«Na pieršaje spatkańnie pryvioz 53 ružy». Jak žančyna ŭ svaje 50+ znajomicca ŭ internecie
Alenie 53 hady, žyvie ŭ Mahilovie. Jana efiektnaja žančyna, jakoj nijak nie dasi jaje ŭzrostu. U razvodzie ŭžo amal try hady, i, kali syn źjechaŭ vučycca ŭ inšy horad, stała zadumvacca pra ŭładkavańnie asabistaha žyćcia. Jak heta ŭ jaje atrymlivajecca, piša «Viečiernij Bobrujsk».
«Nikoli nie viedaješ, chto pryjdzie na sustreču»
Znajomicca Alena čaściej za ŭsio praz mabilnyja prahramy Tinder, sajty Tabor.ru i Love.ru.
«Rehistravałasia na sajtach znajomstvaŭ z metaj sustreć dobraha mužčynu dla žyćcia, ale pakul z hetym napružna, — śmiajecca surazmoŭca. — Adekvatnych mała. Ci to mužčyny takija, ci to mnie traplajecca nie toje. Ci narmalnyja na sajtach nie siadziać? Ale ja ž narmalnaja, i taksama na sajcie. Nu, a dzie jašče znajomicca? U mianie jość prykłady, kali paśla znajomstva na sajtach maje pryjacielki navat vychodzili zamuž».
I chaj pakul što internet-znajomstvy nie apraŭdali jaje čakańniaŭ, Alena bačyć u ich tolki plusy:
«Možna vieści aktyŭnaje žyćcio dziakujučy spatkańniam i jak minimum paru razoŭ na tydzień vybiracca ŭ kaviarniu abo na prahułki. Jość stymuł pryhoža nafarbavacca i apranucca. Zaŭsiody hraje niejki adrenalin, bo nikoli nie viedaješ, chto pryjdzie na sustreču. Pierapiski i stelefanoŭvańni — heta adno, a ŭbačyć čałavieka tvaram da tvaru i pahutaryć — zusim inšaje.
Samyja adekvatnyja mužčyny — na Tinder, na astatnich płatformach ź pieršych chvilin pierapiski ŭžo «chaču ciabie», «pryjazdžaj u hości», — raskazvaje Alena.
«Vielmi šmat piša dalnabojščykaŭ»
«Bolšaść mužčyn, jakija mnie pišuć, adkidaju jašče na etapie pierapiski, razumieju, što «nie majo» i nie marnuju čas. Vielmi šmat piša dalnabojščykaŭ. Jak potym vyśviatlajecca — žanatych. Hetaha nie razumieju. Ciabie doma niama miesiacami, tut u ciabie žonka i dzieci, a ty šukaješ pryhod?»
Alena źviartaje ŭvahu, što žančyny vyhladajuć lepš za mužčyn-adnahodkaŭ, i časta realny ŭzrost čałavieka, jaki pryjšoŭ na spatkańnie, nie supadaje ź jaho źniešnaściu:
«Paznajomiłasia z adnym 50-hadovym. Na sustreču pryjšoŭ dzied.
Jašče z adnym majem kamunikacyju, pierapisvajemsia, u ankiecie napisana 42 hady. Pryjšoŭ na spatkańnie, hladžu — a jamu jak minimum 60. Fatahrafija na sajcie była nibyta ničoha. Chutčej za ŭsio staraja abo adretušavanaja. Pačynajem kamunikavać, i ja razumieju, što jamu sapraŭdy 42. Ale pobač ź im ja vyhladaju tady na tryccać, a to i mienš.
Bolš-mienš na svoj uzrost vyhladajuć 35-hadovyja mužčyny. Sustrakałasia niejak z 30-hadovym. Jon kaža: «Nu, ja baču, što ty za mianie starejšaja, tabie hadoŭ z 35-36». Ja nie stała pryznavacca, što jon mocna pamylajecca.
Pišuć i 20-hadovyja, ale ja ich adrazu adkidaju. U asnoŭnym moj dyjapazon 35-56 hadoŭ».
«Šmat mužčyn skvapnych, dla jakich i kubak kavy niešta nievierahodnaje»
Časta internet-znajomstvy zakančvajucca tolki adnoj sustrečaj. Byvaje, što mužčyny nie zacikaŭlenyja dalej praciahvać znosiny, a byvaje, što nie choča i Alena:
«Pryjšła na sustreču z maładym mužčynam. Adukavany, z dobraj pracaj. Ale dvuch słoŭ źviazać nie moža. Navošta mnie praciah?
Ź inšym hulali pa Padmikolli. Dadomu nie ciahnuŭ, adnak i kavaj nie pačastavaŭ. Ale razmaŭlali cikava. Ja b jašče raz ź im sustrełasia, ale nie patelefanavaŭ bolš.
Šmat mužčyn skvapnych, dla jakich i kubak kavy niešta nievierahodnaje. Adzin kavaler kupiŭ kavu na zapraŭcy i pavioz na Śviatoje voziera hladzieć zachad sonca. I jašče raskazvaŭ, jak sustrakaŭsia ź dziaŭčynaj, jakaja pryvoziła jamu dadomu pradukty, a jon tolki zavarvaŭ harbatu. I heta mužčyna? Samiec-zdabytčyk? Naturalna, bolš nie adkazvała na jahonyja zvanki.
Mianie pałochaje, što vielmi mnohija mužčyny hatovyja ŭstupać u pałavyja adnosiny nie zaścierahajučysia. Jak heta tak? Na majo ździŭleńnie atrymlivaju adkaz: «Ja sabie daviaraju». Nu i daviaraj, choć ja sumniavajusia, što mužčyny časta chodziać pa lekarach. A ci možna daviarać žančynie, jakuju viedaješ tolki pa pierapiscy? Toje, što jana pryhožaja i prystojnaja, ničoha nie patłumačyć pra jaje zdaroŭje».
«Na pieršaje spatkańnie paklikaŭ u les na šašłyki»
«Stvarajecca ŭražańnie, što mužčyny pierastali napružvacca i imknucca zavajavać žančynu. Kudyści zaprasić, kvietki padaryć. Nie treba biaremia ružaŭ, ćvicie bez — dyk narvi bezu, kupi bukiecik u pierachodzie ŭ babuli.
Za hod internet-znajomstvaŭ ja tolki dva razy atrymlivała kvietki. Adzin minčuk pryjazdžaŭ na vychadnyja, pryvioz 53 ružy. Było vielmi pryjemna.
I jašče vialiki bukiet ruž daryŭ na pieršaje spatkańnie mahiloviec. Moj adnahodak, maje dobry biznes. Ale ŭvieś u spravach, niama času sustrakacca. Pieršy čas jašče telefanavaŭ, a potym źnik biasśledna.
Zasmučaje, što mužčyny stali mlavymi, biezynicyjatyŭnymi i akramia łožka ich ničoha nie cikavić. Vyklučeńniaŭ niašmat.
Adzin na pieršaje spatkańnie paklikaŭ u les na šašłyki. Pa pierapiscy zdaŭsia adekvatnym i ja pahadziłasia. Pryjechaŭ narmalny 50-hadovy mužčyna — z rašotkaj, miasam i harodninaj. Chutka sabraŭ stolik i kresły, padsmažyŭ miasa. Čałaviek akazaŭsia cikavym i nie namiakaŭ na praciah u jaho doma.
Ź inšym schadzili ŭ kinateatr. Miarkujučy pa tym, što jaho tam usie rabotniki viedali, u kino jon vodzić dziaŭčat rehularna. Pryhožy, nakačany, niahledziačy na svaje 54 hady. Raźvićcia adnosin nie było, ale ja dobra praviała viečar za cikavym filmam i papkornam».
Alena kaža, što jana nie patrabavalnaja, nie zadziraje płanku. Dzieści sastupaje, na niešta zapluščvaje vočy:
«Užo nie šukaju čałavieka dla žyćcia, chaj budzie dla spatkańniaŭ. Ale heta taksama pavinien być narmalny čałaviek. Niaŭžo budu raźmieńvacca?
Pakul u spatkańniach ja baču tolki stanoŭčyja momanty, hladžu na ŭsio pazityŭna. Minus tolki adzin — pakul svajho mužčyny nie sustreła».
Čytajcie taksama:
«Druhoha takoha prosta nie vytrymaju». Niaŭdałyja pieršyja spatkańni vačyma chłopcaŭ
«Biełarusy buduć cichieńka dumać svajo. A vada kamień točyć, dyj Łukašenka fizična nie viečny». Hłyboki manałoh byłoha mytnika Alesia Jurkojcia6
Kamientary
Lepš nijakaha mužyka, čym chamaŭ ci žyhałaŭ. Dy i vartaść takich pačakunoŭ dyj papałamščykaŭ zanadta pieraacenaja. Na ščaście, siarod biełaruskich dy i ŭvohule mužčynaŭ chapaje narmalnych. A inšym niachaj ščaścić na kanapie pad pivas.