«Hałoŭny sakret — u karaniach». Jak pravilna vybrać jalinku ŭ haršku?
Navahodniaje chvojnaje dreva, pierad tym, jak jaho śsiakuć, raście niekalki hadoŭ, a płastykavyja jalinki chutka znošvajucca i stanoviacca dadatkovaj krynicaj zabrudžvańnia hleby. Najbolš ekałahičnym varyjantam apošnim časam ličycca jalinka ŭ haršku, jakuju možna paśla śviataŭ vysadzić u ziamlu. Adnak mnohija sutykajucca z tym, što dreva nie dažyvaje da viasny. Jak hetaha paźbiehnuć? Žurnalistka «Zialonaha partała» padzialiłasia svaim dośviedam i padkreśliła važnyja momanty pry vybary chvojnaj raśliny.
Nasamreč, raścić jalinku ŭ kvatery całkam mahčyma, ale treba pakłapacicca ab vykanańni peŭnych umovaŭ.
Jak pravilna vybrać chvojnaje dreva
«Pieršy raz my ź siamjoj kupili žyvuju jełku ŭ Minsku piać hod tamu. Chaciełasia, kab hety navahodni atrybut byŭ ekałahičnym, i kab dreva nie skončyła svoj šlach na śmietniku.
My adrazu paviedamili pradaŭcu pra našyja płany pasadzić jełku viasnoj, i nam padkazali łajfchaki — jak vybrać bolš žyvučuju raślinu. Akazałasia, što hałoŭny sakret — u karaniach».
Kali dreva było pierasadžana ŭ harščok niepasredna pierad tym, jak pastupiła ŭ prodaž, to, vierahodna, jano nie vyžyvie. Lepš vybirać užo ŭkarenienyja raśliny.
Taksama varta źviarnuć uvahu na pamier harška, tamu što niekatoryja zavodčyki zanadta mocna padrazajuć karani pierad prodažam, kab harščok vyhladaŭ mienš hruvastkim. U takoj raśliny šancaŭ na vyžyvańnie amal niama.
Tamu, kali vy bačycie vysokuju jełku ŭ niepraparcyjna maleńkim haršku, lepš udakładnić u pradaŭca, ci nie padrezanyja ŭ jaje karani.
Taksama važna ŭličyć, jakija vidy chvojnych drevaŭ charakternyja dla vašaha rehijonu, kab jano paśpiachova pryžyłosia paśla pasadki ŭ hlebu.
Jak dahladać žyvuju jełku
Paśla taho, jak vy pryvieźli jalinku dadomu, nie varta jaje adrazu stavić u kvatery. Chvojnyja drevy nie lubiać rezkich pierapadaŭ tempieratur, tamu, kali vy kupili jalinku na vuličnym bazary, lepš spačatku źmiaścić jaje na bałkon.
«U maim vypadku my pastavili jełku na łodžyju. Tempieratura tam była krychu vyšejšaja, čym na vulicy. Praz paru dzion my pieramiaścili dreva ŭ dom, i tolki paśla hetaha pačali ŭpryhožvać jalinku da Novaha hoda».
Niekatoryja ekśpierty rajać pačać praces adaptacyi jełki za niekalki dzion da śviataŭ, kab dreva paśpieła pryvyknuć da novych umovaŭ.
Kali vy stavicie jełku ŭ kvateru, źmiaścicie jaje dalej ad krynic ciapła, takich jak batarei, i rehularna palivajcie raślinu.
«U nas u kvatery zimoj pavietra davoli suchoje, tamu ja rehularna apyrskvała jełku z pulvieryzatara. Prykładna ŭ lutym na jełcy źjavilisia novyja łapki».
Kali lepš sadžać jełku?
Paśla śviataŭ rekamiendujecca vynieści jalinku na bałkon, kab jana pastupova pryvykała da novaj tempieratury. Pasadku lepš pravieści viasnoj, ale nie zanadta rana, kab hleba ŭžo trochi prahrełasia.
«Našuju jełku my addali ŭ traŭni siabram, jakija pasadzili jaje ŭ siabie na leciščy. Jełka paśpiachova pryžyłasia.
Druhi raz padobny ekśpierymient ja praviała ŭžo ŭ Varšavie. Na jołačnym bazary ja paraiłasia, jakuju jełku lepš vybrać dla pasadki. Pradaviec pakazaŭ niekalki maleńkich drevaŭ jełki zvyčajnaj.
Ja vybrała samuju nievialikuju: pa-pieršaje, jana dobra ŭpisvałasia ŭ maju maleńkuju varšaŭskuju kvateru, a pa-druhoje, jak mnie patłumačyli raniej, u maleńkich drevaŭ bolš šancaŭ pryžycca pry pierasadcy na vulicu. Uviesnu na jełcy zjavilisia novyja łapki.
A ŭ krasaviku ja pasadziła jaje ŭ hlebu. Dla hetaha my vykapali jamku tak, kab karaniovaja sistema źmiaščałasia poŭnaściu. Pieršy miesiac paśla pasadki ja pieryjadyčna palivała dreva, kab jamu lahčej było adaptavacca da novych umovaŭ».
Takim čynam, na liku žurnalistki «Zialonaha partała» ŭžo dźvie pasadžanyja jalinki — adna ŭ Biełarusi i adna ŭ Polščy. I heta aznačaje, što parady pracujuć.
Na mahilnym pomniku Makieja vybili častku šyfru kalinoŭcaŭ FOTA19
Kamientary