Apošnimi dniami tempieratura na 5—10°S pieravyšaje klimatyčnuju normu
Siaredniaja tempieratura 2009 hoda ŭ Biełarusi była na 1,2°S vyšejšaja za klimatyčnuju normu, jakaja składaje 5,8°S.
Pra heta paviedamiŭ načalnik słužby hidramietearałahičnych prahnozaŭ Respublikanskaha hidramietearałahičnaha centra Dźmitryj Rabaŭ 28 śniežnia na pres‑kanfierencyi ŭ Minsku.
Pavodle jaho słoŭ, heta śviedčyć pra zachavańnie tendencyi paciapleńnia klimatu, jakaja nazirajecca ŭ Biełarusi ŭ 1989 hoda.
Samymi ciopłymi miesiacami 2009 hoda byli studzień, luty, krasavik i listapad.
Tempieratura hetych miesiacaŭ pieravyšała normu na 2,5—2,9°S.
Jak skazaŭ Rabaŭ, u asnoŭnym paciapleńnie klimatu adznačajecca nie za košt letnich, a za košt zimovych i vosieńskich miesiacaŭ. U hetym hodzie leta było ŭmierana ciopłaje.
Siaredniaja tempieratura pieravysiła klimatyčnuju normu na 0,3°S za košt ciopłaha žniŭnia.
Samym chałodnym miesiacam u dačynieńni da klimatyčnaj normy staŭ śniežań. U Viciebskaj i Mahiloŭskaj abłaściach tempieratura dasiahała minus 27°S, u Minsku — minus 22°S. Jak zaznačyŭ Rabaŭ,
takaja chałodnaja druhaja dekada śniežnia ŭ Biełarusi byvaje prykładna raz na 20 hadoŭ.
Pavodle jaho słoŭ, śniežań taksama vyznačyŭsia anamalna ciopłymi pieršymi dniami i rezkim paciapleńniem u 20‑ch čysłach. Apošnimi dniami tempieratura na 5—10°S pieravyšaje klimatyčnuju normu.
Pavodle słoŭ śpiecyjalista, 2009 hod možna ličyć «vielmi daždžlivym».
Za hod vypała na 20% bolš apadkaŭ, čym u siarednim: 778 mm pry normie ŭ 665 mm. Samymi daždžlivymi miesiacami byli sakavik, červień, lipień, kastryčnik, listapad. Pryčym u kastryčniku doždž liŭ amal kožny dzień. U lipieni anamalnaja kolkaść apadkaŭ — 142 mm — vypała za niekalki dzion, kali prajšli liŭni.
Samymi suchimi miesiacami hetaha hoda byli krasavik, žnivień i vierasień.
U krasaviku pa ŭsioj terytoryi krainy adznačałasia zasucha: za miesiac vypała ŭsiaho 26% ad normy apadkaŭ.
Kamientary