U Biełarusi «narmalizujuć» zasłužanych piensijanieraŭ — pry niepavazie da dziaržorhanaŭ ich pazbaviać pavyšanaj piensii

Pałažeńniem vyznačany ŭmovy, paradak pryznačeńnia i vypłaty piensii za asablivyja zasłuhi pierad Biełaruśsiu. Prava na jaje majuć hramadzianie, jakija pastajanna pražyvajuć na terytoryi krainy i majuć pierad joj asablivyja zasłuhi.

Na takuju piensiju ​​mohuć pretendavać hieroi Biełarusi, Savieckaha Sajuza, Sacyjalistyčnaj pracy, hramadzianie, uznaharodžanyja šeraham vysokich dziaržuznaharod, žančyny, jakija naradzili i vychavali dzieviać i bolš dziaciej i majuć za heta adpaviednyja ŭznaharody, łaŭreaty dziaržpremij, vybitnyja spartsmieny — pieramožcy i pryziory Alimpijskich, Paralimpijskich, Deflimpijskich hulniaŭ, čempijony śvietu i Jeŭropy i inšyja.

Piensija za asablivyja zasłuhi taksama moža pryznačacca hramadzianam, jakija zajmali ŭ krainie vyšejšyja dziaržpasady. Heta členy biełaruskaha ŭrada, staršyni abłvykankamaŭ i Minskaha harvykankama paśla spynieńnia imi raboty na takoj pasadzie.

Kolki składaje piensija za asablivyja zasłuhi

Pamier pavyšeńnia za asablivyja zasłuhi vyznačajecca kamisijaj u kožnym kankretnym vypadku z ulikam asablivych zasłuh hramadzianina i nie moža pieravyšać 250 pracentaŭ minimalnaha pamieru piensii pa ŭzroście.

Ale pamier pavyšeńnia za asablivyja zasłuhi moža być jašče pavialičany kamisijaj u indyvidualnym paradku pry najaŭnaści novych (dadatkovych) źviestak ab asablivych zasłuhach pierad Respublikaj Biełaruś hramadzianina, a taksama pry jaho ŭznaharodžańni ordenam abo miedalom Respubliki Biełaruś (za vyklučeńniem jubilejnaj). Pry hetym pamier pavyšeńnia za asablivyja zasłuhi z ulikam pavieličeńnia nie moža pieravyšać 250 pracentaŭ minimalnaha pamieru piensii pa ŭzroście.

Za što mohuć pazbavić piensii za asablivyja zasłuhi

Piensii za asablivyja zasłuhi možna pazbavicca ŭ vypadkach pryciahnieńnia asoby da kryminalnaj adkaznaści (niezaležna ad źniaćcia abo pahašeńnia sudzimaści i inš.),

u vypadkach ažyćciaŭleńnia asobaj dziejnaści, jakaja supiarečyć intaresam nacyjanalnaj biaśpieki krainy, jaje niepavažlivaha staŭleńnia da dziaržaŭnych i hramadskich instytutaŭ, kanstytucyjnaha ładu.

Taksama ŭ vypłacie takoj piensii mohuć admović, kali hramadzianie ździejśnili šerah administracyjnych pravaparušeńniaŭ suprać paradku kiravańnia, hramadskaha paradku i hramadskaj maralnaści.

• 2
• 0
• 5
• 7
• 2
• 1
• 5
• 0