Sudziać žychara Bresta, jaki addana naviedvaŭ palityčnyja pracesy. Jon uśmichajecca navat u sudzie
41-hadovaha Vitala Čopika vinavaciać u tym, što jon chadziŭ na sudy nad «ekstremistami» i paviedamlaŭ pra prysudy.
41-hadovaha Vitala Čopika zatrymlivali nie mienš jak try razy. Paśla apošniaha zatrymańnia jaho bolš nie adpuścili. Hety čałaviek, faktyčna, achviaravaŭ saboju, kab palitviaźni Bresta nie byli zabytyja, kab śviet viedaŭ, što adbyvajecca za dźviaryma sudoŭ.
U śniežni 2021 hoda ŭ jaho praviali pieršy pieratrus. U vieraśni 2022 hoda jaho pieršy raz zatrymali — farmalna za ściah, jaki siłaviki, mahčyma, sami vyviesili ŭ jahonaj kvatery ŭžo paśla zatrymańnia. U mužčyny prosta nie było smartfona, u jakim možna było adšukać «ekstremisckija materyjały», i tamu łukašystam nie było da čaho inšaha dačapicca.
Inšy raz u budynku suda kanvoj zaciahnuŭ jaho ŭ asobny pakojčyk, dzie ŭdaryli pad dych i paraili bolš na pasiadžeńni nie chadzić.
Apošni raz Čopika zatrymali ŭ sakaviku 2024 hoda. Tady jaho, miarkujučy pa ŭsim, mietadyčna źbivali: vidavočcy raskazali, što jaho pryvozili ŭ balnicu chutkaj dapamohi.
Vital pracavaŭ zvyčajnym rabočym na roznych pracach.
Pra takich ludziej kažuć: «zvyčajny čałaviek, jaki žyvie zvyčajnym žyćciom».
Źviestak pra jaho ŭ internecie niašmat. Pavodle źviestak resursu «Terytoryja futboła», z 2014 pa 2020 Vital hulaŭ u roznych kamandach u Bresckaj amatarskaj lizie mini-futbołu. Siabar Vitala Ihar (imia źmienienaje pa jahonaj prośbie) raskazvaje, što toj zachaplaŭsia futbołam ahułam, raniej byŭ fanatam bresckaha «Dynama».
«Vital šmat čytaŭ i časta naviedvaŭ miascovyja biblijateki. Zachaplaŭsia historyjaj rodnaha horada, možna jaho navat nazvać krajaznaŭcam. Biełaruskamoŭny, ścipły, vysokaintelektualny, ale nie lubić siabie vyłučać», — raskazvaje pra Vitala Ihar.
Jak piša «Bieraściejskaja viasna», Vital paśladoŭna naviedvaŭ sudy pa palityčna matyvavanych spravach z 2020 hoda. Na adnym z takich sudoŭ u lipieni 2022 hoda jaho zdymali bresckija prapahandysty, jakija sprabavali zadavać jamu pravakacyjnyja pytańni.
12 sakavika 2024 hoda jamu prysudzili administracyjny aryšt za «niepadparadkavańnie supracoŭnikam milicyi». Z pastanovy suda viadoma, što hubazikaŭcy śćviardžali, što «patrabavali adkryć dźviery 20 chvilin». Sam Vital kazaŭ, što adkryŭ ich za chvilinu.
Pavodle źviestak BiełTA, Čopika abvinavačvajuć u tym, što jon chadziŭ na sudy i «fiksavaŭ chod i vyniki pasiedžańniaŭ».
A dla dokazaŭ jaho viny hubazikaŭcy, mahčyma, padrabili skrynšoty jaho pierapisak, na jakich jon byccam pieradavaŭ źviestki z sudoŭ supracoŭnicy pravaabarončaha centra «Viasna». Viadoma, što sam mužčyna nie nadta aktyŭna karystaŭsia smartfonam.
«Vital maje abvostranaje pačućcie spraviadlivaści. Empatyčny, dapamahaŭ ludziam, nie čakajučy ničoha naŭzamien. Jany padrabili pierapisku admysłova, bo im nie padabałasia, što jon chodzić na sudy. Hubazikaŭcy prydumali, što jon pieradaje niejkuju infarmacyju, i mocna jaho źbili, kab jon u hetym pryznaŭsia», — kaža brescki siabra Vitala.
Sud nad Vitalom pačynajecca 21 kastryčnika ŭ Bresckim abłasnym sudzie. Jaho vinavaciać va «ŭdziele ŭ dziejańniach, jakija hruba parušajuć hramadski paradak» (č. 1 art. 342 KK) i «sadziejničańni ekstremisckaj dziejnaści» (č. 1 i č. 2 art. 361-4 KK).
Na prapahandysckich videa dziaržSMI vidać, što hety doŭhavałosy mužčyna šyroka ŭśmichajecca navat u sudzie.
Sudzić jaho Jaŭhien Brehan, jaki, naprykład, u 2021 vynies vialikija prysudy pa «Pinskaj spravie», a ahułam asudziŭ bolš za 20 biełarusaŭ pa palityčnych kryminałkach.
«Naša Niva» — bastyjon biełaruščyny
PADTRYMAĆSudziać hiendyrektara BiełAZa. Pahražaje da 15 hadoŭ9
Kamientary