Zialenski: Ukraina albo ŭstupić u NATA, albo budzie mieć jadziernuju zbroju
Dla ŭłasnaj biaśpieki Ukraina musić albo stać členam NATA, albo mieć jadziernuju zbroju. Pra heta prezident Uładzimir Zialenski havaryŭ z kandydatam u prezidenty ZŠA Donaldam Trampam padčas ich sustrečy ŭ vieraśni, piša UNIAN.
Vystupajučy siońnia na pres-kanfierencyi ŭ Bruseli, Zialenski raspavioŭ, jak jon abmiarkoŭvaŭ z Donaldam Trampam pytańnie NATA, vykarystoŭvajučy ŭ jakaści prykładu Budapiešcki miemarandum, kali Ukraina admoviłasia ad jadziernaj zbroi.
«Mnie zdajecca, što heta zrazumieły prykład. Ukraina mieła Budapiešcki miemarandum. U im udzielničali jadziernyja dziaržavy. Najbujniejšyja dziaržavy ŭ śviecie, jakija majuć upłyŭ i jadziernuju zbroju. Siarod ich, biezumoŭna, byli Złučanyja Štaty Amieryki, Kitaj, Rasija, Francyja. Vialikija hulcy, jakija majuć jadzierny patencyjał», — skazaŭ Zialenski.
Prezident nahadaŭ, što ŭmovaju dla Ukrainy była admova ad vialikaj kolkaści jadziernaj zbroi ŭ abmien na harantyi ad krain, jakija dałučylisia da Budapiešckaha miemaranduma, što jany buduć padtrymlivać terytaryjalnuju cełasnaść i suvierenitet niezaležnaj Ukrainy ŭ mižnarodna pryznanych miežach 1991 hoda.
«Voś što było ŭ dakumiencie. I kali Rasija parušyła hety dakumient, chacia jana była harantam hetaha miemaranduma, jak možna vieryć u hety dakumient i jak možna daviarać usim partnioram, jakija harantavali zachavańnie našaj terytaryjalnaj cełasnaści i suvierenitetu? Adkaz vielmi prosty. Ci pracuje heta? Nie, hety dakumient nie pracuje! Ci pracujuć damoŭlenaści inšych vialikich partnioraŭ z Rasijaj? Nie, nie pracujuć! Heta značyć, što heta byli nie tolki damoŭlenaści Ukrainy z Rasijaj, ale i z usimi partniorami. Ahułam, usie hetyja damoŭlenaści nie spracavali», — skazaŭ Zialenski.
Pry hetym prezident Ukrainy padkreśliŭ, što paciarpieła tolki Ukraina, inšyja jadziernyja krainy nie paciarpieli. Ukraina addała jadziernuju zbroju i siońnia vajuje.
«U razmovie z Donaldam Trampam ja jamu skazaŭ: jaki ž u nas vychad? Albo Ukraina budzie mieć jadziernuju zbroju, i tady heta budzie dla nas abarona, albo my pavinny dałučycca da niejkaha aljansu. Akramia NATA, my pakul nie viedajem dziejučych aljansaŭ. Krainy NATA siońnia nie vajujuć. U krainach NATA ludzi žyvyja… Tamu my vybirajem NATA, a nie jadziernuju zbroju. My vybirajem NATA. I, jak mnie zdajecca, mianie pačuŭ Donald Tramp. Jon skazaŭ: u vas spraviadlivyja arhumienty», — padkreśliŭ Zialenski.
«Telefanujcie dzieciam, prasicie viarnucca ŭ Biełaruś». Biełarusy na miažy sutyknulisia z novaj pravierkaj1
Kamientary