pa «narodnym» artykule 342 (aktyŭny ŭdzieł u dziejańniach, jakija hruba parušajuć hramadski paradak) viadomaha śledčaha, byłoha načalnika ŭpraŭleńnia pa rasśledavańni złačynstvaŭ suprać infarmacyjnaj biaśpieki i intelektualnaj ułasnaści SK, Alaksandra Suško i jahonuju žonku Alesiu. «Viasna» raspaviadaje padrabiaznaści spravy.
Alaksandr Suško ŭznačalvaŭ upraŭleńnie pa rasśledavańni złačynstvaŭ suprać infarmacyjnaj biaśpieki i intelektualnaj ułasnaści Śledčaha kamiteta. Jon vioŭ mnostva rezanansnych spraŭ, u pryvatnaści vialikuju «spravu ajcišnikaŭ», pa jakoj prachodziŭ Viktar Prakapienia. U 2020-m hodzie Alaksandr publična vystupiŭ za spynieńnie masavaha hvałtu i dyjałoh. Paśla zvalnieńnia z orhanaŭ Suško pracavaŭ u Group-IB — bujnoj kampanii ŭ śfiery kibierbiaśpieki, a potym, miarkujučy pa adkrytaj infarmacyi, u jaje daččynaj kampanii FACCT (Fight Against Cybercrime Technologies).
Alaksandra zatrymali 22 sakavika hetaha hoda i źmiaścili pad vartu. Alesia Suško znachodziłasia da suda na voli pad asabistym paručalnictvam. U siamji dvoje dziaciej.
Muža i žonku asudzili 2 žniŭnia ŭ sudzie Leninskaha rajona za ŭdzieł u maršach u 2020 hodzie.
Dokazami pa spravie prachodzili fotazdymki z akcyj pratestu na noŭtbuku Alaksandra, a taksama videazapis na adnym ź internet-sajtaŭ, dzie na fonie supracoŭnikaŭ milicyi znachodziacca Alesia i Alaksandr ź dziciom na rukach.
Zhodna ź viersijaj abvinavačańnia, Alaksandr Suško na adnoj z akcyj pratestu, «demanstrujučy ŭ jakaści pratesnaha simvał V-padobny žest siarednim i ŭkazalnym palcami pravaj ruki, z žonkaj Alesiaj stajali i ruchalisia pa prajeznaj častcy, błakavali i zastupali šlach transpartnym srodkam, u vyniku čaho hetyja dziejańni paciahnuli parušeńnie pracy transpartu, jakoje vyjaviłasia ŭ spynieńni transpartu na terytoryi horada Minska».
Alaksandr Suško na sudzie pryznaŭ vinu całkam i raskajaŭsia. Jon raspavioŭ, što ź miedyja jon viedaŭ ab niezakonnaści ŭdziełu ŭ masavych šeściach, jakija prachodzili ŭ stalicy ŭ žniŭni-vieraśni 2020 hoda. Adnak, niahledziačy na papiaredžańni, sumiesna z žonkaj i jaje znajomaj udzielničali ŭ masavych mierapryjemstvach. Tak, jany prybyli na adnu z akcyj na hramadskim transparcie, paśla čaho dałučylisia da hrupy hramadzian ź bieł-čyrvona-biełaj simvolikaj. Jon raskazaŭ, što abodva razy bačyŭ supracoŭnikaŭ milicyi, jakija patrabavali razyścisia, adnak ich patrabavańni nie byli vykananyja. Taksama raskazaŭ, što rabiŭ fotazdymku padčas udziełu ŭ akcyjach pratestu, u tym liku znachodziačysia na prajeznaj častcy, na svoj mabilny telefon.
Alesia Suško taksama vinu pryznała, ale ad dačy pakazańniaŭ admoviłasia.
U vyniku sudździa Julija Ščotkina pryznačyła abaim pa try hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaja chimija»). Zhodna z pastanovaj suda, noŭtbuk Lenovo viarnuli ŭ arhanizacyju, dzie pracavaŭ Alaksandr, «pry hetym źniščyŭšy ekstremisckuju infarmacyju, jakaja źmiaščajecca ŭ im».
Što majecca na ŭvazie pad apošnim — nie ŭdakładniajecca.
Paśla abviaščeńnia prysudu Alaksandra vyzvalili ŭ zale suda paśla amal čatyroch z pałovaj miesiacaŭ źniavoleńnia.
Pieršaja vice-mer Minska Nadzieja Łazarevič prajšła praz zatrymańnie, muž zastaŭsia ŭ SIZA11
Kamientary