Pucin: Kali Armienija pryznała, što Karabach — častka Azierbajdžana, to pra što razmova?

«My prapanoŭvali taki varyjant urehulavańnia, pry jakim Karabach, Kielbadžarski i Łačynski rajony zastavalisia b pad jurysdykcyjaj Armienii», — zajaviŭ Uładzimir Pucin na plenarnaj siesii Uschodniaha ekanamičnaha forumu va Uładzivastoku, paviedamlaje news.am.

Adkazvajučy na pytańnie ab «razvarocie Armienii», kiraŭnik rasijskaj dziaržavy adznačyŭ:

«Ja nie dumaju, što jość razvarot. My bačym i razumiejem, što adbyvajecca. Pra heta možna šmat kazać. My prapanoŭvali svaje varyjanty ŭrehulavańnia, heta dobra viadoma. Armienija kantralavała siem rajonaŭ, jakija pakinuła pad svaim kantrolem paśla viadomaha armiana-azierbajdžanskaha kanfliktu.

My prapanoŭvali damovicca z Azierbajdžanam takim čynam, kab dva rajony — Kielbadžarski i Łačynski — faktyčna zastalisia pad jurysdykcyjaj Armienii i ŭvieś Karabach. Ale armianskaje kiraŭnictva z hetym nie pahadziłasia, choć my sprabavali pierakanać armianskaje kiraŭnictva na praciahu 10 ci 15 hadoŭ.

Roznyja varyjanty, ale ŭ kančatkovym vyniku ŭsio zvodziłasia da hetaha. Na naša pytańnie: što budziecie rabić, nam adkazvali — budziem zmahacca. U kančatkovym vyniku ŭsio pryjšło da toj situacyi, jakaja ciapier skłałasia. Ale sprava nie tolki ŭ vynikach apošniaha kanfliktu. Armianskaje kiraŭnictva, pa sutnaści, pryznała suvierenitet Azierbajdžana nad Karabacham.

(…) Heta rašeńnie siońniašniaha armianskaha kiraŭnictva. A kali tak, kažuć nam, to vy zaraz usie pytańni, kali vy chočacie čymści zajmacca pa Karabachu, pavinny z nami vyrašać na dvuchbakovaj asnovie. A što nam skazać, tut i skazać niama čaho, kali sama Armienija pryznała Karabach častkaj Azierbajdžana.

Adkazvajučy na pytańnie ab pretenzijach Armienii da RF i ADKB i nieakazańni dapamohi, Pucin zaŭvažyŭ: «Kali Armienija pryznała, što Nahorny Karabach — heta častka Azierbajdžana, to pra što razmova? Klučavy składnik usioj prablemy — status Karabacha vyznačyła sama Armienija. U hetym ža ŭsia prablema».

***

Uvosień 2020 hoda ŭ čas vajny pamiž Armienijaj i Azierbajdžanam, jakaja skončyłasia pieramohaj apošniaha, Nahorny Karabach straciŭ častku terytoryi, a taksama było vyrašana, što Kielbadžarski, Ahdamski i Łačynski rajony (pamiž Karabacham i Armienijaj) pavinny być viernutyja pad azierbajdžanski kantrol.

U śniežni 2022 hoda Azierbajdžan zabłakavaŭ Łačynski kalidor — adzinuju darohu, jakaja złučaje Armieniju i Nahorny Karabach. Pa im u rehijon dastaŭlalisia ŭ tym liku humanitarnyja hruzy i paliva. U siaredzinie žniŭnia 2023 hoda MZS Armienii paviedamiła pra niedachop vady i charčavańnia ŭ Nahornym Karabachu. Azierbajdžan prapanoŭvaje humanitarnuju dapamohu, ale aficyjny Ściepanakiert naadrez admaŭlajecca, zajaŭlajučy, što ježa moža być atručanaja.

• 0
• 3
• 0
• 3
• 7